ಫಿಲಿಪ್ಪಿ 1 - ಕೊಡವ ಬೈಬಲ್1 ಯೇಸು ಕ್ರಿಸ್ತಂಡ ಸೇವಕನಾನ ಪೌಲ ಪಿಂಞ ತಿಮೊಥೆಯ, ಫಿಲಿಪ್ಪಿ ಪಟ್ಟಣತ್‍ಲ್ ಕ್ರಿಸ್ತ ಯೇಸುರ ಕೂಡೆ ಉಳ್ಳ ಐಕ್ಯತ್‍ಲ್ ದೇವಡ ಮಕ್ಕಳಾಯಿತುಳ್ಳ ಎಲ್ಲಾ ಜನಕು, ನಿಂಗಡ ಮೇಲೆ ಜವಾಬ್ದಾರಿಯಾಯಿತುಳ್ಳ ಸಬೆರ ಪೆರಿಯಯಿಂಗಕು ಪಿಂಞ ಅಯಿಂಗಕ್ ಸಹಾಯ ಮಾಡ್‌ವ ಪೆರಿಯಯಿಂಗಕು ಒಳ್‍ದ್‍ವ ಕಾಗದ ಇದ್. 2 ನಂಗಡ ಅಪ್ಪನಾನ ದೇವಡ ಪಿಂಞ ಒಡೆಯನಾನ ಯೇಸು ಕ್ರಿಸ್ತಂಡ ಕೃಪೆಯು ಸಮಾದಾನವು ನಿಂಗಕ್ ಕ್‍ಟ್ಟಡ್. ಪೌಲಂಡ ಪ್ರಾರ್ಥನೆ 3 ನಾನ್ ನಿಂಗಳ ಎಕ್ಕೆಲ್ಲಾ ಗೇನ ಮಾಡ್‌ವಿ ಅಕ್ಕೆಲ್ಲಾ ನಿಂಗಕಾಯಿತ್ ನಾಡ ದೇವನ ವಂದನೆ ಮಾಡಿಯಂಡುಳ್ಳ. 4 ನಾನ್ ಅನ್ನನೆ ಎಕ್ಕಾಲು ನಿಂಗಕಾಯಿತ್ ಬೋಡ್‌ವಕ ನಾನ್ ಅಚ್ಚಕ್ ಕುಶೀಲ್ ನಿಂಗ ಎಲ್ಲಾರ್‍ಕಾಯಿತ್ ಪ್ರಾರ್ಥನೆ ಮಾಡಿಯಂಡುಳ್ಳ. 5 ಎನ್ನಂಗೆಣ್ಣ್‌ಚೇಂಗಿ ಕ್ರಿಸ್ತಂಡ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವ ವಿಷಯತ್‍ಲ್ ನಿಂಗ ಅಂವೊನ ನಂಬ್‍ನ ದಿನತ್ಂಜ ಇಲ್ಲಿಕತ್ತನೆ ನಿಂಗ ನಾಡ ಕೂಡೆ ಪಾಲ್‍ದಾರಂಗಳಾಯಿತುಳ್ಳಿರ. 6 ದೇವ ನಿಂಗಡಲ್ಲಿ ಸುರು ಮಾಡ್‍ನ ನಲ್ಲ ಕೆಲಸತ್‍ನ ಪೂರ್ತಿ ಮಾಡ್‌ವಕಾಯಿತ್, ಕ್ರಿಸ್ತ ಯೇಸು ಪುನಃ ಈ ಬೂಮಿಕ್ ಬಪ್ಪಕತ್ತನೆ ಮಾಡಿಯಂಡಿಪ್ಪಾಂದ್ ನಾಕ್ ನಂಬಿಕೆ ಉಂಡ್. 7 ನಿಂಗ ನಾಡ ಹೃದಯತ್‍ಲ್ ಎಕ್ಕಾಲು ವಾಸಮಾಡಿಯಂಡುಳ್ಳಗುಂಡ್, ನಿಂಗ ಎಲ್ಲಾಡ ವಿಷಯತ್‍ಲ್ ನಾನ್ ಇನ್ನನೆ ಎಣ್ಣ್‌ವದ್ ನಾಕ್ ಚಾಯೀಂದ್ ಕಾಂಬ. ದೇವ ನಾಡ ಮೇಲೆ ಕಾಂಬ್‍ಚಿಟ್ಟ ವಿಶೇಷವಾನ ಕೃಪೇರ ವಿಷಯತ್‍ಲ್, ನಾನ್ ಜೈಲ್‍ಲ್ ಇಪ್ಪಕಲು, ನಲ್ಲ ಸುದ್ದಿರ ವಿಷಯತ್‍ಲ್ ಜವಾಬ್ ಕೊಡ್‌ತಂಡ್ ಸ್ತಾಪನೆ ಮಾಡ್‌ವಕಲು, ನಾಡ ಕೂಡೆ ಪಾಲ್‍ದಾರಂಗಳಾಯಿತ್ ಉಳ್ಳಿರ. 8 ಕ್ರಿಸ್ತ ಯೇಸುರ ಪಕ್ಕ ಉಳ್ಳ ಕನಿಕರತ್ಂಜ ನಿಂಗಡ ಮೇಲೆ ನಾಕ್ ಎಚ್ಚಕ್ ಪ್ರೀತಿ ಉಂಡ್‍ೕಂದ್ ದೇವನೇ ನಾಕ್ ಸಾಕ್ಷಿ. 9 ನಿಂಗಡ ಪ್ರೀತಿ ಇಂಞು ದುಂಬ ದುಂಬಿತ್ ದೇವಡ ವಿಷಯತ್‍ಲ್ ನೇರಾನ ಬುದ್ದಿಲ್, ಶುದ್ದವಾನ ಜ್ಞಾನತ್‍ಲ್ ನಿಂಗ ಬೊಳ್ಂದಂಡ್ ಬರಂಡೂಂದ್ ನಾನ್ ನಿಂಗಕಾಯಿತ್ ದೇವಡ ಪಕ್ಕ ಪ್ರಾರ್ಥನೆ ಮಾಡಿಯುಂಡುಳ್ಳ. 10 ಅಕ್ಕ ಏದ್ ಚಾಯೀಂದ್ ನಿಂಗಕ್ ಗೊತ್ತಾಯಿತ್ ಅದ್‍ನ ಗೊತ್ತ್ ಮಾಡ್‌ವಿರ. ಅನ್ನನೆ ಆಚೇಂಗಿ, ಯೇಸು ಕ್ರಿಸ್ತ ತೀರ್ಪ್ ಕೊಡ್‍ಪ ದಿವಸತ್‍ಲ್ ನಿಂಗ ಒರ್ ತಪ್ಪು ಇಲ್ಲತ ಬದ್‍ಕ್ ಬದ್‍ಕ್‍ನಯಿಂಗಳಾಯಿತ್ ಇಪ್ಪಿರ. 11 ಅದಲ್ಲತೆ ಇಲ್ಲಿಯತ್‍ರ ನಿಂಗಡ ಬದ್‍ಕ್ ಯೇಸು ಕ್ರಿಸ್ತನಗುಂಡ್ ಮಾತ್ರ ಕ್‍ಟ್ಟ್‌ವ ನೀತಿರ ಗುಣತ್‍ಲ್ ದುಂಬ್‍ನದಾಯಿತ್ ಇಪ್ಪ. ಅನ್ನನೆ ದೇವಕ್ ಮಾತ್ರ ಮಹಿಮೆ ಪಿಂಞ ತುದಿ ಆಡ್. ಕ್ರಿಸ್ತಂಡ ಸುದ್ದಿ ಪಬ್ಬ್‌ನ ವಿಷಯತ್‍ಲ್ ಪೌಲಂಡ ಕುಶಿ 12 ನಾಡ ಅಣ್ಣತಮ್ಮಣಂಗಳೇ, ನಾಕ್ ಆನ ಈ ಎಲ್ಲಾ ಕಷ್ಟನಷ್ಟವು, ದೇವಡ ನಲ್ಲ ಸುದ್ದಿ ಎಲ್ಲಾ ಜಾಗತ್‍ಲ್ ಪಬ್ಬ್‌ವಕ್ ಬಟ್ಟೆ ಮಾಡಿ ತಾತ್‍ೕಂದ್ ಉಳ್ಳ ವಿಷಯ ನಿಂಗಕ್ ಗೊತ್ತಾಂಡೂಂದ್ ನಾನ್ ಆಸೆ ಪಟ್ಟಂಡುಳ್ಳ. 13 ನಾನ್ ಯೇಸು ಕ್ರಿಸ್ತಂಡ ನಲ್ಲ ಸುದ್ದಿನ ಎಣ್ಣ್‌ನಗುಂಡ್ ಕೈದಿಯಾಯಿತ್ ಉಳ್ಳ್‌ಂದ್, ಮುಕ್ಯವಾಯಿತ್ ಇಲ್ಲಿ ವಾಸ ಮಾಡಿಯಂಡುಳ್ಳ ಅರಮನೆರ ಎಲ್ಲಾ ಸೇವಕಂಗಕ್ ಪಿಂಞ ಇಲ್ಲಿಯತ್‍ರ ಜನಕ್ ಚಾಯಿತೆ ಗೊತ್ತುಂಡ್. 14 ನಾನ್ ಇನ್ನನೆ ಕೈದಿಯಾಯಿತ್ ಉಳ್ಳಗುಂಡ್, ಯೇಸುನ ನಂಬ್‍ನ ಸುಮಾರ್ ಅಣ್ಣತಮ್ಮಣಂಗ ದೇವಡ ವಿಷಯತ್‍ನ ಒರ್ ಪೋಡಿಯು ಇಲ್ಲತೆ ದುಂಬ ನಂಬಿಕೇಲ್ ದೈರ್ಯವಾಯಿತ್ ಎಣ್ಣಿಯಂಡುಂಡ್. 15 ಅಕ್ಕು, ಚೆನ್ನ ಜನ ನಾಡ ಮೇಲೆ ಉಳ್ಳ ಒಟ್ಟೆಕಿಚ್ಚ್‌ಲ್ ಪಿಂಞ ವಿರೋದತ್‍ಲ್ ಯೇಸು ಕ್ರಿಸ್ತನ ಬೋದನೆ ಮಾಡಿಯಂಡುಂಡ್, ಆಚೇಂಗಿ ಚೆನ್ನ ಜನ ಸತ್ಯತ್‍ಲ್ ನಲ್ಲ ಮನಸ್ಸ್‌ಲ್ ಬೋದನೆ ಮಾಡಿಯಂಡುಂಡ್. 16 ಅನ್ನನೆ ಮಾಡ್‌ವಯಿಂಗ ನಾನ್ ಕ್ರಿಸ್ತಂಡ ನಲ್ಲ ಸುದ್ದಿನ ಎಣ್ಣ್‌ವಕ್ ದೇವ ನನ್ನ ನೇಮಿಚಿಟ್ಟಿತುಂಡ್‍ೕಂದ್ ಗೊತ್ತಾನಗುಂಡ್ ಪ್ರೀತಿಲ್ ಎಣ್ಣಿಯಂಡುಂಡ್ 17 ಆಚೇಂಗಿ ಚೆನ್ನ ಜನ ನಾಕ್ ಇಂಞು ಕಷ್ಟ ಆಡ್‍ೕಂದ್ ನಲ್ಲ ಮನಸ್ಸ್‌ಲ್ ಕ್ರಿಸ್ತನ ಬೋದನೆ ಮಾಡತೆ, ಅಯಿಂಗಕ್ ಲಾಬ ಆಪನೆಕೆ ಕೆಟ್ಟ ಮನಸ್ಸ್‌ಲ್ ಬೋದನೆ ಮಾಡಿಯಂಡುಂಡ್. 18 ನಲ್ಲ ಮನಸ್ಸ್‌ಲ್ ಆಡ್, ಕೆಟ್ಟ ಮನಸ್ಸ್‌ಲ್ ಆಡ್ ಎನ್ನನಾಚೇಂಗಿಯು ಕ್ರಿಸ್ತಂಡ ನಲ್ಲ ಸುದ್ದಿ ಪ್ರಾಚಾರ ಆಯಂಡುಳ್ಳಗುಂಡ್ ನಾಕ್ ದುಂಬ ಕುಶಿ ಆಯಂಡುಂಡ್. ಇಂಞು ಈ ವಿಷಯತ್ ನಾನ್ ಕುಶಿ ಪಡುವಿ. 19 ನಿಂಗಡ ಪ್ರಾರ್ಥನೆ ಪಿಂಞ ಯೇಸು ಕ್ರಿಸ್ತಂಡ ಆತ್ಮತ್‍ರ ಸಹಾಯತ್‍ಲ್ ನಾಡ ಬುಡ್‌ಗಡೆಕ್‌ ಬಟ್ಟೆ ಆಪಾಂದ್ ನಾಕ್ ಗೊತ್ತುಂಡ್. ಕ್ರಿಸ್ತಂಗಾಯಿತ್ ಬದ್‍ಕ್‍ವ ಪೌಲ 20 ಆನಗುಂಡ್, ನಾನ್ ಆಸೇಲ್ ಪಾರಕಾತಂಡ್ ದೇವಡ ಮೇಲೆ ದುಂಬ ನಂಬಿಕೆ ಬೆಚ್ಚಿತುಳ್ಳಗುಂಡ್, ನಾಕ್ ಇದ್ಂಡ ವಿಷಯತ್‍ಲ್ ಞಾಣ ಆಪುಲೆ, ಅದ್ಂಡ ಬದ್‍ಲ್ ನಾನ್ ಮಿಂಞ ಇಂಜನೆಕೆ ಇಕ್ಕಲು ಯೇಸುರ ವಿಷಯತ್‍ಲ್ ದೈರ್ಯತ್‍ಲ್ ಇಪ್ಪಿ. ನಾನ್ ಬದ್‍ಕ್‍ಚೇಂಗಿಯು ಚತ್ತತೇಂಗಿಯು ಯೇಸು ಕ್ರಿಸ್ತನ ಮಹಿಮೆ ಪಡ್‍ತ್‍ವೀಂದ್ ನಾಕ್ ನಂಬಿಕೆ ಉಂಡ್. 21 ನಾನ್ ಬದ್‍ಕಿಯಂಡುಳ್ಳೇಂಗಿ ಅದ್ ಕ್ರಿಸ್ತಂಗಾಯಿತ್, ಚತ್ತತೇಂಗಿ ಇಂಞು ನಾಕ್ ನಲ್ಲದ್. 22 ಬದ್‍ಕಿಯಂಡುಳ್ಳೇಂಗಿ ಕ್ರಿಸ್ತಂಗಾಯಿತ್ ಇಂಞು ದುಂಬ ಕೆಲಸ ಮಾಡಲು, ಆಂಗ್ ಈ ದಂಡ್‍ಲ್ ಏದ್ ಮಾಡಂಡೂಂದ್ ನಾಕ್ ಗೊತ್ತಾಯಂಡಿಲ್ಲೆ. 23 ಎನ್ನಂಗೆಣ್ಣ್‌ಚೇಂಗಿ ಈ ದಂಡ್ ಆಸೆರ ಮದ್ಯತ್‍ಲ್ ನಾನ್ ಚಿಕ್ಕಿಪೋಯಿತುಳ್ಳ. 24 ನಾನ್ ಕ್ರಿಸ್ತಂಡ ಪಕ್ಕ ಪೋಪದೇ ನಾಡ ಬಲ್ಯ ಆಸೆ, ಆಚೇಂಗಿ ನಾನ್ ನಿಂಗಕಾಯಿತ್ ಬದ್‍ಕಿತಿಪ್ಪದೇ ನಲ್ಲದ್. 25 ನಾಕ್ ಇದ್ ಚಾಯಿತೆ ಗೊತ್ತುಳ್ಳಗುಂಡ್, ನಾನ್ ನಿಂಗಕಾಯಿತ್ ಕಂಡಿತವಾಯಿತ್ ಬದ್‌ಕಿತ್, ನಿಂಗಡ ಕೂಡೆ ಇಂಜಿತ್ ನಿಂಗ ಮಿಂಞಕ್ ಪೋಪಾನ ನೋಟಿತ್, ನಿಂಗಡ ಕುಶೀರ ನಂಬಿಕೆ ದುಂಬ ಆಪನೆಕೆ ಸಹಾಯ ಮಾಡ್‌ವಿ. 26 ಅನ್ನನೆ ನಾನ್ ಇಂಞೊಮ್ಮ ಬಪ್ಪಕ, ನಾಡ ಮೂಲಕ ಯೇಸು ಕ್ರಿಸ್ತ ಮಾಡ್‍ನ ಕಾರ್ಯತ್‍ನ ನೋಟಿತ್ ನಿಂಗ ಯೇಸು ಕ್ರಿಸ್ತಂಡ ವಿಷಯತ್‍ಲ್ ಇಂಞು ಹೆಮ್ಮೆ ಪಡ್‌ವಿರ. ಪರಲೋಕತ್‍ರ ಪ್ರಜೆಯಾಯಿತ್ ಬದ್‍ಕಂಡು 27 ಎಲ್ಲಾಕಿಂಜ ಮುಕ್ಯವಾಯಿತ್, ನಿಂಗ ಯೇಸು ಕ್ರಿಸ್ತಂಡ ನಲ್ಲ ಸುದ್ದಿಕ್ ಯೋಗ್ಯವಾಯಿತ್ ಎಲ್ಲಾ ರೀತಿಲು ನಲ್ಲದಾಯಿತ್ ಪರಲೋಕತ್‍ರ ಪ್ರಜೆರನೆಕೆ ಬದ್‌ಕಿತ್ ಕಾಟಂಡು. ಅಕ್ಕ, ನಾನ್ ಬಂದಿತ್ ನಿಂಗಳ ಕಂಡತೇಂಗಿಯು ಅಥವ ಬರಿ ಕ್‍ೕಟತೇಂಗಿಯು, ಒರೇ ಆತ್ಮ ಪಿಂಞ ಒರೇ ನೋಕತ್‌ಲ್ ನಲ್ಲ ಸುದ್ದಿರ ನಂಬಿಕೆಕಾಯಿತ್ ಒಮ್ಮಕೆ ಪೋರಾಡಿಯಂಡುಳ್ಳೀರಾಂದ್ ನಾಕ್ ಗೊತ್ತಾಪ. 28 ನಿಂಗ ಶತ್ರುವಕ್ ಏದ್ ರೀತಿಲು ಬೊತ್ತತಿ, ಎಕ್ಕಾಲು ದೈರ್ಯತ್‍ಲ್ ಇರಿ, ಅದ್ ಅಯಿಂಗ ನಾಶ ಆಪಕ್ ಗುರ್‌ತಾಯಿತ್ ಇಪ್ಪ. ಆಚೇಂಗಿ ನಿಂಗಕ್ ದೇವನಗುಂಡೇ ರಕ್ಷಣೆ ಕ್‍ಟ್ಟುವ. 29 ನಿಂಗಕ್, ಯೇಸು ಕ್ರಿಸ್ತಂಡ ಮೇಲೆ ನಂಬಿಕೆ ಬೆಪ್ಪ ಬಾಗ್ಯ ಮಾತ್ರ ಅಲ್ಲ, ಅಂವೊಂಗಾಯಿತ್ ನೊಂಬಲ ಎಡ್‍ತವಕೂ ಬಾಗ್ಯ ಕ್‍ಟ್ಟ್‌ಚಿ. 30 ಈ ಪೋರಾಟತ್‍ಲ್ ನಂಗೆಲ್ಲಾರು ಕೂಡೆ ಉಂಡ್. ನಾಕ್ ಇಂಜ ಪೋರಾಟತ್‍ನ ನಿಂಗ ಕಂಡಿತುಳ್ಳಿರ, ಇಕ್ಕಲು ನಾನ್ ಅದ್ಂಡ ಮದ್ಯತ್‍ಲ್ ಉಳ್ಳ್‌ಂದ್ ನಿಂಗಕ್ ಗೊತ್ತುಂಡ್. |
© 2017, New Life Literature (NLL)