John 8 - Badon Tolagan Na Biblia

Sema Biin Esokalan A Naenarog Na Nat Imbaliy To

¹ 27 Nem si Jesus, kimowan cha Chontog na Olivas.

² Idi gwa-gwa tho, bimowas mowan chiwa timplo. Emiin a toon gwared man, biyo-ngolan chen timokkong si Jesus et intoroan to ira.

³ Sema iren mamaistoro na dinteg tan sema iren Pharisees, mimothok iren engitahin na biin siyokalan chen naenarog na nat imbaliy to. Inpaakgwat ched sangoanan na chakel a too.

⁴ Et kigwan ched Jesus i “Maistoro, siyokalan mi ja biin naenarog na nat imbaliy to.

⁵ Kigwan tod ma dinteg Moses i sema biin inges to jay, medtog ingkathod metiy. Ngoy konen mo?”

⁶ Kigwan cha man tep piyan chen saolen si Jesus say osalen cha ma songbat ton pengicharoman ched si-katho. Nem si Jesus, jimekok et insolat toy kalomot tod pithek.

⁷ Idi nainbaga-bagaan cha, imakgwat si Jesus a kigwan to i “Angken siyen tood si-kayon nagwariy basol to, si-kathoy medebas a mentog niwa bii.”

⁸ Et jimekok mowan a iyansolat cha pithek.

⁹ Idi inki-ngelan chiy kigwan Jesus, sansa-ki iren bimetik a iyanchogid ma kaamaan. Et ebay-anan bengat si Jesus tan sema biin man-ak-akgwat cha sangoanan to.

¹⁰ Et imakgwat si Jesus a kigwan tod ma bii i “To la ira i? Nagwariy ebay-anan a menosed si-kam?”

¹¹ Insongbat niwa bii i “Nagwara, Afo.” Et kigwan Jesus i “Nat chosaen taha ngo. Taha wa, nem enog i basol mowan.”]

May-arig Si Jesus Cha Silow

¹² Et imesel mowan si Jesus ired ma toon kigwan to i “Si-kak i silow a naenilow na nemnem na tood ja dobong. Sema toon naengonod cha si-kak, nat naiyan-ahad cha kawad-an na enbolinget, no diket gwared si-katho ma silow a naengi-kan na biyag.”

¹³ Et kigwan na Pharisees cha si-katho i “Mowan tistigoiy angel mo. No tistigoan na tooy angel to, nagwariy memati i podnoy kigwan to.”

¹⁴ Insongbat Jesus i “Angken natinistigoan koy angel ko, podno ja kowan kona tep amtak i edafoan ko tan amtak i konan ko. Nem si-kayo, nat amta yoy edafoan ko tan nat amta yoy konan ko.

¹⁵ Sema nainpangowis jo, nat kosto tep naedafod nemnem na too. Nem si-kak, nagwariy kowisen ko.

¹⁶ Nem no gwariy kowisen ko koma, kostoy pengowis ko tep nat si-kak bengat i mengowis, no diket si-kak tan si Awak a engito-no did si-kak.

¹⁷ Tep iyaysolat chiwa dinteg jo i no man-inges i konen na chegwen tistigo, podnoy kigwan cha.

¹⁸ Si-kak i pilmiron tistigo tep natinistigoan koy angel ko, tan si Awak a engito-nod si-kak, si-kathoy maykadgwa tep natinistigoan toak ngo.”

¹⁹ Sema iren naiyanki-ngel, kigwan cha i “To les awam i?” Et insongbat Jesus i “Nat amta yoak tan nat amta yo ngos Awak. Tep no amta yoak koma, amta yo ngos Awak.”

²⁰ Kigwan Jesus a emiin ira jay nonta naiyantorod ma timplon askang niwa iyaykamiran na pilak. Nem nagwariy iyanmet cha si-katho tep aneng nin onmothok i timpo na ketiy to.

Sema Kigwan Jesus Cha Hodjos A Nat Ematid Si-katho

²¹ Et kigwan Jesus mowan ired ma too i “Onmothok aliy akow no onbetihak. Anafen joak, nem metiy kayod basol jon nat epakawanan. Et nat mebedin a onkowan kayod konan ko.”

²² Et iyankinowan ira ma naengibalnay na Hodjos i “Niyana nakigwan to i nat mebedin a onkowan kiyed konan to? Bonoen to emoy angel to?”

²³ Kigwan ngon Jesus i “Si-kayo, edafo kayod dobong, nem si-kak, edafoak cha dangit. Iyayka-chom kayod ja dobong, nem nat iyayka-chomak chiya dobong.

²⁴ Isonga, kigwan kod si-kayo i metiy kayod basol jon nat epakawanan. Tep no nat patien jo i si-kak iwa nakigwan ko, metiy kayod basol jon nat epakawanan.”

²⁵ Et kigwan iren ma naengibalnay i “Siya ka?” Et insongbat Jesus i “Nakigwa-kigwan tahejo no siyaak manipod nonta kapkapoanan ingkathod niman.

²⁶ Si-kayo, chakel koma iriy konen ko maypangkep cha si-kayo, tan chakel koma iriy ipabasol kod si-kayo. Nem sema sa-sa-ki bengat a ipaamtak cha tood ja dobong, sema inki-ngelan kon naedafod ma engito-no did si-kak, et podnoy ogadi tho.”

²⁷ Nem nat igwathan iren ma too i sema engibanagan Jesus, si Afo Chiyos a Aweto.

²⁸ Isonga, kigwan Jesus cha si-kara i “Si-kak a Anak na Too, no ikayang joak chiwa koros, amtaen jo i si-kak iwa nakigwan ko. Amtaen jo ngo i nagwariy naimag kon edafod nemnem ko, no diket nakigwan ko bengat iwa inbili-bilin Awak cha si-kak.

²⁹ Et si Awak a engito-no did si-kak, si-katho na olay i kadgwak. Nat in-olay toak tep naimag ko na olay i piyan to.”

³⁰ Idi inki-ngelan na tooy kigwan Jesus, chakel miy ematid si-katho.

Sema Iren Bagaen Tan Sema Nat Bagaen

³¹ Et kigwan Jesus ired ma Hodjos a ematid si-katho i “No memasig kayon mengemag na nakigwan ko, agpayson disipolos tahejo.

³² Amtaen joy podno, et sema kinapodno, si-kathoy mengidibchid si-kayo.”

³³ Et insongbat iren ma Hodjos i “Poli tho kawin Abraham. Nagwariy mengipabalin cha si-kawi na bagaen. Apay nga kigwan mo i maydibchi kawi?”

³⁴ Insongbat Jesus i “Sejay a konen kod si-kayo, podnon angken siyen toon manbesol, si-kathoy bagaen na basol.

³⁵ Sema bagaen, mebedin a maybo-day cha baliy na amo tho, nem sema anak niwa mahabaliy, nat mebedin a maybo-day tep anak to na ingked ingka.

³⁶ Isonga, no si-kak a Anak Afo Chiyos i mengidibchid si-kayo, podnon medibchi kayo.

³⁷ Amtak i poli tho kayon Abraham, nem piyan joak pay laeng a bonoen tep nat naigwat joy kowan kona.

³⁸ Nakigwan ko ma maypangkep na sini-neng ko nonta gwaraak cha Awak, nem naimag jo ma kigwan na awejod si-kayo.”

³⁹ Et kigwan iren ma Hodjos i “Si Abraham i awa wi.” Nem insongbat Jesus i “No agpayson si-kayoy polin Abraham, onoran jo komiy ima-imag to.

⁴⁰ Nem sema piyan jo, bonoen joak tep kigwan kod si-kayoy podnon kigwan Afo Chiyos cha si-kak. Sema imag Abraham, nat inges to man.

⁴¹ Sema naima-imag jo, inges to ma naima-imag na awejo.” Et kigwan mowan iren ma Hodjos i “Nat iyayka-daw kawi tep sa-sa-kiy Awa win si Afo Chiyos.”

⁴² Et kigwan Jesus cha si-kara i “No si Afo Chiyos komiy podnon Awejo, ensemek joak tep edafoak cha si-katho nonta kimowanak alid ja dobong. Nat kimowanak alid jay tep seman i piyan ko, no diket into-no thoak alin Afo Chiyos.

⁴³ Nat egwathan joy nakigwan ko tep nat piyan jon mengi-ngel na naintoro-torok.

⁴⁴ Sema Diabloy awejo, et say piyan to, seman i piyan jon a-magen. Manipod kapkapoanan, naemonoy Diablo. En-owes toy kinapodno tep nagwared si-kathoy podno. No man-itek, seman i ogadi tho tep maite-itek tan si-katho ngoy naedafoan na itek.

⁴⁵ Nem si-kak ngo, nakigwan koy podno, et setan i kagol na nat pematian jod si-kak.

⁴⁶ Siyed si-kayoy mengipaneknek i iyanbasolak? Nagwara. Emiin a nakigwan ko, podno. Apay nga eg joak pay laeng patien?

⁴⁷ No iyayka-chom i tood Afo Chiyos, nainki-ngelan toy nakigwan Afo Chiyos et naimag to. Nem si-kayo, nat iyayka-chom kayod Afo Chiyos, isonga nat nainki-ngelan jo ma nakigwan to et nat naimag jo.”

Mas Ekayang Si Jesus Iy Say Si Abraham

⁴⁸ Et kigwan iren ma naengibalnay na Hodjos cha Jesus i “Podno ma kigwan min i-Samaria ka tan iya-janan ka na dimonyo.”

⁴⁹ Et insongbat Jesus i “Nat iya-jananak na dimonyo. Nachijaw kos Awak, nem nagwariy rispiktar jod si-kak.

⁵⁰ Nem nat kowan anafiy pengichejaw jod si-kak. Si Awak i mahaamta maypangkep na kaychejaw ko, tan si-kathoy mengowis iren ma nat naiyanrispiktar cha si-kak.

⁵¹ Sejay i konen kod si-kayo, podnon angken siyen toon naengamag na nakigwan ko, nat meti-metiy.”

⁵² Et kigwan mowan na Hodjos i “Sigorado kawi wen iya-janan ka na dimonyo. Tep si Abraham tan sema iren profita nontan da, iyangketiy iren emiin. Nem kigwan mo i angken siyen toon naengamag na nakigwan mo, nat meti-metiy.

⁵³ Mas ekayang ka aya iy say si Abraham a afo thayon etiy? Tan sema iren profita, iyangketiy ngo ira. Ampay siya ka aya?”

⁵⁴ Et insongbat mowan Jesus i “No si-kak i manchejaw na angel ko, nagwariy silbi tho. Nem si Awak a nakigwan jo i Chiyos jo, si-kathoy naiyanchayaw cha si-kak.

⁵⁵ Nat amta yos Awak, nem si-kak, agpayson amtak si-katho. No konen ko koma i nat amtak si-katho, maitekak a inges jo. Nem agpayson amtak si Afo Chiyos, et naimag koy nakigwan to.

⁵⁶ Si Abraham a afo yo la, imimdeng nonta inpanbiyag to tep iyamta tho i si-nengen toy akow na imothok ko di, et agpayson iyaybiybiy cha si-katho et banay i chadsak to.”

⁵⁷ Et kigwan iren ma Hodjos i “Aneng pay i dimen polon tawen mo. Isonga, nancha-ki mitam si Abraham?”

⁵⁸ Et insongbat Jesus i “Sejay a konen kod si-kayo, podnon nonta aneng pay may-anak si Abraham, sigod a gwaraak.”

⁵⁹ Et engopkop ira ma Hodjos na bathon ichetog ched si-katho tep piyan chen bonoen. Nem iyaydaok des Jesus cha chakel a too say nat si-nengen cha, et bintihan to ma timplo.