फिलिप्पी 4 - जिरेलयेशू ख्रीष्ट मिओनगी चुक खिता फाप्कीते 1 बात दोक दोक ईन्देकी ङिङज्येते आज्यो न्वावे, ख्योकोन प्रभु येशूताङ जीउज्यीकराङ ओङाते मि ईन्देकी जस्तो ओङसीनोङ थेला विश्वास खिन देत। ख्योकोन मायेकी ङाला था ख्योकोनला याङराङ नामराङ ठेदोङा सिराच्योक लाकीन सिन्सुङ। ख्योकोनगी लेमु खाबा थोङगीन ङाला आउदी गा लाबा ओत। ङा खुशी ओत। 2 थेमे इयोदियाताङ सिन्तकेला ङा च्यि सिते सासीन ओर्च्ये, खेराङ ङिकाराङ प्रभु येशू मि ईन सिन सम्झे खाला लोक्ला डिक्ला थुन्ला देत। 3 ङात्ताङ डिक्ला ङे च्योकराङ खाला काम खित्कान्ते ङे र्वा खुई थे फेम्मे मि ङिबोला डिक्पा खाला बिन। गा लाङच्येते बात फैले खिताला ङात्ताङ थोङला दुक्पा खाला खाला काम खित्कान्ते मि नाङ क्लेमेण्टताङ ज्येनतेबाकामा मेन, होथे फेम्मे मि ङिबोङ ईन। थेबा गाङे मिन नोमुङ मिसिन्च्येते जुनी ङेत्कान्ते मिओन मिन टिबाते किताबला टिबा ओत। 4 थेमे प्रभु येशूताङ जीउज्यीकराङ ओङाते मि ईन्देकी दुक्पा किम्मु जस्तो ओङजीनोङ ख्योकोन जहिलेङ गा खि। ख्योकोन गा खि सिन ङा याङराङ सिओ। 5 ख्योकोन मि गाङेताङ खा छ्येत लेमु खित्कान्ते मि ईन सिन गाङेकी छ्या स्येस्यीत। प्रभु येशू ग्युरला ओङच्ये बेला लेपा खासुङ सिन टोक माज्येत। 6 थेमे छ्याःङ बातलाङ पीर माकेत। पीर मिक्किता खाला बरू दुक्पा किम्मु जस्तो ओङजीनोङ परमेश्वरला प्रार्थना खि। खेराङला च्यि गोकीका थेला नाङ सि। थोक खित्जीन खेराङला लेमु खाबे लाईदु थेला धन्यवाद सिरा नोमुङ टोक माज्येत। 7 थोक थोक खासीन ख्योकोनगी जति बुद्धि खिये खासीनोङ खोबा मुथुप्च्या खाला परमेश्वरगी अचम्ब खाला ख्योकोन सेमला ढुक्क लोङगो। थेकी थोक खानामेई येशू ख्रीष्टताङ जीउज्यीकराङ ओङा ओतेकी ख्योकोन सेमला पीरताङ ताप माफाबो, फाप्सीनोङ थेतेराङ विचार खिन देता माफाबो। 8 थोगी बात चुक सासीन आज्यो न्वावे, ख्योकोनगी लेमुते थेमे खिता ओङच्येते कामताङ बातकीतेकामा विचार खि। चुक सासीन ख्योकोनगी साँचोते बातकामा खित्च्येते, लेमुते कामताङ बातकामा खित्च्येते, अन्याय मिक्किच्येते, मेलेबाते कामताङ बात छ्याःङ मिक्किच्येते, लेमु लाङच्येते थेमे मि सेमला डोच्येते कामताङ बातकीतेकामा विचार खि। 9 गा लाङच्येते बात लोप्जीन ङे खेराङला लापाते खेराङगी थोबाते बात ङेन्गीन देत। ङे चुक चुक खाबा ओताने ख्योकोनगीङ ङे च्योकराङ खि। थेमे सेमला ढुक्क लोङकान्ते परमेश्वर ख्योकोनताङ ङ्योम्बुराङ देत्क्यो। पावलगी पैसे लाईदु धन्यवाद साबाते 10 थेमे ज्येन बात च्यि सासीन काल्बेई तिरी ईन्सीनोङ ख्योकोनगी ङाला सिन लोईन पैसा बिन्गीन ताङदुक। थे ङेत्नामेई गा खिन ङे प्रभु येशूला छ्ये जोबाप। ईन्दाका ख्योकोनगी ङाला मद्धत तेरा माचालाते मेन, ईन्सीनोङ थोक खित्च्येते मौका ङेता मेतान। 11 ङाला दुक्पा ओत, ख्योकोनगी ता फाप्सुङ सिन ङे दि बात खाबाते मेन। ङेनी जस्तो ओङजीनोङ जहिलेङ सन्तो खाईन देता स्येबा ओत। 12 दुक्पा ओङसीनोङ ङा च्यिला दोक ओङसुङा सिन मिसिरो, काल्बेई लेमु ओङजीनोङ सधैँभरि दोकराङ ओङस्यीत सिन मिसिरो। सुबा दुकीन दुकीन सा ङेत्सीनोङ त्वाबा तुक्पाराङ देता फाप्सीनोङ, कहिले दाङगीन ख्योप्कीन किम्मु ङेत्सीनोङ खाँचो फाप्कीन दुक्पा ङेत्सीनोङ, जे ओङसीनोङ जहाँ देत्सीनोङ चुक खाला देता फाप्कीते सिन ङे छ्या स्येबा ओत। 13 जस्तो ओङसीनोङ येशू ख्रीष्टकी ङाला शक्ति तेरच्येते ईन्देकी ङे जेङ खिता थुप्क्यो। 14 बात दोक ईन्सीनोङ ख्योकोनगी ङाला गोबे बेलाला पैसा ताङगीन आउदी लेमु खासुङ। 15 गोमा म्यासिडोनिये लुङबादु गा लाङच्येते बात लाप्ला थेरूई डोजीन ख्योकोन फिलिप्पीदु जम्मा ओङकान्ते येशू ख्रीष्ट मिओन लाःकनापेकीकामा ङे पैसा लाबा ओतान। ज्येन ज्येन ठाउँकी येशू ख्रीष्ट मिओन लाःकनापेईचेन ङे पैसाज्यीगोङ लाबा मेतान। गा लाङच्येते बात लाप्कीन बिन्नामेई ख्योकोनगी ङे कामगी लाईदु सिन दुकीन बिन्दाते पैसाचेन ङे लाबा ओतान। दि बात ख्योकोनगी पक्काराङ टोक ज्येता मेतासीन। 16 ङा थिस्सलोनिकादु ओत्जीनोङ ख्योकोनगी ङाला गोबे बेलाला बाजिताङ बाजि पैसा ताङा ओतान। 17 दि बात खित्जीन ङाराङला पैसा बिन्दाते बातलाकामा मेन, ख्योकोनगी ङाला दोक खाबेकी परमेश्वरगी ख्योकोनला आशी बिन्ला लेमु खिओ सिन ङाला झन गा लाबा ओत। 18 ख्योकोनगी इपाफ्रोडिटस लाःक्तु ताङाते पैसा ङे गाङे ङेत्सुङ। था ङे लाःक्तु ङाराङला गोबा भन्दाङ ल्हाक्पा पैसा ओत। परमेश्वरला भोग बिन्दाते स्येक्जीन खाच्येते ठीमा थेला मन परे खिन ओतान। ख्योकोनगी ङाला ताङाते पैसाङ परमेश्वरला स्यीम्बु लाङच्येते होथे ठीमा च्योक्तेराङ ईन। 19 ङे माने खिन ओताते परमेश्वरताङ ङुरूङगी विचारराङ खिता मुथुप्च्या जेसुकै ओत। थेकीराङ ख्योकोनला गोच्येते जति येशू ख्रीष्ट छ्य्वापेकी पूरो खाला तेरग्यो। 20 ङुरूङ आबा परमेश्वरते सधैँभरि जय जय ओङस्यीत। आमेन। पावलगी चिट्ठी टिला सिन्दे खाला साबाते बात 21 येशू ख्रीष्टताङ जीउज्यीकराङ ओङाते परमेश्वर सन्तान ख्योकोन गाङेला ङेते नमस्ते ओत। दुरू ङात्ताङ ओताते न्वाओनते ख्योकोनला नमस्ते ओत्लो। 22 थेमे देपा ओताते परमेश्वर सन्तान गाङेते ख्योकोनला नमस्ते ओत्लो। थेबे नाङदुङ रोमी गेल्बो दरवारदु ओताते परमेश्वर सन्तानओनते ख्योकोनला काल्बेई नमस्ते ओत्लो। 23 प्रभु येशू ख्रीष्ट ख्योकोनला दया खिन ख्योकोनताङ ङ्योम्बुराङ देत्स्यीत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.