फिलिप्पी 2 - जिरेलयेशू ख्रीष्टकी च्योकराङ खिता फाप्च्येते बात 1 ख्रीष्टताङ जीउज्यीकराङ ओङनामेई थेकी ख्योकोनला आँट तेरगीन देत्क्यो। थेमे परमेश्वरगी ख्योकोनला ङिङज्ये खित्च्येते ईन्देकी ख्योकोन सेम ढुक्क खाला देता थुप्क्यो। थोकराङ खाला परमेश्वर आत्मेकी खित्सादु ख्योकोन थेत्ताङ ङ्योम्बुराङ डिक्ला देता थुप्क्यो। थेमे ख्योकोनगी खेराङ नाङ पीर फापा ओतातेबाला पीर माकेत सिन सिरच्येते थेमे दुक्पा ङेता ओतातेबाला ताच्येते खिओ। ख्योकोन नाङ बात दोकराङ मेन ओना? 2 थोरूम ख्योकोनगी दोक दोक खासीन ङाला झन गा लाङच्या ओतान। चुक सासीन ख्योकोन गाङेराङ सेमज्यीकराङ खाला डिक्ला देत, दोक्पोईकी ज्येनज्यीकला ङिङज्ये खि, जे खित्जीनोङ लो ङुरूङ दोकराङ खिइ साला डिक्ला खित्च्येते खि। 3 ख्योकोन सुङगीङ च्यि खासीन दाक्पोनला फाइदा ओङगीका थे ताला काम माकेत। ज्येनगी खेराङला मान खित्स्यीत सिरच्ये सेमगी काम माकेत, ङे छेत ज्येनगी खिताराङ मुथुबो सिराच्योक मिक्किता खाला बरू ज्येनला मान खि। 4 खालि दाक्पोनला लेमु ओङच्ये कामकामा माकेत, ज्येनला लेमु ओङच्ये काम खि। 5 दाक्पोन खुशी मिक्किता खाला येशू ख्रीष्टकी चुक सेमगी काम खाबा ओताने ख्योकोनगीङ होथोक सेमगीराङ काम खि। 6 चुक सासीन परमेश्वर जस्तो ईन येशू ख्रीष्टोङ गोमामेईराङ होथोकराङ ओतान, छ्याःङ खुदुक मेतान। परमेश्वरला ताला छ्याःङ खुदुक मेत्सीनोङ थोक्ते हक तोङाला थेकी दुक्पा माने माक्यासुङ। 7 बरू थोक छ्येते हक ताङगीन मि जुनी लाकीन योक्पो च्योकराङ ओङा ओतान। 8 थे ज्येन मि च्योकराङ ओङगीन देता ओतान। परमेश्वरगी साबा साबा ङेन्गीनराङ देत्कीन स्या फाप्जीनोङ थेकी नाइँ साबा मेतान। थोरूम थेलानी मिओनगी स्यिङगी थामलाका टाँए खाईन सेता ओतान। 9 थेकी थोक थोक खाबेकी परमेश्वरगी थेला छ्येज्यीक मान बिन्गीन थे छेत छ्ये सुङ मेत छ्येतेचेन थेराङ ईन, थेकामा प्रभु ईन सासुङ। 10 थोगी स्वर्गने ओतातेबरी ईन्स्यीत, सा लुङबा खाङ ओतातेबरी ईन्स्यीत, स्यिइन सिन्दाते मिओनगी ईन्स्यीत थेमे नरककुण्डमा ओतातेबेकी ईन्स्यीत गाङेकी घुँडा चुला से खिन परमेश्वरगी थोक छ्ये जोबाते येशूला मान खिताराङ फाप्क्यो। 11 थेमे थेबा गाङेकी येशू ख्रीष्टराङ छ्येते ईन, थेराङ प्रभु ईन सिन सिराराङ फाप्क्यो। गाङेकी थेला थोक खाला छ्ये जोला आबा परमेश्वरते जय जय खिताराङ फाप्क्यो। परमेश्वर फुज्युङ फुमुकी चुक खिता फाप्कीते 12 ङिङज्येते आज्यो न्वावे, थातासाक ख्योकोनगी ङे लाःपा कोता च्योकराङ खिन वाबा ओत। ङा ङ्योम्बु ओत्जीन खाबा च्योकराङ खाला ङ्योम्बु मेदेत्जीनोङ ङे लाःपा कोताते झन लेमु खाला ङेन्गीन देत। चुक सासीन खेराङ पापदुकी टालाते मि ईन सिराला ख्योकोनगी काम बात जे खासीनोङ परमेश्वरला मन परे मिक्किच्येते छ्याःङ खिता मेङगो सिन ज्यीबा खिन थेला मान खाला लेमुते कामताङ बातकामा खिन देत। 13 परमेश्वरगीराङ खेराङ नाङ काम खित्च्येते ईन्देकी ख्योकोनला थेला मन परे खित्च्येते काम खिता सेम लाङगो। थेमे थेकीराङ ख्योकोनला थोक्ते काम खिताला शक्तिङ तेरग्यो। ख्योकोन थे खोरोङगी ज्वा चालाच्योक लेमु मि ओङस्यीत सिन थेकी होदोक खाला ख्योकोन नाङ काम खिओ। 14 जे खिता फाप्सीनोङ ख्योकोनगी गनगन मिक्किता खाला खि, ङे दोक खिता माफाप्सीनोङ ओङच्या ओतान सिराच्योक खाला छ्याःङ माकेत। 15 होथोक मिक्किता खाईन काम खासीन परमेश्वरगी साबाते मेङेन्दा खाला दाक्पोन खुशी खिन मनपरी खित्कान्ते मिओन नाङ देता ओत्सीनोङ सुङगीङ ख्योकोनला दिबा दोक दोक गल्ती खित्कान्ते मि ईन सिन सिरा मुथुबो, ख्योकोनचेन सेमला मेलेबा मेताते मि ओङगो थेमे ख्योकोन परमेश्वरगी लाःपा कोताते ङेन्कान्ते थे फुज्युङ फुमु ओङगो। दोक खाला ख्योकोनगी दि सा लुङबे मिओनगी चुक खिता फाप्कीते सिन तेन्ला तेरा थुप्क्यो। 16 थेमे नोमुङ मिसिन्च्येते जुनी ङेत्च्येते बात ङेन्दा ख्योकोनगी बान्दा मातोङ। ख्योकोनगी ङे खि साबा च्योकराङ खिन देत्सीन था ख्रीष्ट ग्युरला ओङे छोमु ङे ख्योकोन नाङ स्याप स्याप खाईन दुक्पा खाईन खाबाते काम थाराङ खेरो मागाल्सुङ, ङे थोक खाबाते चुक लेमु ओङसुङा सिन गा खिता ङेत्क्यो। 17 ख्रीष्टला विश्वास खाईन खेराङगी खिन ओताते कामओन ख्योकोनगी परमेश्वरला भोग बिन्दाते च्योकराङ ईन। भोग बिन्दाते लाक्तुराङ थुङच्येते पुङा फापाच्योक खाला ङा ङाराङ ज्यान बिन्ला स्या फाप्सीनोङ ङा खुशीराङ ओत। थेमे ख्योकोन गा खित्जीन ङाङ ख्योकोनताङराङ डिक्ला गा खिओ। 18 थोगी ङा स्या फाप्सीनोङ ख्योकोन गा खि सिन सिओ। ङा ख्योकोनताङ डिगीन गा खाबा च्योकराङ ख्योकोनोङ ङात्ताङ डिक्ला गा खि। पावलगी तिमोथीताङ इपाफ्रोडिटस बात खाबाते 19 थेमे प्रभु येशूताङ प्रार्थना खित्जीन था ङे होत्ताराङ तिमोथीला ख्योकोन ओत्सापा तोङा थुप्कीतासीन सिराच्योक लाबा ओत। थेकी ख्योकोनला ठेत्कीन ख्योकोन चुक दुका सिन लोन खुलानामेई ङा पीर मिक्किता खाला देता ङेत्क्यो। 20 चुक खासीन ख्योकोनला लेमु ओङगीताका सिन ङात्ताङ डिक्ला काम खित्कान्ते मि दुरू तिमोथीकामा ओत। 21 ज्येनतेबाचेन येशू ख्रीष्ट काम खिताला मेन, खालि खोपरोङला फाइदा ओङच्ये छ्य्वापाकामा तेइदुक। 22 तिमोथी थे खोरोङगी खिता फाप्च्येते काम चुक लेमु खाला खित्कान्ते मि ईन्दे सिन ङे ख्योकोनला सिरा माफाप्तासीन। फुज्युङतेकी आबातेताङ डिगीन काम खाबा च्योकराङ खाईन दिकी ङात्ताङ डिगीन ज्येनला गा लाङच्येते बात लापा ओत। 23 था ङाला दुरू जेलदुकी तोङच्याताङ मोतोङच्ये बात छ्या स्येबासात्तु ङा दिला ख्योकोन ओत्सापा तोङामीन। 24 ईन्दानी प्रभु येशूकी था होत्ता ङाराङलाराङ ख्योकोन ओत्सापा गाल्ला ख्योकोनला ठेता खित ज्युत्क्यो सिराच्योक लाबा ओत। 25 थेमे ङाला ङाराङ न्वा इपाफ्रोडिटसला ख्योकोन ओत्सापा ग्युरला तोङा लेमु ईन सिराच्योक लाबेकी ङे दिला थेपा ताङा ओत। दि ङात्ताङ डिक्ला गा लाङच्येते बात लोप्कान्ते थेमे ङाराङ च्योकराङ दुक्पा खाला ज्येनला दि बात लोप्च्येते काम खित्कान्ते मि ईन। ङाला मद्धत खित्स्यीत सिन ख्योकोनगी दिला ङा ओत्सापा ताङा ओतान। 26 दि ख्योकोनबरीला आउदी खाला सम्झे खिन था ख्योकोनला याङराङ नामराङ ठेदोङा सिराच्योक खाईन देता ओतान। थे लाक्तुङ ख्योकोनगी दि खोरोङ नाबाते बात थोदुक्लो सिन छ्या स्येनामेई था ख्योकोन आउदी खाला पीर खिता च्यिन्दा सिन दि आउदी खाईन सुर्ता खाबा ओतान। 27 ईन्दाचेन दि खोक्पो खाईन नाबा ओतान। ङालानी दि सोन्गीतासीन सिराच्योक लाबा मेतान। ईन्सीनोङ परमेश्वर दयेकी दि मास्यिसुङ। ङाला पीरगी लाक्तु पीर माफाप्स्यीत सिन दया खाईन परमेश्वरगी दिला ठाक्पा खाईन बिन्सुङ। 28 दिला ठेत्ला ख्योकोन गाङेराङ गा खिता ङेत्स्यीत थेमे ख्योकोनला गा लानामेई ङाराङोङ पीर खिन देता माफाप्स्यीत सिनराङ ङे होत्ता दिला ख्योकोन ओत्सापा ताङाते ईन। 29 दि थेपा लेप्नामेई गा खिन ख्योकोनगी दिङ प्रभु येशूला विश्वास खित्कान्ते मि ईन सिन दिला लेमु खि। दि थेमे दि च्योक्ते मिओनला ख्योकोनगी मान खि। 30 च्यिला सासीन खेराङ गाङेकी दुरू ङाला मद्धत तेरा मुथुप्च्या ओङगीन ख्योकोन गाङे साटोला ङाला मद्धत खिन ख्रीष्टकी खि साबाते काम खित्जीन दि झन्दै स्या ओतान। |
© 1992 Wycliffe Bible Translators Inc. All rights reserved.
Wycliffe Bible Translators, Inc.