TOBIT 13 - BUKUIT NE TILIIL Sireet ne Dutero Kanon

Kogoitoi kongoi Tobit

¹ Komwa anyun Tobit kole: “Itororoot Kamuktaindet ne sabei koigeny, amu tebyei laitornatennyi eng' ibinwek tugul.

² Amu kere kong', ak kobooru rireenet, imuti koba ng'wony ye mi che ki kobek eng' kebeberwegap ng'wony che looen, ak komutu komang'une keriinget ne ma tinyei ole poochin, ak ma mi kiy ne chililee eunekyik.

³ Ee lagogap Israel, omwaite ineendet eng' taitap pororyosyek, amu ki kaiyestachok kwenunnywa.

⁴ Ki iboorwok ooindonyi agot eng' olooto. Otoroor ineendet eng' taitap kiy age tugul ne sabei, amu ineendet ko Kiptaiyandennyo ak ko Kamuktaindennyo; ineendet ko Kwandanyo ak ko Kamuktaindet koigeny.

⁵ Kerook kong' ineendet agobo yaityeng'wong', ago iboorwok okweek tugul rireenet kogeny. Imutwak ineendet omang'une pororyosyek tugul eng' ole ki kiiyestachok.

⁶ Ngot oweekyigei ineendet eng' mugulelwekwok tugul ak saboonwekwok tugul, ak oyai ne po iman eng' tainnyi, ko weekyogei ineendet ama kounye togeennyi eng' okweek.

⁷ Atoroori anee Kamuktaindet, ak paibai saboondanyu eng' Laitoryatap kipsengwet.

⁸ Ngo ng'alaal piik agobo toroornatennyi, ak komwaita agobo ineendet eng' Jerusalem.

⁹ Ee Jerusalem, nganaseet ne tiliil, ki kerin kong' amu poisyonigap euneguk, ago ibooru rireenet kogeny eng' lagogap imanda.

¹⁰ Omwaite Kiptaiyat, amu myee ineendet, ak oberuur Laitoryat ne po ibinwek, ak keteech kogeny eng' inyee emainnyi eng' poiboiyet. Ingobaibai `ineendet icheek tugul che mi kobooten che luulenik, ak kocham icheek tugul che mi kobooten che iimatingei, agoi ibinwek tugul koigeny.

¹¹ Iluuchin lapkeiyet ne oo ole poochin ng'wony tugul; pwonjinin pororyosyek kobunu ole loo, pwonjinin meng'iik che looen che po kebeberwegap ng'wony agobo kaineng'ung' ne tiliil, koibune eunekwak konunoik agobo Laitoryatap kipsengwet. Koonu poiboiyetap kalasunet eng' inyee ibinda agoi ibinda, ak tebyei koigeny kainetap nganaseet ne lewenot.

¹² Chubootin tugul che ng'alaali ng'olyoo ne ya agobo inyee; chubootin tugul che iterteerin ak koluuli inatusyeguk, tugul che iluuli irimosyeguk ak konde maat koorikwok. Ago iberuurotin koigeny icheek tugul che iywein.

¹³ Uui anyun ak ibaibaitune lagogap che po iman, amu tuun ki tuitos kibegenge ak kolas Kiptaiyatap ibinwek che pwanei.

¹⁴ Poiboen icheek che chamin, ak poiboen icheek che poiboenjin poroteng'ung'. Poiboen kora piik tugul che riirtos kobooten agobo usiisyosyeguk; amu tuun poiboi icheek kobooten ak kobaoryan tugul agobo toroornateng'ung' koigeny.

¹⁵ Itoroori saboondanyu Kiptaiyat, Laitoryat ne oo!

¹⁶ Amu tuun kiteeche Jerusalem koek koonyi kobunji ibinwek tugul. Tuun abaibaitu ne tya ye tuun piit ne kasap eng' che ki ng'et che po ooreet, kogeer toroornateng'ung' ak komwaita Laitoryatap kipsengwet. Tuun kiteegee kurgotigap Jerusalem koik che kiguure sappire ak emerald, ak keteegee inatusyek koik che po kamanuut. Tuun kiteegee `thahabu teeksosyek che kooen che po Jerusalem, ak keteegee `thahabu che karaaran irimosyek che torooreen ng'wony. Tuun kichiiti komyee ortinwek che mengech che po Jerusalem kobooto berulo, koita ne piriir mindeiywo ak koigap Ophir.

¹⁷ Tuun tyendos kurgotigap Jerusalem tyenwogigap poiboiyet, ak kowaakyo koorikyik tugul kole, ‘Halleluyah! Iberuurot Kamuktaindetap Israel!’ Ilasu kainet ne tiliil icheek che iberuurotin koigeny ak koigeny.”