TOBIT 9 - BUKUIT NE TILIIL Sireet ne Dutero Kanon

Keweegu robiinik

¹ Ki kuur anyun `Tobias Raphael ak koleenji,

² “Tupchet Azariah, imut kiboitiinik ang'wan ak ikwer tambeesik aeng' ak obe agoi Rages. Oba kootap Gabael, igoochi ineendet sireetap kayanjinet si kogoonin robiinik. Ak imutu ineendet obwa tugul igoortap katunisyet.

³ Ingen inyee ile iite peetuusyek kwandanyu, ak ngot kota atebi agot peetuut agenge ko imuuchi koiimak ineendet miising'.

⁴ Kaibaoryan agobo kayasyet ne kagoyasyeiwo Raguel, ak ma muuchi abut kayasyaennyi.”

⁵ Ki pa Raphael kobooto kiboitiinik ang'wan kokweryei tambeesik aeng' agoi Rages eng' Media ak kotebi kobooto Gabael. Ki igoochi `Raphael ineendet sireetap kayasyet ak komwachi ineendet koleenji kogotunis Tobias weeriitap Tobit ak koguurchin inee igoortap katunisyet. Ki ng'eet anyun Gabael ak koiityi ineendet lolotinwek che po robiinik komi ko ratotiin komyee; ak koratyi robiinichooto tambeesik.

⁶ Eng' peetuut ne kisubu, ko king'eetyo tuwai kota ko karon ak koba igoortap katunisyet. Ye kingo it kootap Raguel ko kinyoor Tobias koamisye eng' meset. Ki ng'eet eng' chokyinet ak kogat Gabael koriirei; ak ki iberuur ineendet eng' ng'aleechu, “Inyee weeriit ne myee ak ko taagunot ne po kwanda ne myee ak ko teegisoot, ne po iman ak ko aiyeep! Ingogoon Kiptaiyat kaberuretap kipsengwet, kogoonin inyee ak osotyong'ung', ingogoochi kwanda ak kametap osotyong'ung'. Iberuurot Kamuktaindet, amu ageere eng' Tobias atebeet nooto myee ne tinyei tupchennyu Tobit.”