Efesian 3 - E Nevi Viasta o Psalmo 2004 (Maximoff - Kalderaš)

So trubul te kerel o Paul te kerel mištimos kudalenge kai nai Židovuri

¹ Pala kudia, me o Paul, o řobaš pala o Kristo tumenge kai či patian.

² Tume sikilian e butji kai o Del dias man peske mištimasa te kerel tumenge.

³ Si ke sas mange sikado ke me žianglem e čudenia pe savi me avilem te ramosarav ande tsiřa vorbi.

⁴ Kana gjinena, šai gindin tume sode si ma godji katar e čudenia le Kristoski.

⁵ Či sikadili kudia ka le šiave le manušenge ande le kaver vitsi, sar sikadiol akana katar o Duxo ke le svintsi apostoli ai ka le profeturi le Kristoske.

⁶ Kudia čudenia, si ke kudala kai či patian si amensa, keras ferdi jekh stato, ai ažiukeras so phendias amenge o Jesus Kristo katar e Laši Viasta.

⁷ Man thode ma ministero katar e Laši Viasta katar o mištimos le Devlesko, kai si mange dino anda peski putiaria.

⁸ Mange, kai sim o mai tsinořo anda le svintsi, kudo mištimos sas dino te phenav kudalenge kai či patian le barvalimata kai či žianen katar o Kristo.

⁹ Ai te thav ande e vedaria so vo kerela katar e čudenia garadi anda sa le vrami katar o Del kai kerdias sa le dieli.

¹⁰ Eta ke kudala kai porončin ai le bare ande le thana le čereske te žianen adies katar e Khangeri sa e godji le Devleski.

¹¹ O Del kerdias kadia sar vo kamlias sakda katar o Jesus Kristo amaro Baro,

¹² ande kaste si amen, katar o patiamos ande leste, o slobodimos te pašiovas paša o Del bi darako.

¹³ Kadia me mangav tumen te na daran pala muře baiuri pala tumenge; von si tumaro vestimos.

E dragostia le Kristoski

¹⁴ Anda kudia, me dav čanga angla o Dad,

¹⁵ kastar tsirdel pesko anav sako familia ande o čeri ai pe e phuv,

¹⁶ eta te del tumen, sar si o barvalimos lesko vestimasko, t'aven zurales zuriarde katar lesko Duxo andre ande tumende.

¹⁷ Kadia ke o Kristo te bešel ande tumare ile katar o patiamos; eta t'avel ande tumende e vuna ai o fundo katar o kamimos,

¹⁸ te tume te šai hatiaren sa le svintsonsa so si o buvlimos, o barimos, o andre ai o opre,

¹⁹ ai te žianen o kamimos le Kristosko, kai si mai but sogodi tume žianen, kadia ke tume t'aven pherde ande sako diela ande o Del.

²⁰ Eta, ka kudo kai šai kerel sa, katar e zor kai si ande amende, but mai but anda sa so ame mangas vai gindisavas,

²¹ leske t'avel e vestia ande e Khangeri ai ande o Jesus Kristo, ande sa le vitsi, berš beršestar! Amen!