John 10 - Badon Tolagan Na Biblia

May-arig Si Jesus Chiwa Mapteng A Naiyanbantay Na Kalniro

¹ Et in-arig Jesus a kigwan to i “Sejay a konen kod si-kayo, podnon no gwariy koral na kalniro, et nat manchedan i tood ma pasbol to, no diket onkalab cha alad to, mahibot tan tolisan iwa too.

² Nem sema toon manchedan chiwa pasbol, si-kathoy naiyanbantay na kalniro.

³ Si-kathoy ipaskep na kowadjed ma koral. Nainki-ngelan na kalniroy esel to et napiyeschian cha. Natiya-gway niwa naiyanbantay i kalniro thon nangiyaranan to na sa-ki tan sa-ki, et nain-awas to ired ma koral.

⁴ No nain-awas to wen emiin ira ma kalniro, naedagwas, et naiyonod iren ma kalniro tep amta riy esel to.

⁵ Nat onoren chiy afil a too, no diket bebtihan cha tep nat amta riy esel to.”

⁶ Kigwan Jesus iyay a arig ired ma too, nem nat igwathan chiy piyan ton a-seden.

⁷ Et in-arig mowan Jesus a kigwan to i “Sejay a konen kod si-kayo, podnon si-kak i pasbol a nasimekepan na kalniro.

⁸ Emiin a toon edagwas iy say si-kak a engitoro na nat podno, singen mahibot tan tolisan ira. Nem nat inki-ngelan iren ma kalniro.

⁹ Si-kak iwa pasbol. Angken siyen toon onsekep babaen cha si-kak, maysalakan. Sema toon maysalakan, may-arig cha kalniron egwayen onsekep tan on-awas cha koral et naiyaypastol cha edo-do-betan.

¹⁰ Sema mahibot, nakimowan alin mengibot, memono, tan menechal. Nem si-kak, kimowanak ali say may-i-kanan i too na biyag a nagwariy kay-ingesan to.”

¹¹ Kigwan mowan Jesus i “Si-kak i mapteng a naiyanbantay na kalniro. Sema mapteng a naiyanbantay, i-kan toy biyag to para cha kalniro tho.

¹² Sema toon edagboan a manbantay na kalniro, nat si-kathoy podnon naiyanbantay tan nat si-kathoy mahakalniro. No menakmang na emanekot a animal a mankokowan ali, ipekday to ira ma kalniro et onbetik iwa too. Et kedathen niwa emanekot a animal ira ma kalniro, et mesidak ira.

¹³ Sema too, onbetik tep edagboan bengat tan nat napiyategan to ira ma kalniro.

^14-15 “Si-kak i mapteng a naiyanbantay na kalniro. Sema pengamten Awak cha si-kak tan sema pengamtak cha Awak, inges ngon man i pengamtak iren ma kalnirok tan sema pengamta iren ma kalnirok cha si-kak. Et i-kan koy biyag ko para cha kalnirok.

¹⁶ Gwara ngoy echom a kalnirok a nagwared ja koral. Mesepol a a-daen ko di ired jay, et manki-ngel ngo ired esel ko. Et sema emiin a kalniro, manbalin na sa-kin gropo, tan sa-sa-kiy manbantay iren ma kalniro.

¹⁷ “Si Awak, ensemek toak tep i-kan koy biyag ko say manpawilak mowan.

¹⁸ Nagwariy mahabonod si-kak no ekak itolok, no diket i-kan koy biyag ko tep seman i piyan ko. Gwariy panakabalin kon mengi-kan na biyag ko, tan gwara ngoy panakabalin kon mengoli na biyag ko. Tep seman i inbilin Awak cha si-kak.”

¹⁹ Idi inki-ngelan na Hodjos i kigwan Jesus, nat man-iringes mowan i nemnem cha.

²⁰ Chakel i engowan i “Ebang-ag tep iya-janan na dimonyo. Niyana naiyanki-ngel kayod si-katho?”

²¹ Nem kigwan ngo na echom i “Sema toon iya-janan na dimonyo, nat nakigwan to iriy inges to man. Mebedin ayen a-kalen na dimonyoy korab na too?”

Nat Piyan Na Hodjos A Mematid Jesus

²² Nonta timpo na siteg-inan, gwariy piyasted Jerusalem a kigwan cha i Piyasta na Ingkaydasin na Timplo.

²³ Gwares Jesus chiwan a man-aahad cha parti na timplon kigwan cha i Siroman Solomon.

²⁴ Biyo-ngolan na Hodjos a kigwan cha i “Sa-noy kebejag na panseked mi asan mo ipaamta no siya ka? No si-kam i Cristo, idiritsom i pengowan mod si-kawi.”

²⁵ Et insongbat Jesus i “Kigwan ko waled si-kayo, nem nat piyati yoak. Sema iren milagron naima-imag ko babaen na karebengan Awak, si-kathoy mengipaneknek no siyaak.

²⁶ Nem eg kayo naemati tep nat kalniro tahejo.

²⁷ Sema iren kalnirok, nainki-ngelan chiy esel ko. Amtak ira et naiyonod chaak.

²⁸ I-kanan ko ira na biyag a nagwariy pengingkaan to, et eg ira maysi-si-jan cha Afo Chiyos. Nagwariy mahapingil iren man cha si-kak.

²⁹ Si Awak a engipiyal iren man cha si-kak, mas ekayang iy say emiin. Et nagwariy mahapingil iren man cha si-katho.

³⁰ Si Awak tan si-kak, sa-sa-ki kawi.”

³¹ Idi kigwan Jesus iwan, engopkop mowan ira ma Hodjos na batho say ichetog ched si-katho tep piyan chen bonoen.

³² Et kigwan Jesus i “Inbiybiy ko waled si-kayoy chakel a mapteng a kigwan Awak a a-magen ko. Nengo iren jay a imag koy kagol a piyan jon chedtogen joak?”

³³ Et insongbat iren ma Hodjos i “Chedtogen mika, nat kagol na mapteng a ima-imag mo, no diket mowan kelsithis Afo Chiyos. Tep si-kam a too bengat, mowan iinges i angel mod Afo Chiyos.”

³⁴ Et kigwan mowan Jesus i “Gwariy inpasolat Afo Chiyos cha dinteg jon kigwan to i ‘Kigwan ko i chiyos kayo.’

³⁵ Amta thayo i sema inpasolat Afo Chiyos, nat mebedin a mesa-dathan. Isonga, no chiyos i inngaran Afo Chiyos ired ma toon inni-kanan ton ma minsahi to,

³⁶ niyana kigwan jo i kiyelsithan kos Afo Chiyos tep kigwan ko i si-kak i Anak to? Tep si-kak i pinispis Afo Chiyos et into-no thoak alid ja dobong.

³⁷ No nat kowan amagiy obden Awak, enogak i piyati.

³⁸ Nem no kowan amagiy obda tho, angken nat patien joy nakigwan ko, pati yo wangoy naimag ko say amtaan jo i gwares Awak cha si-kak tan gwaraak ngod si-katho.”

³⁹ Et inparas mowan iren ma Hodjos a chedmethen ches Jesus, nem bintihan to ira.

⁴⁰ Et iyan-olis Jesus cha piig na kolos a Jordan a emonjagan John nontan. Et chiwan i iyan-iyanan to.

⁴¹ Chakel i toon kimowan chiwa kad-an Jesus. Kigwan cha i “Nagwariy imag John a milagro, nem podnon emiin i kigwan to maypangkep niya too.”

⁴² Et chakel i tood man a ematid Jesus.