१ तिमोथि INTRO1 - जुम्लीकिताबको राइनपैचान तिमोथि लुस्त्रा भुन्न्या सहरका एक जुना तुन्नेरि ठेटा छिया। तिनुकि आमा यहुदि जातिकि र बाबा ग्रिक जातिका छिया। प्रचारको काममै तिनि पावलस्हातै हड्डाछिया र उनुकन सहयोग गद्दा छिया। तिमोथिकन यइ पैलो चिठिक पावलले मुख्य कुडाको वास्ता गरि लेख्याछुन्। यइ चिठिक स्हबैभुन्दा पैला मन्डलिमै भया झुटा सिच्छ्याको बिरुद्दमै होसियार रन लेख्या। यइथो झुटो सिच्छ्या यहुदि कुडा मान्न्या र अरुजातिहरुका स्हुचाइ स्हातै मिस्सियर बनाया झुटो बिसासमै रया सिच्छ्या हो। यइ सिच्छ्याको मुख्य कुडाहरु यइथा छिया, जैथै यइ सुन्सार पापले भरियाछ। मान्ठले जबस्हुम्म गुप्तमै भया ग्यान पाउँदैन, कोइ कोइ खान्याकुडाहरु इन्कार गद्दैन, भ्या गद्दैन तबस्हुम्म तेइले मुक्ति पाउँदैन। यइ चिठिकमै मन्डलिमै क्यारि सासन गन्नुपड्छ, कैथो सेबा गन्नुपड्छ, ताँइका अगुवाहरु र तिनुहरुकन सहयोग गन्न्याहरुको चालचलन कैथा हुनुपड्छ, तिँ स्हबै अत्तिहरु दियाछ। उन्तिम्मै तिमोथिकन बिसासिहरुले मन्डलिको लेखि तिनुको गन्नु पड्न्या कामका बार्यामै र क्यारि इसु ख्रिस्टको राम्मो सेबक बुन्या भुनि स्हल्ला दियाछ। छोटो सुचि राइनपैचान १:१-२ मन्डलिका बार्यामै र दानका बार्यामै अत्तोहरु १:३—३:१६ तिमोथिकन तिनुको कामका बार्यामै अत्तोहरु ४:१—६:२१ |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.