ಫಿಲಿಪ್ಪಿ 2 - ಕೊಡವ ಬೈಬಲ್ಕ್ರಿಸ್ತಂಡ ಗುಣ ಪಿಂಞ ತಾಳ್ಮೆ 1 ಕ್ರಿಸ್ತನ ನಂಬಿತ್ ಅಂವೊಂಡ ಕೂಟ್‌ಲ್ ಕೂಡ್‍ನಗುಂಡ್ ನಿಂಗಕ್ ಎಂತೇಂಗಿ ಒತ್ತಾಸೆ ಉಂಡಾ? ಅಂವೊಂಡ ಪ್ರೀತಿಲ್ ನಿಂಗಕ್ ಎಂತೇಂಗಿ ಸುಕ ಉಂಡಾ? ಪವಿತ್ರಾತ್ಮತ್‍ರ ಶಕ್ತಿ ಕ್‍ಟ್ಟಿತ್ ನಿಂಗಕ್ ಎಂತೇಂಗಿ ಐಕ್ಯ ಉಂಡಾ? ನಿಂಗಡ ಮನಸ್ಸ್‌ಲ್ ಎಂತೇಂಗಿ ಕನಿಕರ, ದಯೆ ಉಂಡಾ? 2 ಅಂದಕ ನಿಂಗ ಎಲ್ಲಾರು ಒರೇ ಗೇನ ಉಳ್ಳಯಿಂಗಳಾಯಿತ್, ಒರೇ ತರ ಪ್ರೀತಿ ಉಳ್ಳಯಿಂಗಳಾಯಿತ್, ಒರೇ ಮನೆಸ್ಸ್‌ಲ್ ಪಿಂಞ ಕಾರ್ಯತ್‍ಲ್ ಒಂದಾಯಿತ್ ನಾಡ ಕುಶೀನ ಪೂರ್ತಿ ಮಾಡಿ. 3 ನಿಂಗ ಮಾತ್ರ ಬಲ್ಯಯಿಂಗಾಂದ್ ಗೇನ ಮಾಡತಿ, ನಿಂಗಳ ತಗ್ಗ್‌ಚಿಟ್ಟಂಡ್ ಬೋರೆಯಿಂಗ ನಿಂಗಕಿಂಜ ಬಲ್ಯಯಿಂಗಾಂದ್ ಗೇನ ಮಾಡಿ. 4 ನಂಗಡ ಸುಕತ್‌ನ ಮಾತ್ರ ನೋಟತೆ, ಬೋರೆಯಿಂಗಡ ಸುಕತ್‌ನ ಸಹ ನೋಟಂಡು. 5 ಕ್ರಿಸ್ತ ಯೇಸುರಲ್ಲಿ ಇಂಜ ಅದೇ ಮನಸ್ಸ್ ನಿಂಗಡಲ್ಲಿ ಇರಡ್. 6 ಅಂವೊ ದೇವನಾಯಿತ್ ಇಂಜತೇಂಗಿಯು, ಅಂವೊ ದೇವಡ ಕೂಡೆ ಸಮವಾಯಿತ್ ಇರಂಡೂಂದ್ ಅದ್‍ನ ಪುಡ್‌ಚಂಡೇ ಇಂಜಿತ್‌ಲ್ಲೆ. 7 ಆಂಡ ಬದ್‍ಲ್ ಅಂವೊ ಅಂವೊಂಡ ದೇವಡ ಪದವಿನ ಬುಟ್ಟಿತ್, ಒರ್ ಅಡಿಯಾಳ್‍ರ ರೂಪತ್‌ಲ್, ಮನುಷ್ಯನಾಯಿತ್ ಈ ಲೋಕತ್‍ಲ್ ಪುಟ್ಟ್‌ಚಿ. ಅನ್ನನೆ ಅಂವೊ ಮನುಷ್ಯಂಡ ರೂಪತ್‌ಲ್ ಬಪ್ಪಕ 8 ದೇವಡ ಮಿಂಞತ್ ತಗ್ಗ್‌ಚಿಟ್ಟಂಡ್ ಒರ್ ಪಾಪಿರನೆಕೆ ಶಿಲುಬೇಲ್ ಚತ್ತತ್. 9 ಅದ್ಂಗಾಯಿತ್ ದೇವ ಯೇಸುಕ್ ಎಲ್ಲಾಕಿಂಜ ಬಲ್ಯ ಸ್ತಾನ ಕೊಡ್‌ತಿತ್, ಎಲ್ಲಾ ಪೆದಕಿಂಜ ಬಲ್ಯ ಪೆದತ್‍ನ ಕೊಡ್‍ತತ್. 10 ಆಂಗ್ ಪರಲೋಕ, ಬೂಲೋಕ ಪಿಂಞ ಪಾತಾಳತ್‍ಲ್ ಉಳ್ಳ ಎಲ್ಲಾರು ಯೇಸುರ ಪೆದಕ್ ಅಡ್ಡ ಬುದ್ದಿತ್, 11 ಪ್ರತಿ ಒಬ್ಬನು ಯೇಸು ಕ್ರಿಸ್ತನೇ ಒಡೆಯಾಂದ್ ಎಣ್ಣಿತ್ ನಂಗಡ ಅಪ್ಪನಾನ ದೇವನ ಮಹಿಮೆ ಪಡ್‍ತ್‍ವ. ಕ್ರಿಸ್ತಂಗಾಯಿತ್ ಮಿನ್ನ್‌ವದ್ 12 ಅದ್ಂಗಾಯಿತ್ ನಾಡ ಪ್ರೀತಿರ ಜನಳೇ, ನಾಡ ಮಿಂಞತ್‍ಲ್ ನಿಂಗ ನಾಡ ತಕ್ಕ್‌ನ ಕ್‍ೕಟಂಡ್ ಇಂಜನೆಕೆ, ನಾನ್ ಇಲ್ಲತಿಪ್ಪಕ ಸಹ, ನಿಂಗ ಇಂಞು ದುಂಬ ಇಕ್ಕ ಕ್‍ೕಕಂಡು, ಆನಗುಂಡ್, ದೇವಡ ಮೇಲೆ ಬಕ್ತಿ ಪಿಂಞ ಪೋಡಿಲ್ ನಿಂಗಡ ರಕ್ಷಣೆ ಪೂರ್ತಿ ಆಪಕಾಯಿತ್ ನಿಂಗಡ ಬದ್‍ಕ್‍ಲ್ ಕಾಂಬನೆಕೆ ಚಾಯಿ ಕೆಲಸ ಮಾಡಂಡು. 13 ಎನ್ನಂಗೆಣ್ಣ್‌ಚೇಂಗಿ ದೇವ ಅಂವೊಂಗ್ ಕುಶಿಯಾನದ್‌ನ ಮಾಡ್‌ವಕ್, ನಿಂಗಕ್ ಆಸೆ ಪಿಂಞ ಶಕ್ತಿ ತಂದಿತ್ ನಿಂಗಡ ಬದ್‍ಕ್‍ಲ್ ಕ್ರಿಯೆ ಮಾಡಿಯಂಡುಂಡ್. 14 ಎಲ್ಲಾನ ಏದ್ ಕುತ್ತವು ಪರಿಯತೆ, ಬೋಂಡತ ಚರ್ಚೆ ಮಾಡತೆ ಮಾಡಿಯಂಡಿರಿ. 15 ಅಕ್ಕ, ದಾರೂ ನಿಂಗಳ ಕುತ್ತ ಪರಿಯುಲೆ. ಮೋಸ ಪಿಂಞ ನೀಚ ಜನ ದುಂಬಿತುಳ್ಳ ಈ ಲೋಕತ್‍ಲ್, ಪಳಪಳಾಂದ್ ಬೊಳಿರನೆಕೆ ಮಿನ್ನಿಯಂಡ್, ಒರ್ ಕಳಂಗ ಪಿಂಞ ಕಪಟತನ ಇಲ್ಲತೆ, ದೇವಡ ಮಕ್ಕಳಾಯಿತ್ ಬದ್‍ಕಂಡು. 16 ಜೀವ ತಪ್ಪ ದೇವಡ ತಕ್ಕ್‌ನ ಗಟ್ಟಿಯಾಯಿತ್ ಪುಡ್‍ಚೊಳಿ! ಯೇಸು ಕ್ರಿಸ್ತ ತಿರಿತ್ ಬಪ್ಪ ದಿವಸತ್‍ಲ್ ನಾಕ್ ನಿಂಗಡ ಮದ್ಯತ್‍ಲ್ ಕ್‍ಟ್ಟ್‌ನ ಕಷ್ಟನಷ್ಟ ಒಂದು ಪಾಳಾಯಿ ಪೋಯಿತ್‌ಲ್ಲೇಂದ್ ನಾಕ್ ಕುಶಿ ಆಪ. 17 ಎನ್ನಂಗೆಣ್ಣ್‌ಚೇಂಗಿ, ನಿಂಗಡ ನಂಬಿಕೇರ ಆರಾದನೆನ ನಿಂಗ ದೇವಕ್ ಅರ್ಪಿಚಿಡುವಕಾಯಿತ್, ನಾಡ ಜೀವತ್‍ನ ನೀರ್‌ರನೆಕೆ ದೇವಕ್ ಬೂಕಿತ್ ಕಳಂದತೇಂಗಿಯು ಅದ್‍ಲ್ ನಾನ್ ಕುಶಿ ಪಡುವಿ. ಅನ್ನನೆ ನಡ್ಂದತೇಂಗಿ ಆ ಕುಶೀನ ನಿಂಗೆಲ್ಲಾರು ಪಾಲ್ ಮಾಡಂಡೂಂದ್ ನಾನ್ ಎಣ್ಣ್‌ವಿ. 18 ಅಕ್ಕು, ನಿಂಗ ಸಂತೋಷ ಪಡಂಡು, ಪಿಂಞ ನಿಂಗಡ ಸಂತೋಷತ್‌ನ ನಾನು ಪಾಲ್ ಮಾಡ್‌ವಿ. ತಿಮೊಥೆಯ ಪಿಂಞ ಎಪಫ್ರೊದೀತ 19 ಒಡೆಯನಾನ ಯೇಸುಕ್ ಚಿತ್ತ ಉಂಡೇಂಗಿ, ತಿಮೊಥೆಯನ ನಿಂಗಡ ಪಕ್ಕ ಬೆರಿಯ ಅಯಿಕಂಡೂಂದ್ ಗೇನ ಮಾಡಿತುಳ್ಳ. ಅಂವೊ ನಾಡ ಪಕ್ಕ ಬಂದಿತ್ ನಿಂಗಡ ವಿಷಯತ್‍ನ ಎಣ್ಣಿತ್ ನನ್ನ ಕುಶಿಪಡ್‌ತ್‌ವ. 20 ನಾಕ್ ತಿಮೊಥೆಯನ ಬುಟ್ಟತೇಂಗಿ ನಿಂಗಳ ಇಚ್ಚಕ್ ಚಾಯಿತೆ ನೋಟ್‍ವಕ್ ನಾಡ ಮನಸ್ಸ್‌ರನೆಕೆ ಉಳ್ಳಯಿಂಗ ಬೋರೆ ದಾರೂ ಇಲ್ಲೆ. 21 ಬೋರೆ ಎಲ್ಲಾರು ಯೇಸು ಕ್ರಿಸ್ತಂಡ ವಿಷಯತ್‍ನ ಮಾಡತೆ ಅಯಿಂಗಯಿಂಗಡ ವಿಷಯತ್‍ನ ಮಾಡಿಯಂಡುಂಡ್. 22 ನಿಂಗಕ್ ಗೊತ್ತುಳ್ಳನೆಕೆ ಅಪ್ಪಂಡ ಕೂಡೆ ಒರ್ ಮೋಂವೊ ಸೇವೆ ಮಾಡ್‌ವನೆಕೆ ದೇವಡ ನಲ್ಲ ಸುದ್ದಿರ ವಿಷಯತ್‍ಲ್ ದೇವಡ ಬೋದನೆನ ಪಬ್ಬ್‌ಚಿಡ್‌ವಕ್ ಅಂವೊ ನಾಕ್ ದುಂಬ ಸಹಾಯ ಮಾಡ್‍ಚೀಂದ್ ಅಂವೊಂಡ ನಂಬಿಕಸ್ತ ಗುಣ ನಿಂಗಕ್ ಗೊತ್ತುಂಡ್. 23 ಇಲ್ಲಿ ನಾಕ್ ಎಂತಾಪಾಂದ್ ಗೊತ್ತಾಪನೆಕೆ, ನಿಂಗಡ ಪಕ್ಕ ಅಂವೊನ ಬೆರಿಯ ಅಯಿಪಕ್ ಗೇನ ಮಾಡಿಯಂಡುಳ್ಳ. 24 ನಾನೇ ನಿಂಗಡ ಪಕ್ಕ ಬೆರಿಯ ಬಪ್ಪೀಂದ್ ಒಡೆಯಂಡ ಮೇಲೆ ನಾಕ್ ನಂಬಿಕೆ ಉಂಡ್. 25 ನಾಡ ತಮ್ಮಣನು, ನಾಡ ಕೂಡೆ ಸೇವೆ ಮಾಡ್‌ವಂವೊನು, ಒರ್ ಪಟ್ಟಾಳಕಾರನೆಕೆ ನಾಡ ಕೂಡೆ ನಿಪ್ಪಂವೊನು, ನಾಕ್ ಸಹಾಯ ಮಾಡ್‌ವಕ್ ನಿಂಗ ಅಯಿಚಂವೊನು ಆಯಿತುಳ್ಳ ಎಪಫ್ರೊದೀತನ ನಿಂಗಡ ಪಕ್ಕ ಪುನಃ ಅಯಿಕಂಡೂಂದ್ ಗೇನ ಮಾಡ್‍ನ. 26 ಅಂವೊ ನಿಂಗಳ ಕಾಂಗಂಡೂಂದ್ ದುಂಬ ಆಸೇಲ್ ಇಂಜತ್. ಎನ್ನಂಗೆಣ್ಣ್‌ಚೇಂಗಿ ಅಂವೊಂಗ್ ಸೌಕ್ಯ ಇಲ್ಲತದ್ ನಿಂಗಕ್ ಗೊತ್ತಾನಗುಂಡ್ ಅಂವೊ ದುಂಬ ವ್ಯಸನ ಪಟ್ಟತ್. 27 ಅಂವೊಂಗ್ ನೇರಾಯಿತು ಸೌಕ್ಯ ಇಲ್ಲತೆ ಚತ್ತ್ ಪೋಪನೆಕೆ ಇಂಜತ್. ಆಚೇಂಗಿ ದೇವ ಅನ್ನನೆ ಮಾಡಿತ್‌ಲ್ಲೆ, ದೇವ ಅಂವೊಂಗ್ ಕನಿಕರ ಕಾಂಬ್‍ಚಿಟ್ಟತ್. ಅಂವೊಂಗ್ ಮಾತ್ರ ಅಲ್ಲ ನಾಕ್ ಸಹ ಪುನಃ ಪುನಃ ದುಃಖ ಬರತನೆಕೆ ದೇವ ದಯೆ ಕಾಂಬ್‍ಚಿಟ್ಟತ್. 28 ನಿಂಗ ಅಂವೊನ ಕಾಂಬಕ ದುಂಬ ಕುಶಿ ಪಡ್‍ವಿರಾಂದ್ ಗೊತ್ತಾನಗುಂಡ್ ಅಂವೊನ ಇಂಞು ಬೆರಿಯ ನಿಂಗಡ ಪಕ್ಕ ಪುನಃ ಅಯಿಪಕ್ ನಾನ್ ಕುಶಿಪಟ್ಟಂಡುಳ್ಳ. ಅಕ್ಕ ನಾಕ್ ಉಳ್ಳ ದುಃಖ ಚೆನ್ನ ಕಮ್ಮಿ ಆಪ. 29 ಆನಗುಂಡ್, ಒಡೆಯಂಡ ಪ್ರೀತಿಲ್ ದುಂಬಿತ್, ಅಂವೊನ ಚಾಯಿತೆ ಸತ್ಕಾರ ಮಾಡಿತ್, ಇನ್ನನೆ ಉಳ್ಳಯಿಂಗಕ್ ಕೊಡ್‍ಪ ಮರ್ಯಾದೆನ ಕೊಡ್‍ಕಂಡು. 30 ಎನ್ನಂಗೆಣ್ಣ್‌ಚೇಂಗಿ, ನಿಂಗ ನಾಕ್ ಮಾಡ್‌ವಕುಳ್ಳ ಸೇವೇಲ್, ನಿಂಗ ಮಾಡ್‌ವಕ್ ಕಯ್ಯತದ್‍ನ ಪೂರ್ತಿ ಮಾಡ್‌ವಕಾಯಿತ್, ಅಂವೊ ಅಂವೊಂಡ ಜೀವತ್‍ನ ಕೂಡೆ ನೋಟತೆ, ಕ್ರಿಸ್ತಂಡ ಸೇವೆ ಮಾಡ್‍ನಗುಂಡ್ ಚತ್ತ್ ಪೋಪನೆಕೆ ಇಂಜತ್. |
© 2017, New Life Literature (NLL)