फिलिप्पी 3 - जिरेलख्रीष्टकी खित्सादुकामा परमेश्वरगी ङुरूङला दोषी मेन सिओ 1 थेमे ज्येन बात च्यि सासीन आज्यो न्वावे, ख्योकोन प्रभु ख्रीष्टताङ जीउज्यीकराङ ओङा ओताते मि ईन्देकी गा खि। ङा ख्योकोनला ङे गोमामेई याङ याङ सिन वाबाते बातराङ टिगीन ओत। बातज्यीकराङ याङ याङ टिक्पा फाप्सीनोङ ङाला छ्याःङ दिक्क लाबा मेत। ङे टिबाते बात पढे खाला ख्योकोनगी चुक खिता फाप्च्या ईन्दाका सिन लेमु खाला छ्या स्येक्यो। 2 चुक सासीन मेन्दे बात लाप्ला खेराङला ङ्ये ज्युता छोल्कान्ते मिओनताङ च्याङबो खाला देत। थेबानी मिला फेत्कान्ते कि च्योकराङ मेलेबा ईन। जीउला खतकी चिनु जोला थेबेकी खोपरोङला परमेश्वरगी छाने खाबाते मि ईन सासीनोङ थेबा थोक्ते मि मेन। 3 ङुरूङका परमेश्वरगी छाने खाबाते जीउला खतकी चिनु जोबा ओताते मि च्योक्ते ईन। च्यिला सासीन परमेश्वरला चुक खाला माने खिता फाप्च्येते ईन्दे परमेश्वर आत्मे छ्य्वापेकी ङुरूङ थेला थोकराङ खाला माने खिओ। परमेश्वरला माने खिताला ङुरूङचेन दाक्पोन जीउला खतकी चिनु जोबा ओत थेमे ज्येन ज्येनोङ धर्म कर्म खाबा ओत सिन छ्ये मिक्किओ। बरू येशू ख्रीष्टताङ जीउज्यीकराङ ओङा ओतेकी गा खिओ। 4 सुइँदेकी ङा जीउला खतकी चिनु जोबाते मि ईन थेमे ङे ज्येनोङ धर्म कर्म खाबा ओतेकी परमेश्वरगी ङाला दोषी मेन सिओ सिन छ्ये खिदुक सासीन ङा झन छ्ये खिता थुप्क्यो। थोकराङ बात खिइ सासीन 5 परमेश्वर नियमला साबा च्योकराङ खाईन ङेते केबाते ङीमा गेतकी छोमु जीउला खतकी चिनु जोबाते ईन। ङा इस्राएली नाङ बेन्यामीन थरदु केबाते मि ईन। ङे ज्युज्यु पुर्खा गाङेराङ हिब्रू ईन्देकी ङा झर्राते हिब्रू ईन। थोरूम सिइ सासीन ङा फरिसी पाटी मि ओङगीन थे पाटी मिओनगी खिता फापाच्योक खाला परमेश्वर नियम ङेन्दाला ङे आउदी दुक्पा खाबाप। 6 थोकराङ खाईन येशू ख्रीष्ट मिओनला मासेताला मेङगो सिन ङे खोक्पो खाईन थेबे खेदापानी खाबाप। थेमे परमेश्वर नियम ङेन्च्ये बात तासीन ङाला सुङगीङ दिकी दि दि गल्ती खासुङ सिन सिरा थुप्च्या मेतान। 7 तर ख्रीष्ट सु ईन्दे सिन छ्या स्येनामेकीचेन ङे ङाराङ थोक्ते मि ओता ईन्सीनोङ थेमे परमेश्वर नियम लेमु खाईन ङेन्दा ओता ईन्सीनोङ छ्याःङ काम लै मिक्किच्याक्वा सिन छ्या स्येसुङ। 8 ईन्दाबोङ येशू ख्रीष्टला ङाराङ मालिक ईन सिन छ्या स्येच्येते छेत छ्येते बात ज्येनतोक छ्याःङ मेन्दाक्वा। थोगी ङाराङ चुक्ते ईन्दे, चुक चुक खिन ओताने सिरच्येते बात छ्याःङ काम लै मिक्किच्याक्वा सिन छ्या स्येकीन ङे था थोक्ते बात खिता गाङे ताङाप। ङाराङते होथे गोमे बाततेबा सम्झे खित्जीन ङालानी किक्टो लाङच्येते फोर मैलो च्योकराङ लाकीन था थेते विचारराङ खिता ताङा ओत। ख्रीष्टला पूरो खाला छ्या स्येबा थुप्स्यीत 9 थेमे परमेश्वरगी ङाला ख्रीष्टताङ लेमु खाईन डिगीन देताते थोङस्यीत सिनराङ ङे होथे गोमे बाततेबा विचारराङ खिता ताङाते ईन। परमेश्वर नियम ङेन्गीन धर्म कर्म खाबेकी खित्सादु मेन, बरू ङा ख्रीष्टला विश्वास खित्कान्ते मि ईन सिन थाचेन परमेश्वरगी ङाला दोषी मेन सिन सिओ। च्यिला सासीन परमेश्वरगी मिकी खाबाते काम ताला मेन्देकी ख्रीष्टकी खाबाते काम ताला थेला विश्वास खित्कान्ते मिओनला दोषी मेन सिन सिओ। 10 थोगी ङानी ख्रीष्टला झन लेमु खाला छ्या स्येबा छोल्ग्यो। थेमे थे सोम्बो लोक्पा ओतेकी थेत्ताङ ओताते शक्ति ङेङ ङेत्स्यीत सिन सेम खिओ। थेकी दुक्पा भोगे खाईन थे खोरोङ ज्यानोङ बिन्दा ओतान। थेकी खाबा च्योकराङ खिताप सिन ङाङ ङाराङ खुशी मिक्किता खाला दुक्पा भोगे खिन स्या फाप्सीनोङ नाइँ मिसिरो। 11 था परमेश्वरगी स्याप्ते मिओनला सोम्बो लोक्जीन ङालाङ सोम्बो लोइओ सिनोङ ङेते विश्वास ओत। ङुरूङगी ङेत्च्येते गाङे ङेत्कीन सिन्दा मेत 12 ङे छ्या स्येबा चालाते होथे बातबरी गाङे छ्या स्येकीन सिन्दा ओत थेमे ङाराङगी ङेत्च्येते गाङे ङेत्कीन सिन्दा ओत सिन ङा मिसिरो। थेमे परमेश्वरगी ज्वा चाला च्योकराङ ङाराङ लेमु ओङगीन सिन्दा ओत सिनोङ मिसिरो। येशू ख्रीष्टकी ङाला थे खोरोङ मि जोबा ओतेकी परमेश्वरगी तेरग्यो साबाते इनाम ङेत्च्ये छ्य्वापा ङा थुपासम्म स्येत खिन ओत। 13 आज्यो न्वावे, ङेचेन ङेत्च्येते इनाम गाङे ङेत्कीन सिन्दा मेत सिन साबाते ईन। बत्ते खित्कान्ते मि तिरी ग्युरला माताबा खाला लेपा फाप्सासाक मालेपथुप कस्स्ये खाला छ्योङगीन देताच्योक खाला ङाराङते गोमे बाततेबा छ्याःङ विचार मिक्किता खाला था ङेत्च्येते इनाम ङेत्स्यीत सिन ङाङ काम खिन देत्क्यो। 14 दोक खाला ङा खालि ङाराङगी नाम इनाम ङेदोङा सिरच्ये छ्य्वापाकामा स्येत खिन देत्क्यो। ङे ङेत्च्येते इनामचेन स्वर्गने देता ङेत्च्येते ईन। येशू ख्रीष्टकी खाबाते कामगी खित्सादु परमेश्वरगी ङाला थेने देताला काताङाते ईन। 15 थोगी येशू ख्रीष्टला विश्वास खिन पाको गालातेबा ङुरूङ गाङेराङ ङे थाल्लासाक साबाते बातला डिक्पा फाप्क्यो। ईन्दाका दि बातओन नाङ कोई बात ख्योकोनला दोकराङ ईनरो सिराच्योक लाङगीतासीन। कोई बात ख्योकोनला थोक लासीन थे बात ङे साबा च्योकराङ ईन सिन परमेश्वरगी ख्योकोनला छ्या स्ये ज्युत्क्यो। 16 जे ईन्सीनोङ दाक्पोनगी थातासाक छ्या स्येबाते बात ङुरूङगी टोक मेज्येता खाला देता फाप्क्यो। 17 आज्यो न्वावे, ङाला ताला ख्योकोनगीङ ङे च्योकराङ खि। ङालाकामा ता माफाबो, ङात्ताङ ङे र्वाओनगी च्योकराङ खित्कान्ते सु सु दुका ताला थेबेकी खिता च्योकराङ खि। 18 बातज्यीक ङे ख्योकोनला पालोताङ पालो साबा ओत। थे बात सम्झे खित्जीन ङाला आउदी मेलेबा लाङगीदुक। दि बात ङा लोक्ला सिन ओत। च्यि सासीन ख्रीष्टला विश्वास खित्कान्ते मि ईन सालाङ मि काल्बेईकी ख्रीष्ट स्यिङगी थामला टाँए खाईन स्या फापाते बात छ्याःङ मेन सिराच्योक खाला खोपरोङ खुशी खिन ख्याम्गीदुक। 19 थोक्ते मिओननी तिरी सजाय ङेत्ला नरककुण्डमा स्यूक्पा फाप्क्यो। थेबेकीचेन खालि साच्या थुङच्ये बातताङ खोपरोङला जे खिता सेम लाङगीदुक थेराङ खिदुक। थोक मेलेबा काम खासीनोङ छ्याःङ ङोचा मिक्किता खाला खोपरोङगी आउदी लेमु काम खाबाप सिरा च्योकका खिदुक। थेबेकी खालि दि जुनीला च्यि च्यि गोच्या दुका थेतेकामा विचार खिदुक। 20 ङुरूङचेन स्वर्गने देता ङेत्कान्ते मि ईन। ङुरूङला पापदुकी डेल्कान्ते प्रभु येशू ख्रीष्ट था नामराङ थेनेकी ग्युरला वाओङा सिन ङुरूङ गुकीन देता ओत। 21 ङुरूङ जीउ प्रभु येशू ख्रीष्टकीते सोम्बो लोक्जीन ओताते जीउ च्योक मेत। थोगी ङुरूङ नेइओ, दुक्पा ओङगो थेमे ङुरूङ स्यिनामेई रूल्ला डुइओ। ईन्सीनोङ था प्रभु येशू ख्रीष्ट ग्युरगीन वानामेई थेकी ङुरूङ जीउ थे खोरोङते च्योकराङ लेमु जोइओ। जेसुकैला थे खोरोङ अधीनला ज्य्वाच्येते शक्तिकी थेकी दोक खिओ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.