ಫಿಲಿಪ್ಪಿ 4 - ಕೊಡವ ಬೈಬಲ್ಪೌಲಂಡ ಬೋದನೆ 1 ಇದ್ಂಗಾಯಿತ್ ನಾಡ ಅಣ್ಣತಮ್ಮಣಂಗಳೇ, ನಾನ್ ನಿಂಗಕ್ ಇಲ್ಲಿಕತ್ತನೆ ಎಣ್ಣ್‌ನದ್‍ನ ಗೇನ ಮಾಡಿಯಂಡ್ ಒಡೆಯಂಡ ವಿಷಯತ್‍ಲ್ ಸ್ತಿರವಾಯಿತ್ ಇರಿ. ನಾನ್ ನಿಂಗಳ ಎಚ್ಚಕ್ ಪ್ರೀತಿ ಮಾಡ್‌ವಿ, ನಿಂಗಳ ಕಾಂಗಂಡೂಂದ್ ನಾಕ್ ದುಂಬ ಆಸೆ ಉಂಡ್. ನಿಂಗಳೇ ನಾಡ ಕುಶಿ, ನಿಂಗಳೇ ನಾಡ ಕಷ್ಟಕೆಲ್ಲ ಕ್‍ಟ್ಟ್‌ನ ಕಿರೀಟ. 2 ಯುವೊದ್ಯಳ ಪಿಂಞ ಸಂತುಕೆಯಳ, ಒಡೆಯಂಡ ಐಕ್ಯತ್‍ಲ್ ಒಂದಾಯಿತ್ ಇರೀಂದ್ ಕಂಡಿತವಾಯಿತ್ ಎಣ್ಣ್‌ವಿ. 3 ನಾಡ ಕೂಡೆ ಸೇವೇಲ್ ಇಂಜ ಸತ್ಯತ್‍ರ ಕೂಟಾಳಿಯೇ, ಈ ದಂಡ್ ಪೊಣ್ಣಾಳ್‍ವಳ ಸಮಾದಾನತ್‍ಲ್ ಇಪ್ಪಕ್ ಸಹಾಯ ಮಾಡ್‍ೕಂದ್ ನಿನ್ನ ಬೋಡುವಿ. ಎನ್ನಂಗೆಣ್ಣ್‌ಚೇಂಗಿ, ಕ್ಲೇಮೆನ್ಸ್ ಪಿಂಞ ಬೋರೆ ನಾಡ ಕೂಡೆ ಸೇವೆ ಮಾಡ್‌ವಯಿಂಗ ಕ್ರಿಸ್ತಂಡ ನಲ್ಲ ಸುದ್ದಿನ ನೇರಾಯಿತು ಎಣ್ಣ್‌ವಕ್ ದುಂಬ ಕಷ್ಟಪಟ್ಟತ್, ಅಯಿಂಗಡ ಪೆದಯೆಲ್ಲಾ ಜೀವ ಪುಸ್ತಕತ್‍ಲ್ ಒಳ್‍ದಿತ್ ಉಂಡ್. 4 ಒಡೆಯನಾನ ಕ್ರಿಸ್ತ ಯೇಸುರಲ್ಲಿ ಎಕ್ಕಾಲು ಕುಶೀಲ್ ಇರಿ; ಕುಶೀಲ್ ಇರೀಂದ್ ಪುನಃ ನಾನ್ ನಿಂಗಕ್ ಎಣ್ಣ್‌ವಿ. 5 ನಿಂಗಡ ಸಾದು ಗುಣ ಎಲ್ಲಾರ್‌ಕು ಗೊತ್ತಿರಡ್. ಒಡೆಯನಾನ ಯೇಸು ಬೆರಿಯ ಬಂದಂಡುಂಡ್. 6 ನಿಂಗ ಒರ್ ವಿಷಯಕು ಬೇಜಾರ್ ಮಾಡಂಡ, ಅದ್ಂಡ ಬದ್‍ಲ್ ಎಲ್ಲಾ ವಿಷಯಕ್ ದೇವನ ತುದಿಚಂಡ್ ನಿಂಗಡ ಪ್ರಾರ್ಥನೆಲ್ ನಿಂಗಕ್ ಎಂತ ಬೋಂಡೂಂದ್ ಅಂವೊನ ಬೋಡಿತ್ ಕ್‍ೕಳಿ. 7 ನಿಂಗ ಇನ್ನನೆ ಮಾಡ್‍ಚೇಂಗಿ, ನಿಂಗ ಏದ್ ವಿಷಯತು ಬೇಜಾರ್ ಮಾಡತೆ ಇಪ್ಪಕ್, ನಿಂಗಡ ಮನಸ್ಸ್‌ನ ಕಾಪಾಡ್‌ವ. ನಿಂಗ ಕ್ರಿಸ್ತ ಯೇಸುರ ಕೂಡೆ ಐಕ್ಯತ್‍ಲ್ ಉಳ್ಳಾಂಗ್ ನಿಂಗಡ ಹೃದಯತ್‍ಲ್ ಸಮಾದಾನ ತಂದಿತ್ ನಿಂಗಳ ಕಾಪಾಡ್‌ವ. ಅಂವೊಂಡಿಂಜ ಬಪ್ಪ ಈ ಸಮಾದಾನತ್‍ನ ನಂಗಡ ಬುದ್ದಿಯಿಂಜ ಅರ್ಥ ಮಾಡ್‌ವಕಯ್ಯುಲೆ. 8 ಆಕೀರ್‌ಕ್, ನಾಡ ಅಣ್ಣತಮ್ಮಣಂಗಳೇ, ಏದೆಲ್ಲಾ ಸತ್ಯವೊ, ಏದೆಲ್ಲಾ ಯೋಗ್ಯವೊ, ಏದೆಲ್ಲಾ ನೀತಿಯುಳ್ಳದೋ, ಏದೆಲ್ಲಾ ಶುದ್ದವಾನದೋ, ಏದೆಲ್ಲಾ ನಲ್ಲದೋ, ಏದೆಲ್ಲಾ ಬಾರಿ ಚಾಯಿ ಉಂಡೋ, ಎದಂಗೆಲ್ಲಾ ನಲ್ಲ ಪೆದ ಉಂಡೋ, ಏದೆಲ್ಲಾ ಹೊಗಳುವನಕೆ ಉಂಡೋ ಅಂತ ವಿಷಯತ್‍ನ ನಿಂಗ ಎಕ್ಕಾಲು ಗೇನ ಮಾಡಿಯಂಡಿರಿ. 9 ನಾಡಗುಂಡ್, ನಿಂಗ ಎಂತದೆಲ್ಲಾ ಪಡಿಚಿರೊ, ನಿಂಗಕ್ ಎಂತದೆಲ್ಲಾ ಕ್‍ಟ್ಟ್‌ಚೋ, ಎಂತದೆಲ್ಲಾ ಕ್‍ೕಟಿರೊ, ಕಂಡಿರೋ, ಅದ್‍ನೆಲ್ಲಾ ನಿಂಗಳು ಮಾಡಿಯಂಡಿರಿ. ಅಕ್ಕ ಸಮಾದಾನತ್‍ರ ದೇವ ನಿಂಗಡ ಕೂಡೆ ಇಪ್ಪ. ಸಬೆ ಅಯಿಚಿ ತಂದ ಇನಾಮ್‍ಕಾಯಿತ್ ವಂದನೆ ಮಾಡ್‌ವ ಪೌಲ 10 ನಾಡ ಕಷ್ಟತ್‍ಲ್ ನಾಕ್ ಸಹಾಯ ಮಾಡ್‌ವಕ್ ಪುನಃ ನಿಂಗ ಮನಸ್ಸ್ ಮಾಡ್‍ನಗುಂಡ್ ದೇವಡ ಪಕ್ಕ ನಾನ್ ಕುಶೀಲ್ ಉಳ್ಳ; ಇನ್ನನೆ ಮಾಡ್‌ವಕ್ ನಿಂಗ ಗೇನಮಾಡಿಯಂಡಿಂಜಿರ, ಆಚೇಂಗಿ ಅದ್ಂಗುಳ್ಳ ಸಮಯ ಮಾತ್ರ ನಿಂಗಕ್ ಕ್‍ಟ್ಟಿತ್ಂಜಿತ್‌ಲ್ಲೆ. 11 ನಾನ್ ಕಷ್ಟತ್‍ಲ್ ಉಳ್ಳ್‌ಂದ್ ನಾನ್ ಇನ್ನನೆ ಎಣ್ಣಿಯಂಡಿಲ್ಲೆ; ಎನ್ನಂಗೆಣ್ಣ್‌ಚೇಂಗಿ, ನಾಕ್ ದುಂಬ ಇಂಜತೇಂಗಿಯು, ಕಮ್ಮಿಯಾಯಿತ್ ಇಂಜತೇಂಗಿಯು ನಾನ್ ತೃಪ್ತಿಲ್ ಇಪ್ಪಕ್ ಪಡಿಚಿಯೆ. 12 ಒಂದು ಇಲ್ಲತೆ ಬದ್‌ಕ್‍ವಕು, ಎಲ್ಲಾ ಇಂಜಿತ್ ಬದ್‌ಕ್‍ವಕು ನಾಕ್ ಗೊತ್ತುಂಡ್; ಏದ್ ಜಾಗತ್‍ಲು, ಎಲ್ಲಾ ಸ್ತಿತಿಲು ತೃಪ್ತಿಲ್ ಇಪ್ಪಕು, ಕೆಲ ಪಯಿಪಕಲು, ಪೂರ್ತಿಯಾಯಿತ್‌ಪ್ಪಕಲು, ಬೋಂಡಿಯಾನದ್ ಇಲ್ಲತಿಪ್ಪಕಲು ನಾನ್ ಬದ್‍ಕ್‍ವಕ್ ಪಡಿಚಿತುಳ್ಳ. 13 ನಾಕ್ ಶಕ್ತಿ ತಪ್ಪ ಕ್ರಿಸ್ತನಗುಂಡ್ ನಾಕ್ ಎಲ್ಲಾನ ಮಾಡ್‌ವಕಯ್ಯು. 14 ಆಚೇಂಗಿಯು, ನಿಂಗ ನಾಡ ಕಷ್ಟತ್‍ಲ್ ಕೂಡೆ ಇಂಜಿತ್ ಸಹಾಯ ಮಾಡ್‍ನದ್ ನಲ್ಲದ್. 15 ಫಿಲಿಪ್ಪಿ ಪಟ್ಟಣತ್‍ರ ದೇವಡ ಮಕ್ಕಳೇ, ದೇವಡ ನಲ್ಲ ಸುದ್ದಿನ ನಾನ್ ಮಕೆದೋನ್ಯತ್ಂಜ ಎಣ್ಣಿಯಂಡ್ ಪೋಪಕ ಪಣ ಸಹಾಯ ಮಾಡ್‌ವ ವಿಷಯತ್‍ಲ್ ನಿಂಗ ಮಾತ್ರ ನಾಕ್ ಅಯಿಚದಲ್ಲತೆ ಬೋರೆ ಏದ್ ಸಬೇಯು ಅಯಿಚಿತ್‌ಲ್ಲೇಂದ್ ನಿಂಗಕೇ ಗೊತ್ತುಂಡ್. 16 ನಾನ್ ಥೆಸಲೋನಿಕತ್‍ಲ್ ಇಪ್ಪಕಲು ನಿಂಗ ನಾಕ್ ಪಣ ಸಹಾಯತ್‍ನ ಅಕ್ಕಕ್ಕ ಮಾಡಿತುಳ್ಳಿರ. 17 ನಾನ್ ನಿಂಗಡಗುಂಡ್ ಸಹಾಯ ಮಾತ್ರ ನೋಟಿಯಂಡ್ ಇರತೆ, ನಿಂಗ ಮಾಡ್‍ನ ಸಹಾಯಕ್ ದೇವ ನಿಂಗಕ್ ದುಂಬ ಫಲ ತರಂಡೂಂಡ್ ಬೋಡುವಿ. 18 ನಾಕ್ ಬೋಂಡಿಯಚ್ಚಕು ಅದ್ಂಗಿಂಜ ಜಾಸ್ತಿಯಾಯಿತು ಕ್‍ಟ್ಟ್‌ಚೀಂದ್ ಎಣ್ಣ್‌ವಿ. ನಿಂಗ ಅಯಿಚ ಇನಾಮ್‍ನ ಎಪಫ್ರೋದೀತನಿಂಜ ಎಡ್‍ತಂಡಿಯೆ. ಅದ್ ದೇವಡ ಮಿಂಞತ್ ದೇವಕ್ ಕೊಡ್‌ಪ ಸುಗಂದ ವಾಸನೆಯಾಯಿತು ಅಂವೊಂಡ ಪ್ರೀತಿರ ಅರ್ಪಣೆಯಾಯಿತು ಉಳ್ಳಾಂಗ್ ನಾಕ್ ತೃಪ್ತಿಯಾಚಿ. 19 ನಾಡ ದೇವ ನಿಂಗಕ್ ಬೋಂಡಿಯಾನದ್‌ನೆಲ್ಲಾ, ದೇವಡ ದುಂಬ್‍ನ ಮಹಿಮೇರ ಐಶ್ವರ್ಯತ್‍ರಗುಂಡ್ ಯೇಸು ಕ್ರಿಸ್ತಂಡ ಮೂಲಕ ನಿಂಗಕ್ ತಪ್ಪ. 20 ನಂಗಡ ಪರಲೋಕತ್‍ಲ್ ಉಳ್ಳ ಅಪ್ಪನಾನ ದೇವಕ್ ಎಕ್ಕಲೂ ಮಹಿಮೆ ಕ್‍ಟ್ಟಡ್, ಆಮೆನ್. ಆಕೀರ್ ವಂದನೆ 21 ಅಲ್ಲಿ ಕ್ರಿಸ್ತ ಯೇಸುರ ಕೂಡೆ ಐಕ್ಯತ್‍ಲ್ ಉಳ್ಳ ದೇವಡ ಮಕ್ಕಳಾನ ಅಣ್ಣತಮ್ಮಣಂಗಕು ನಂಗಡ ವಂದನೆನ ಎಣ್ಣಿ. ನಾಡ ಕೂಡೆ ಉಳ್ಳಯಿಂಗ ನಿಂಗಕ್ ವಂದನೆ ಎಣ್ಣಿಯಂಡುಂಡ್. 22 ಯೇಸುನ ನಂಬ್‍ನ ಇಲ್ಲಿಯತ್‍ರ ಎಲ್ಲಾ ಅಣ್ಣತಮ್ಮಣಂಗಳು ನಿಂಗಕ್ ವಂದನೆ ಎಣ್ಣಿಯಂಡುಂಡ್, ಮುಕ್ಯವಾಯಿತ್ ಇಲ್ಲಿಯತ್‍ರ ಕೈಸರಂಡ ಅರಮನೇಲ್ ಸೇವೆ ಮಾಡಿಯಂಡುಳ್ಳ ದೇವಡ ಮಕ್ಕ ವಂದನೆ ಎಣ್ಣಿಯಂಡುಂಡ್. 23 ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆ ನಿಂಗಡ ಆತ್ಮತ್‍ರ ಕೂಡೆ ಇರಡ್. ಆಮೆನ್. |
© 2017, New Life Literature (NLL)