Hebrews 2 - Badon Tolagan Na Biblia

Enog I Diyamsis I Kaysalakanan A Inpaamten Jesus

¹ Kagol a si Cristoy kahejangan, patien tayo komay podnon inki-ngelan tayo, nahol ni maysi-jan kiyed man.

² Tep sema dinteg a inpaamten Afo Chiyos ired anghilis nonta bayag da, agpayson podno. Et sema toon nat emati tan enaral niwa dinteg Afo Chiyos, echosen iyaybagay ngod basol to.

³ Isonga, sigorado ngon nat mebedin a bebtihan tayoy chosa thayo no damsisen tayo ja kinapateg na kaysalakanan. Tep si Jesus a Afo thayo, si-kathoy edagwas a engipaamta niwa kaysalakanan, et sema iren engi-ngel cha si-katho, inpaamta red si-kathayo i podnoy kigwan to.

⁴ Si Afo Chiyos, inpaamta tho pay ngo i podnoy kigwan Jesus maypangkep niwa kaysalakanan. Imag to man babaen na sinjal tan kaskasdaaw tan ekila-kilasin milagron inpa-mag to. Inpaamta tho pay babaen na daing a in-ap-ap na Ispirito Santon iyaybagay cha piyan Afo Chiyos.

Iyanbalin Si Jesus Na Too Say Isalakan Toy Tothoo

⁵ Sema badon dobong alin miyan koned jay a solat, nat anghilis i pinispis Afo Chiyos a mantoray, no diket tothoo.

⁶ Tep seman i kigwan tod ma esel Afo Chiyos a “Afo Chiyos, niyana naniyemnem moy too? Niyana nakiyajoan mo ira iy too bengat ira?

⁷ Inpankombabam nin ira na kemtang iy say anghilis, et inkayang mo ira say mechejaw iren singen ari.

⁸ Inpatoray joy emiin cha si-kara.” Kigwan tod jay i inpatoray Afo Chiyos i emiin cha tothoo. Say piyan ton a-seden, nagwaren polos i eg cha torayan. Nem ingkathod niman, singen nat etongpal pay laeng iya ese-esel tep nat natiyorayan pay laeng na tooy emiin a piyarsowen Afo Chiyos.

⁹ Nem sema etongpal da, sejay a iyaybabes Jesus na kemtang iy say anghilis nonta iyanbalin na too. Epasamak iwan say metiy para cha emiin a tothoo kagol na kaasin Afo Chiyos cha si-kara. Et kagol na digat tan ingkathiy Jesus cha koros, amta thayo pay i inkayang men Afo Chiyos si Jesus say mechejaw a ari.

¹⁰ Si Afo Chiyos i emarsowa na emiin, et emiin a piyarsowa tho, para cha kaychayawan to. Isonga, kosto-kostoy planon Afo Chiyos a mandigat si Jesus a pasiya. Tep babaen iren ma diga-digat a diya-kaman Jesus chiya dobong, iyaysaganen kolpi say si-kathoy mengibalnay kiyed kaysalakanan. Imag Afo Chiyos iwan say sema iren iyanbalin na aanak ton chakel ira, ika-chom to ired ma kamaptengan a biyag a nagwariy pengingkaan to.

¹¹ Tep si Jesus i naengipanbalin na too na esantoan. Tan si Aweto, si-katho pay i Awa iren ma inpanbalin Jesus a esantoan. Isonga nat enbaing si Jesus a mengowan i ahi tho ira ma too.

¹² Tep kigwan tod Afo Chiyos i: “Ipaamtak cha aahik i imag mo. Ikansiyonan tahed naesi-si-nofan mi.”

¹³ Kigwan Jesus pay i: “Si-kak pay, napiniyal kos Afo Chiyos.” Tan kigwan to pay ngo i: “Ajaak, pati seja iren aanak Afo Chiyos a inpiyal tod si-kak.”

¹⁴ Sema iren aanak Afo Chiyos, too iren naetiy i angel cha. Isonga, iyanbalin ngos Jesus a toon inges to ira say mebedin ngon metiy. Imag to man say babaen na ingkathiy to, mebedin a kolpin a-gwahen toy Diablon naedafoan na pathiy tan sema kaysi-janan na tood Afo Chiyos,

¹⁵ et say ibolos to iren emiin a singen bagaen manipod nonta ingkay-anak cha kagol na tahot chen metiy.

¹⁶ Tep sigoradon nat anghilis i natiyolongan Jesus, no diket sema iren naiyaybilang a poli-polin Abraham.

¹⁷ Isonga, mesepol a iyanbalin si Jesus a toon da-kaman toy emiin a diya-kaman ngo na aahi tho et say mebedin a manbalin na kahejangan a parin mahaasi tan naepiyal a mansilbid Afo Chiyos. Et si-katho diy mengiriprisintar na tothood sangoanan Afo Chiyos tep babaen na ingkathiy to, inkaro thoy chosa na basol cha say mebedin a mepekawanan ira.

¹⁸ Tep si Jesus a mismo, diya-kaman toy diga-digat tan esoli-solisog, isonga amta thon ontolong na tothoo no mesolisog ngo ira say nat manbasol ira.