John 11 - Badon Tolagan Na Biblia

Sema Ingkathiy Lazarus

¹ Gwariy sa-kin dahin mansekit a iyanngaran na Lazarus. Naiyan-iyan chiwa Bethany a otik a siyodad, et sema chegwen ahi thon si Mary ni Martha, naiyan-iyan ngo ired man.

² Seja Mary a ahi na mansekit a si Lazarus, si-kathoy engiso-jat na bangbangdon daned sekin Jesus, et piyonasan to na bowek to.

³ Et si Mary ni Martha, engito-no iren mengowan cha Jesus i “Afo, mansekit i kajem mon ensemek mo.”

⁴ Idi inki-ngelan Jesus iwan, kigwan to i “Sema sahit Lazarus, nat sema ketiy toy panpa-noan to, no diket epasamak iwan say maychejaw si Afo Chiyos, tan say si-kak a Anak Afo Chiyos, maychejawak ngo.”

⁵ Si Jesus, ensemek tos Martha tan si Mary tan si Lazarus.

⁶ Nem angken amta tho i mansekit si Lazarus, imeket chiwa iyan-iyanan to na chegwen akow pay.

⁷ Idi epalabas iwa chegwen akow, kigwan tod disipolos to i “On-oli kiya wed Judea.”

⁸ Et kigwan na disipolos to i “Maistoro, nonta engkay, sema iren Hodjod man, piyan chaken chedtogen. Niyana piyan mon on-olid man?”

⁹ Kigwan Jesus i “Sema silow, nasimilow na sawal na chegwen oras na san-akow. Sema toon man-ahad no kaakawan, nat maysokbab tep gwariy silow chiya dobong a naenilow na chalan to.

¹⁰ Nem sema man-ahad no edagwi, maysokbab tep nagwariy silow cha si-katho.”

¹¹ Idi kigwan Jesus iwan, kigwan to ngod disipolos to i “Si Lazarus a kajem tayo, manjo-jo-kow, nem onkowanak a bengonen ko.”

¹² Et kigwan na disipolos to i “Afo, mapteng no manjo-jo-kow tep onmapteng.”

¹³ Kigwan na disipolos to man tep kin cha i agpayson manjo-jo-kow si Lazarus. Nem say piyan Jesus a a-seden, etiy si Lazarus.

¹⁴ Et indiritson Jesus i inpangowan tod si-kara i “Etiy si Lazarus,

¹⁵ nem manchadsahak a nagwaraak ded man nonta ingkathiy to say onkedkedsang i pamati yo kagol na sema si-nengen jo. Emoy ired kad-an to.”

¹⁶ Et si Thomas a iyanngaran na Epin, kigwan tod echom ton disipolos i “Emoy ira say no bonoen ches Jesus, mekipathiy kiya ngod si-katho.”

¹⁷ Idi mimothok si Jesus cha Bethany, iyamtaan to i epalabas maliy epat a akow manipod nonta ingkaybeken Lazarus.

¹⁸ Sema Bethany, iyay-esop cha Jerusalem a tedon kilomitroy kaaragwi tho.

¹⁹ Isonga, chakel i Hodjos a kimowan alid Jerusalem a mekidiwdiwed Martha ni Mary tep etiy si ahi ra.

²⁰ Idi iyamtaan Martha i manmomothok si Jesus, kimowan a mengaspol cha si-katho, nem imeket ma ngos Mary a mantoktokkong cha baliy.

²¹ Kigwan Martha cha Jesus i “Afo, no gwara ked jay nonta engkay da, nat etiy komes ahi wi.

²² Nem amtak i angken niman, angken nengoy ibagam cha Afo Chiyos, i-kan tod si-kam.”

²³ Et kigwan Jesus i “Manbiyag mowan si ahim.”

²⁴ Insongbat Martha i “Ahow, amtak i manbiyag mowan no manpawil a emiin i iyangketiy no kaonoran a akow.”

²⁵ Et kigwan Jesus i “Si-kak i naengipawil na iyangketiy tan si-kak i naengi-kan na biyag. Angken siyen toon naematid si-kak, angken metiy, manbiyag mowan na ingked ingka.

²⁶ Et angken siyen toon sibibiyag tan naematid si-kak, nat meti-metiy. Napiyatim iyay?”

²⁷ Et insongbat Martha i “Ahow, Afo, patien ko i si-kam i Criston Anak Afo Chiyos a miyan seke-sekeren onmothok alid ja dobong.”

²⁸ Idi kigwan Martha man, imolid baliy. Idi mimothok chiwan, ingwakdin tos ahi thon si Mary, et kigwan to i “Ijay i Maistoro. Towan ipata-gway ka.”

²⁹ Idi inki-ngelan Mary iwan, imakgwat a chakos et kimowan cha kad-an Jesus.

³⁰ Si Jesus, aneng pay onmothok chiwa siyodad, no diket gwara pay nin chiwa iyan-aspolan chen Martha.

³¹ Sema iren Hodjos a mekidiwdiwed Mary chiwa baliy, idi sini-neng ches Mary a imakgwat a chakos et imawas, tined cha tep kin cha i onkowan chiwa iyaybekaan Lazarus say onnangis chiwan.

³² Idi mimothok si Mary cha kad-an Jesus et sini-neng to, iyantalimohod cha sangoanan ton kigwan to i “Afo, no gwara ked jay nonta engkay da, nat etiy komes ahi wi.”

³³ Idi sini-neng Jesus a mannanangis si Mary tan sema iren Hodjos a timened cha si-katho, enbel-at i nemnem to tan iya-ngos a chilin

³⁴ kigwan to i “Toy engibekaan jod si-katho i?” Et kigwan cha i “Gomali, Afo, say metaen mo.”

³⁵ Et nimangis si Jesus.

³⁶ Et kigwan na Hodjos i “Si-neng joy kabenay na semek tod si-katho!”

³⁷ Nem kigwan ngo na echom i “Inpasi-neng toy ekorab. Niyana nat inpamapteng tos Lazarus say nat metiy?”

Inpanpawil Jesus Si Lazarus

³⁸ Idi mimothok si Jesus cha iyaybekaan Lazarus, enbel-at mowan i nemnem to. Sema iyaybekaan Lazarus, dohang a esa-dinan i sakepan to na batho.

³⁹ Kigwan Jesus i “Ekal joy batho.” Nem si Martha a ahi na etiy, kigwan to i “Afo, enbanget emo wala tep epat a akow i ingkathiy to.”

⁴⁰ Et kigwan Jesus i “Ampay nat kigwan kod si-kam i no memati ka, si-nengen moy kinakayang Afo Chiyos?”

⁴¹ Et ingkal chiy batho. Et timangkak si Jesus a kigwan to i “Awa, mansalamathak cha si-kam tep inki-ngelan moak.

⁴² Amtak i nainki-ngelan moak na olay, nem kowan kona jay kagol iren ja toon kainakgwat chiyay say patien cha i si-kam i engito-no did si-kak.”

⁴³ Idi kigwan Jesus iwan, inpekes toy esel ton kigwan to i “Lazarus, bo-day ka did tan.”

⁴⁴ Et bimo-day ali ma etiy a ebedberan i diweto tan seki tho tan edibothan i dopa tho na dofot. Et kigwan Jesus cha si-kara i “Ekal jo ma iket say mahabetik.”

Tiyabtabal Iren Ma Naengibalnay Na Hodjos I Pesing Chen Mengipabonon Jesus

⁴⁵ Sema iren Hodjos a kimowan a mekidiwdiwed Mary, sini-neng chiy imag Jesus, et chakel i ematid si-katho.

⁴⁶ Nem sema echom, kimowan ired Pharisees, et kigwan ched si-kara ma imag Jesus.

⁴⁷ Isonga, sema iren aafo na papari tan sema iren Pharisees, inpata-gway chiy echom a naengibalnay na Hodjos a kigwan cha i “Ngoy a-magen tayo? Tep chakel i naima-imag niwa toon milagro.

⁴⁸ No nagwariy a-magen tayod si-katho, mematin emiin i tood si-katho. Et no iki-ngelan na naiyantoray cha Roma i gwariy toon manbalin na ari na Hodjos, onkowan iren menechal niwa timplo thayo tan too thayo.”

⁴⁹ Nem gwariy sa-kid si-karen iyanngaran na Caiaphas a kahejangan a pari nontan a tawen. Kigwan to i “Nagwaren polos i amta yo.

⁵⁰ Nat egwathan jo i magangkana no metiy i sa-kin too bengat para cha kaidian to say nat maomas a emiin i Hodjos?”

⁵¹ Sema kigwan Caiaphas, nat edafod nemnem to, nem kagol na kahejangan a pari nontan a tawen, inpapadton Afo Chiyos cha si-katho i metiy si Jesus para cha Hodjos.

⁵² Et nat sema iren Hodjos bengat i ketiyan to, no diket sema iren aanak ngon Afo Chiyos a man-iiyan cha chakel a dogad say mansa-sa-ki iren emiin.

⁵³ Et iyanchogid ma akow, ina-inap iren ma naengibalnay na Hodjos i pesing chen mengipabonon Jesus.

⁵⁴ Isonga, nat iyanparang males Jesus cha chakel a tood Judea, no diket ipit to liy Ephraim a siyodad a iyay-esop cha dogad a nagwariy toon naiyan-iya-iyan. Chiwan i iyan-iyanan Jesus tan disipolos to.

⁵⁵ Chanchaniy piyasta na Hodjos a kigwan cha i Piyasta na Inda-bas na Anghil cha Hodjos. Chakel i toon edafo did siyo-siyodad a kimowan cha Jerusalem say a-magen chiy ogadi ra na pan-emes et say mebedin a mekipiyasta ira.

⁵⁶ Ina-inap ches Jesus, et idi gwara ired timplon kainakgwat, iyanbinaga iren kigwan cha i “Nengoy nemnem jo? Onkowan ali ja piyasta ono enchi?”

⁵⁷ Tep sema aafo na papari tan sema iren Pharisees, inbilin cha i angken siyen toon mahaamta na kad-an Jesus, konen to komed si-kara say chedmethen cha.