John 9 - Badon Tolagan Na Biblia

Ingkal Jesus I Korab Na Dahin Sigod A Ekorab

¹ Idi man-aahad si Jesus, gwariy mita thon dahin sigod a ekorab.

² Inbaga iren ma disipolos to i “Maistoro, niyana sigod a ekorab iya too? Kagol emo na basol to ono basol na parintis to?”

³ Insongbat Jesus i “Nat ekorab kagol na basol to ono basol na parintis to. No diket ekorab say ibiybiy Afo Chiyos i panakabalin to no a-kalen toy korab niya too.

⁴ Nem no kaakawan pay, mesepol a a-magen tayoy piyan na engito-no did si-kak. Tep no medebi wa, nagwariy mebedin a man-obda.

⁵ Basta sibibiyagak nin chiya dobong, si-kak i silow a naenilow na nemnem na tood ja dobong.”

⁶ Idi kincheng Jesus a engowan niwan, chiyopdaan toy pithek say mekaloy. Et inpoyok to ma kaloy cha matha niwa ekorab

⁷ a kigwan to i “Tahen panda-nop ked ma iyabjeng a chanom cha Siloam.” (Sema banag na Siloam, iyayto-no.) Et kimowan iwa ekorab chiwan et iyanda-nop. Idi imoli di, mahasi-neng ma.

⁸ Sema iren kaaroba na ekorab tan sema iren toon naeni-neng a naiyanpalimos, kigwan cha i “Nat sejay ayay toon natimokkong a naiyanpalpalimos?”

⁹ Sema echom, kigwan cha i “Ahow, si-katho man.” Nem kigwan ngo na echom i “Enchi, singen kalopdopaan to bengat.” Nem kigwan niwa dahi i “Si-kak iwa too.”

¹⁰ Et kigwan cha i “Nengoy inpasing mon mahasi-neng ma?”

¹¹ Insongbat to i “Sema toon kigwan cha i si Jesus, engamag na kaloy et inpoyok tod mathak a kigwan to i ‘Tahed Siloam et pan ked man.’ Kimowanak et iyanda-nofak, et idi iyakcheng iwan, mahasi-nengak da.”

¹² Et kigwan cha i “To waliy kad-an niwa too niman i?” Insongbat niwa dahi i “Ekak amta.”

Siyalodsod Iren Ma Pharisees Iwa Dahin Sigod A Ekorab

¹³ Et intolod cha ma dahin sigod a ekorab ired ma Pharisees.

¹⁴ Seman a akow a inpangamag Jesus na kaloy et ingkal toy korab niwa dahi, Sabbath a akow na pan-inana.

¹⁵ Inbagaan mowan iren ma Pharisees iwa dahi no nengoy inpasing ton iya-kal i korab to. Et insongbat niwa dahi i “Inpoyok toy kaloy cha mathak, iyanda-nofak, et mahasi-nengak ma.”

¹⁶ Kigwan na echom cha Pharisees i “Sema toon engamag niwan, nat into-non Afo Chiyos tep chichal toy dinteg Afo Chiyos nonta ingkal toy korab niya dahi nonta akow na pan-inana.” Nem kigwan ngo na echom i “Say toon naiyanbasol, ngoy pesing ton mengemag na milagron inges niwan?” Nat man-iringes i nemnem cha.

¹⁷ Isonga, kigwan mowan iren ma Pharisees chiwa dahin sigod a ekorab i “No si-kam engka, kagol a kigwan mo i ingkal niwa tooy korab mo, ngoy konen mo maypangkep cha si-katho?” Et insongbat niwa dahi i “Profita man.”

¹⁸ Nem sema iren naengibalnay na Hodjos, eg cha piyati i ekorab iwa dahi nontan et mahasi-neng ma. Isonga, inpata-gway chiy parintis to,

¹⁹ et inbagaan cha i “Anak jo jay? Podno ayen sigod a ekorab? Nengoy inpasing ton mahasi-neng ma?”

²⁰ Et insongbat iren ma parintis i “Anak mi jay, tan podnon sigod a ekorab.

²¹ Nem nat amta wi no nengoy inpasing ton mahasi-neng ma, et nat amta wi ngo no siyay iyangkal na korab to. Ibagai yo ngo. Iya-tengan ma. Mebedin a songbathan toy angel to.”

²² Kigwan cha man tep entahot cha ira ma naengibalnay na Hodjos. Tep iyantotolagan iren ma naengibalnay i angken siyen toon mengowan i si Jesus i Cristo, nat maytolok iwa toon onsekep cha synagog.

²³ Isonga, kigwan na parintis to i “Ibagai yo. Iya-tengan ma.”

²⁴ Isonga, sema iren naengibalnay na Hodjos, inpata-gway cha mowan iwa dahin sigod a ekorab, et kigwan cha i “Isapatham cha Afo Chiyos i konen moy podno tep sema toon iyangkal na korab mo, amta wi i mabesol.”

²⁵ Et insongbat niwa dahi i “Nat amtak no mabesol iwan, ono enchi. Nem sa-sa-kiy amtak a nontan ekorabak, nem niman mahasi-nengak.”

²⁶ Et inbagaan mowan iren ma naengibalnay i “Ngoy imag to? Ngoy inpasing ton iyangkal na korab mo?”

²⁷ Et kigwan niwa dahi i “Kigwan ko waled si-kayo, nem nat piyati yo. Niyana piyan jon iki-ngelan mowan? Piyan jo ngon manbalin na disipolos to?”

²⁸ Et sema iren naengibalnay, kiyelsithan cha ma ekorab a kigwan cha i “Si-kam i disipolo tho. No si-kawi, disipolos to kawin Moses.

²⁹ Amta wi i ekitbal si Afo Chiyos cha Moses, nem seta too, nat amta wiy edafoan to.”

³⁰ Et kigwan niwa dahi i “Kaskasdaaw itha kigwan jo. Nat amta yoy edafoan to iy say si-kathoy iyangkal na korab ko.

³¹ Amta thayo i nat nainki-ngelan Afo Chiyos ira ma naiyanbasol, no diket nainki-ngelan to ira ma naiyanchayaw cha si-katho tan naengamag na piyan to.

³² Manipod nonta kapkapoanan niya dobong, nat iyaychama-chamag i gwariy toon iyangkal na korab niwa toon sigod a ekorab.

³³ Seta too, no nat edafod Afo Chiyos, nat mebedin a mengemag koma na inges niwan.”

³⁴ Et insongbat iren ma naengibalnay na Hodjos i “Iyay-anak ken mabesol, et piyan mo pay laeng i itoroan mo kawi?” Et chiyagchag cha wa.

³⁵ Idi inki-ngelan Jesus i chiyagchag iren ma naengibalnay iwa dahi, inap to. Idi sipol to, kigwan to i “Naemati ked Anak na Too?”

³⁶ Insongbat niwa dahi i “Siya man, Afo? Kowan mod si-kak say mematiak cha si-katho.”

³⁷ Et kigwan Jesus i “Sini-neng mo wala tep si-kak a mekiteba-tebal cha si-kam, si-kak iwan.”

³⁸ Et kigwan niwa dahi i “Afo, mematiak ma.” Et iyantalimohod et iyanchejaw cha si-katho.

³⁹ Et kigwan Jesus i “Kimowanak alid ja dobong a mengowis na tothoo, say sema iren naematid si-kak, maydasin ired nat naematid si-kak. Sema iren nat mahaamta na podno, may-arig ired ekorab a too, et a-kalen koy korab cha say mahasi-neng ira et memati ira. Nem sema iren mahaamta na podno maypangkep cha si-kak, nem eg cha piyan a mematid si-kak, ibiybiy ko i ekorab ira.”

⁴⁰ Sema echom a Pharisees a gwared man, inki-ngelan cha ma kigwan Jesus, et kigwan ched si-katho i “Piyan mon a-seden i ekorab kawi ngo?”

⁴¹ Et insongbat Jesus i “No ekorab kayo koma, piyan ton a-seden i agpayson nat amta yo ma podno, isonga nagwariy basol jo. Nem kagol a nakigwan jo i mahasi-neng kayo et binekan joak pay laeng, on-onong i basol jod si-kayo.”