TOBIT 8 - BUKUIT NE TILIIL Sireet ne Dutero Kanon

Koonei `Tobias oindet

¹ Ye kingo tar koamisyei ak koeeisei ko kimach komuny; kimut `icheek weerooto ming'in ak koboorchi koot ne ruei.

² Ki ibwaat anyun Tobias ng'aleegap Raphael. Ki inem koet ne po njiryoto ak muguleldo eng' loolet ole kigainde ak konde paragutap kegenganik che po nyamdutik.

³ Ki kirinda oindet `ng'uunetap njiryot ak koyai oindonooto komwechi tabanwek che looen che po Misiri. Ago ki isup `Raphael ineendet, ak korat kochookyi eut ak keeldo eng' olooto.

Saaetap Tobias

⁴ Kingo manda sigiik ak koger kurgeetap koot ne kirue, kong'eet Tobias eng' itoogut ak koleenji Sarah, “Chepkamennyu, ng'eet, ak ingesaa kesoom Kiptaiyandennyo si koboorwech rireenet ak chametapkei.”

⁵ Ki ng'eet anyun Sarah, ak ki toi icheek tuwai kosa ak kosoom koek che riibootin. Ki toi Tobias kosa kole: “Itororoot inyee, Ee Kamuktaindetap kwanisyekyok, ak iberuurot kaineng'ung' eng' ibinwek tugul koigeny. Ingoberuurin kipsengwet ak ng'wony komugul koigeny.

⁶ Ki iyai Adam, ak agobo ineendet ko ki iyachi kwondonyi Awa koek ne toreti ak ko tiei. Ki kobiit piik tugul kobun icheek aeng', Ki imwa ile, ‘Ma myee kotep chii ineegei; ngeyachii toretindet ineendet ne kergei ak ineendet.’

⁷ Amuti anyun nguno kwonyi tilya koek nenyu, ma amu mageetap poorto ago eng' muguleldo ne po iman. Koonech acheek tuwai kenyooru rireenet asi keegitu ak keyoosegitu kibagenge.”

⁸ Ak ki mwa tuwai kole “Iman, Iman.”

⁹ Ki pa anyun koruiyo kemounooto. Ago king'eet Raguel ak koguur kiboitiinikyik, ak ki pa icheek ak kobal kererit,

¹⁰ amu ki ibwaat kole, “Imuuch kome ineendet ak keigu che ki roorechin ak che kichotei.”

¹¹ Ye kingo tar kobalei kererit, kwo Raguel koonnyi ak koguur kwondonyi, ak koleenji,

¹² “Iyookte age eng' cheplagok kwo ko si kogeer ngo ta kosabei Tobias. Ago ngot ko kagome, ketup ineendet ko manai chii.”

¹³ Ara ki iyookto `icheek cheplakwet konaam tait ak koyaat kurgeet: ak kingwo ko oriit ineendet konyoor icheek tuwai komi rwondo ne nyigiis.

¹⁴ Komong' anyun cheplakwet ak komwachi icheek koleenji sabei ineendet ak tomo konyoonji kiy ne ya.

¹⁵ Ki itoroor `icheek Kamuktaindetap kipsengwet, ak ki le Raguel, “Iberuurot inyee, ee Kamuktaindet, kobooto kaberuret age tugul ne myee; ingolasun cheguuk tugul che lewenotin. Ingolasun icheek koigeny.

¹⁶ Iberuurot inyee amu kaigonon abaibait, mata konyoonjo kiy ne ya ko uu ye kogabwaat, ago ka iyaiywech ko uu rireeneng'ung' ne oo.

¹⁷ Iberuurot inyee amu kaiboorchi riirge lagok aeng' che icheegei. Iboorchin rireenet icheek, ee Kiptaiyat, ak iriip kotebi komye, igoochin sabeennywa konyoor yametapkei eng' poiboiyet ak riirge.”

¹⁸ Ki ng'at anyun kiboitiinikyik kotup keriinget koma eech emet.

Igoortap katunisyet

¹⁹ Kogaibata niito kosoom `Raguel kwondonyi kochop magatinik che chaang'; ak ki wo ineendet ole mi akweet ak koget kiruugik che mengechen aeng' ak mengichik ang'wan ak kong'at kole keeny. Ara ki inaam kochobok agobo igoorto.

²⁰ Ki kuur anyun `ineendet Tobias ak kole koyasyechi ineendet eng' ng'aleechu: “Mewendi eng' yu agoi itar peetuusyek taman ak ang'wan ago itebye iamisye ak ieeise kobooto; ak ii paibai cheptonyu ne kogoimak.

²¹ Ko kagobata niito, agoonin iip kebebertap mogornatennyu ak iweege oldap kwandang'ung'. Ye tuun kagilil anee ak osotyonnyu ko kebeberta age ne po mogornatennyu ko tuun punjinok. Lakweennyu, nyiganitu! Kobooch nguno ko aa kwandang'ung' ak Edna ko kamenng'ung', ak ki sigiiguk ko uu ye ki sigiigap osotyong'ung' nguno ak koigeny. Nyiganitu anyun, ee lakweennyu.”