TOBIT 2 - BUKUIT NE TILIIL Sireet ne Dutero Kanon

¹ Ye kingo laitornatetap Esarhaddon ko kiwege kaa, ak kewekwo kwondonyu Annah ak weeriinnyu Tobias. Ye kingo igoortanyo ne po pentekosti, ne nooto ko igoortap kamanuut ne po wigisyek, ko ki kichobwo amitwogik che anyiny ak ki aa tagur si aam.

² Ye kingo kagechop meset ak kendaiywo amitwogik eng' chaang'indo, ko ki amwachi weeriinnyi Tobias alenji, “Uui weeriinnyu ak imutu chii age tugul ne inyooru ne nyalili ne po piikyok eng' luulenik eng' Nineveh, ne ineendet koteegisi eng' muguleldonyi Kamuktaindet, asi koamis ineendet kobooto. Ageniin eng' yu agoi iweege.”

³ Ki wo anyun Tobias kocheeng' chii eng' piikyok ne nyalili. Ye kingo kagoweek, kole “Abba!” Ak ki awolu ale “Ang'ni anee ee lakweennyu.” Ki testai komwa kole, “Keero, Abba, kagebar chii agenge nenyo ak kewiirchi ole ki aldaisyen ak kealisyen, ak eng' nguno komi yooto kagome.”

⁴ Ki ang'etyi parak, ak amete amitwogik koma achamcham agot, ak aiste poorto eng' yooto ki alisyen ak kealdoisyen, ak ibande kotebe koot agenge agoi koratarat emet si atup.

⁵ Ye kinga wege, ko ki auungei ak aam amitwogikyuk eng' arageneet.

⁶ Ak ki abwaat maonateetap Amos, ole ki itechindo Bethel, “Kiwalei igoorwekwok koek aragenosyek, ak tyenwogikwok tugul koek riirek.” Ak ki ariir.

⁷ Ye kingo kagororokto asiista, ko ki amande saang' abal kererit ak atup ineendet.

⁸ Ago king'eetyo piikyuk che po kook ak kororiso koleen, “Ogeer ni oo! Ma koywei kogeny! Kichilile meet atkinye ko yaei ko uu nooto kora. Ki nyoor keljiin ye kingo lapat. Ago nguno ko orani kagetyi koyai ko uu nooto!”

Koegu Tobit kipkoratya

⁹ Ki aweege eng' koskoleng'unooto ak yeityo awe auungei eng' serem ko katiegei ng'ootweet. Amu ki oo maat miising' ko maatuch kotogoch.

¹⁰ Ki ma anai kora ale ki mi chebisook ng'ootweet parak. Ki rorokyi konyekyuk pusagaryekwak ak koyai koma ko keertoi. Ki aweechi chepkerichinik che teer teer, ago ma mi agot agenge ne ki imuuch konyaa. Ki eng' let agor. Eng' kenyiisyek ang'wan koma amuuch ageer kiy. Ki tyem piigap ooreennyu kotareto, ak kiribo Ahika kenyiisyek aeng', yeityo kowechigei emetap Elam.

¹¹ Eng' kasarata, kogeny, ko kinyoor kwondonyu Annah robiinik amu ki sich poisyet ne po kasarta ne nwach; konap ngoroik ko uu kwonyiik alak.

¹² Ki cham koipchin kiptainikyik ngoroik che kiga konap. Eng' pesyet age peetuutap tisap ne po arawet ne kiguuree Dystros nooto ko Pureet, ye kingo kagotil kebeberta ne kiga konap ak koyakyi kiptainik, kogoochi melektonyi, ko ki igoochi arwap ng'oroor.

¹³ Ye kingo it kaa Annah, ko ki toi kouut arwa nooto po ng'oroor. Ki ateebee anyun kwondonyu alenji, “Kabun ano ng'ororyani? Kechore ano? Iweektochi chiitap ko po! Ma myee keam tugun che po choorseet!”

¹⁴ Koleenjo Annah: “Ma uu nooto! Kagigoona ng'orooryani ko konunotyo ketesee melektonyu.” Ago ma ayan anee ng'aleekyik; ki alang'u eng' nereegek agobo kiyooto kiga yai. Ki ang'at ineendet koweekyi chiitap ko po artanooto. Eng' yooto, ko ki wolwo ineendet kole: “Wei anyun! Ngo cham itoreti inyee che nyalildos, anan tos ma uu nooto? Ki koyaun nee poisyoniguk? Ki kogoonin nee!”