फिलिप्पी 1 - जिरेल1 दि चिट्ठी टिक्कान्ते ङा पावल थेमे तिमोथी ईन। ङ्योकोन येशू ख्रीष्ट काम खित्कान्ते मि ईन। ङ्योकोन दि चिट्ठी फिलिप्पी सारदु ओताते परमेश्वर सन्तानओनला ताकान्तेबे नाङ छ्येते मिओन थेमे थेबाला थोक खिताला मद्धत तेरकान्ते मिओनला टिगीन ओत। थेबालाकामा मेन्देकी दि चिट्ठी येशू ख्रीष्टताङ जीउज्यीकराङ ओङाते परमेश्वर सन्तान ख्योकोन गाङेला टिगीन ओत। 2 ङुरूङ आबा परमेश्वरताङ प्रभु येशू ख्रीष्टकी ख्योकोनला दया खाला लेमु खिनराङ देत्स्यीत। परमेश्वरला धन्यवाद तेरच्येते थेमे प्रार्थना खित्च्येते बात 3 ख्योकोनला सम्झे खाला प्रार्थना खित्जीन जहिलेङ ङा ख्योकोन लाईदु ङे माने खिन ओताते परमेश्वरला धन्यवाद तेरग्यो। 4 ख्योकोन गाङे लाईदु ङा आउदी गा खिनकामा परमेश्वरला प्रार्थना खिओ। 5 ङा च्यिला थेला धन्यवाद तेरगीते सासीन खेराङगी गा लाङच्येते बात ङेन्दा छुरनामेई दि बात ज्येनगीङ छ्या स्येबा फाप्क्यो सिन ख्योकोनगी ङात्ताङ डिगीन दि बात फैले खित्च्येते काम खासुङ। थोक खिता ख्योकोनगी थोरूमसाक ताङा मिन्दुक। 6 ख्योकोन थेकी ज्वा चाला च्योकराङ लेमु ओङस्यीत सिन परमेश्वरगी ख्योकोन नाङ खिताला स्यूबाते लेमुते काम खिनराङ देत्क्यो सिन ङाला लेमु खाला छ्या ओत। येशू ख्रीष्ट ग्युरला ओङे छोमुसाकला थेकी दि काम पूरो खिओ। 7 ख्योकोन विषयला खाबाते दि बात ङे थाराङ खाबाते मेन। ङा ङीन नुप ख्योकोनला सम्झे खिनराङ देत्क्यो। ङा दुरू जेलदु देता ओत्सीनोङ थेमे ङाराङगी लोप्च्येते बात सत्यते ईन सिन बेला बेलाला अड्डादु बयान तेरा फाप्सीनोङ परमेश्वर दयेकी खित्सादुराङ ङे दोक दोक खिता थुपा ओत। ङाला दया खित्कान्ते परमेश्वरगी ख्योकोन गाङेलाङ ङाला च्योकराङ खाला दया खिन ओत। 8 येशू ख्रीष्टकी ङुरूङला खिता च्योकराङ ङाङ ख्योकोनला आउदी ङिङज्ये खिओ। ङाला ख्योकोनला नामराङ ठेदोङा सिराच्योक लाबा ओत। दि बात ङे खेकीकामा साबाते मेन सिन परमेश्वरला छ्या ओत। 9 ङा ख्योकोन लाईदु दोक सिन प्रार्थना खिओ। चुक सासीन ख्योकोनगी खेराङ नाङ झन लेमु खाला ङिङज्ये खिताला थोरूम चुक खिता फाप्कीते, च्यि खिता लेमु ईन्दे सिन परमेश्वरगी ख्योकोनला लेमु खाला छ्या स्ये ज्युत्स्यीत। 10 थेकी थोक खानामेई ख्योकोनगी जुन बेलालाङ च्यि खिता लेमु ईन्दे सिन लेमु खाला डेला थुप्क्यो। थोक ओङनामेकी ख्रीष्ट ग्युरला ओङे छोमु ख्योकोन सेमला मेलेबा मेताते, सुङगीङ दिबेकी दि दि गल्ती खाबा ओत सिरा मुथुप्च्येतेन्दे 11 थेमे परमेश्वरगी खि साबाच्योक खाला लेमुते कामकामा खित्कान्ते मि ओङगो। परमेश्वरगी मान ङेत्स्यीत थेमे थेते जय जय ओङस्यीत सिनराङ येशू ख्रीष्टकी खित्सादु ख्योकोन थोक्ते मि ओङच्येते ईन। ख्रीष्टते गा लाङच्येते बात फैले खिता फाप्च्येते बात 12 थेमे आज्यो न्वावे, ङाला जेलदु ज्याक्पातेनी लेमुका ओङसुङ। ङाला जेलदु ज्याक्नामेई झन काल्बेई मिकी गा लाङच्येते बात थोबा ओत। 13 चुक ओङसुङा सासीन ङे खइँदा मेलेबा काम खाबेकी मेन्गीन ख्रीष्टते गा लाङच्येते बात लापेकीका ङाला जेलदु लुक्पाते दुका सिन दुरू ओताते रोमी गेल्बो मिल्टेरीओनताङ ज्येनोङ मि गाङेकी छ्या स्येसुङ। 14 ङाला जेलदु लुक्नामेई प्रभु ख्रीष्टला विश्वास खित्कान्ते ज्येन आज्यो न्वा काल्बेईकी ज्यीबा खाला देता मेङच्याक्वा सिन आँट ङेता ओत। आँट ङेत्कीन था थेबेकी परमेश्वर बात ज्यीबाराङ मिक्किता खाला लोप्कीदुक। 15 ईन्दानी थेबे नाङ गाङेकी गाङेराङ डिक्ला ख्रीष्टते गा लाङच्येते बात लोप्की सिरच्येते सेमगी खाबाते मेन। थेबा कोईकीचेन मिओन ङे छ्य्वापा लै खासुङ सिन डारगी थे बात लोप्कीदुक। कोईकी थोक खासीनोङ ज्येनतेबेकीचेन लेमु सेमगीराङ दि काम खिदुक। 16 लेमु सेमगी लोप्कानगीचेन ङे अड्डादु बयान तेरजीन थेरू मिओनला गा लाङच्येते बात सत्यते ईन सिन सिराला ङा दुरू जेलदु देता फापाते ईन सिन छ्या स्येबा ओतेकी ङाला मद्धत खिताला थे बात लोप्कीदुक। 17 ङाला डार खाला ख्रीष्टते गा लाङच्येते बात लोप्कान्तेबेकीचेन लेमु सेमगी लापाते मेन। मिओन खोपरोङ छ्य्वापा लै खाला खोपरोङला मान खित्स्यीत सिन थेमे मिओन थेबे छ्य्वापा लै खादुक सिन ङा जेलदु देते लाक्तुङ झन पीर खित्स्यीत सिन थेबेकी थोक खित्च्येते ईन। 18 थेबेकी थोक खाबाते बातला ङाला छ्याःङ चासो मेत। जसकी जस्तो सेमगी लाप्सीनोङ ख्रीष्टते गा लाङच्येते बात मि काल्बेईकी छ्या स्येकीन दुक। ङाला चासो लाङच्येते बात होदिराङ ईन। थोक ओङा थोङनामेई ङालानी आउदी गाका लाबा ओत। ङा थोरूमोङ गा खिन देत्क्यो। 19 च्यिला सासीन ख्योकोनगी ङे लाईदु परमेश्वरला खिन ओताते प्रार्थना थेमे येशू ख्रीष्ट आत्मेकी ङाला मद्धत बिन्देकी था ङेते दि मुद्धा जे ओङसीनोङ ङाला लेमुराङ ओङगो। 20 था याङराङ अड्डादु बयान लिन्जीन ङाला सेत्सीनोङ सोम्बोराङ ताङसीनोङ थातासाक खाबा च्योकराङ खाला हत्तेरिका ङे च्यिला थोक खाताका सिराच्योक लाङच्येते कामताङ बात छ्याःङ मिक्किओ सिन टुङ्गो खाबा ओत। दोक खाला ङाराङला जस्तो ओङसीनोङ सुङताङ ज्यीबा मिक्किता खाला ख्रीष्टते जय जय ओङच्येते कामकामा खिता थुप्स्यीत सिन ङे आश खाबा ओत। 21 ख्रीष्टला मान खितालाराङ ङा सोन्ला देत्क्यो। ङे लाईदु दि जुनीते छ्येते बात दिराङ ईन। स्यिसुङराङ सासीनोङ झन ङाला लेमुराङ ओङगो। 22 ईन्सीनोङ थोरूम सोन्गीन देता ङेत्सीन ङे झन मि काल्बेईला ख्रीष्टते गा लाङच्येते बात लोपा ङेत्क्यो। थोगी स्यिसीन लेमु ईन्दा सोन्ला देत्च्येते लेमु ईन्दा ङे छ्याःङ डेला थुपा मेत। 23 ङे लाईदुनी ङिकाराङ थोजोराङ ईन। ङाराङ बातकामा खिइ सासीन स्यिनामेकी ख्रीष्टताङराङ देता ङेत्च्येते ईन्देकी स्यिसीन काल्बेई लेमु ओङच्या ओतान सिराच्योक लाङगीदुक। 24 लोक्ला ख्योकोन विचार खित्जीनचेन ङा थोरूम सोन्गीन देत्सीन लेमु ईन सिराच्योक लाङगीदुक। 25 थोगी ङेते स्यिच्येते समय थोरूमोङ लेपा मेत सिन ङे छ्या स्येबा ओत। येशू ख्रीष्टला विश्वास खिन ख्योकोन चुक खाला पाको डुइन ड्वा थुप्कीते थेमे झन गा खिन देता थुप्कीते सिन ङे ख्योकोनला थोरूमोङ लोपा ङेत्क्यो। 26 थोक खाईन ख्योकोनताङ ठेत्नामेई येशू ख्रीष्टकी ङाला चुक लेमु खासुङा सिन आउदी गा खिन ख्योकोनगी थेते जय जय खिओ। ख्रीष्टकी लाईदु दुक्पा भोगे खिता मेलेबा मेन 27 था जे ओङसीनोङ ख्रीष्टते गा लाङच्येते बात ङेन्कान्ते मिओनगी चुक चुक खिता फाप्च्येते ईन्दे ख्योकोनगी होथोकराङ खि। च्यि सासीन ख्योकोन गाङेराङ सेमज्यीकराङ खाला डिक्ला देत। ज्येनगी जे सासीनोङ जति दुक्पा बिन्सीनोङ ख्योकोन गाङेराङ डिक्ला खेराङगी ङेन्दाते गा लाङच्येते बात ङेन्गीनराङ देत। ङा थेपा वासीन ख्योकोनगी थोक खिन ओताते ङाराङगीराङ थोङगो, मासुङ सासीनोङ ख्योकोनगी थोक खिन दुक्लो सिन ङे थोबा ङेत्स्यीत। 28 खेराङ विरोध खित्कान्ते मिओनगी ख्योकोनला जति ज्यीबा लाङसीनोङ थेबाताङ छ्याःङ ज्यीबा माकेत। जति दुक्पा तेरजीनोङ ख्योकोनगी गा लाङच्येते बात ङेन्गीन देता थोङजीन थेबेकी ख्योकोनला ग्याला मुथुप्च्याक्वा, दोक खाबेकी था परमेश्वरगी खोपरोङला सजाय तेरग्यो सिन छ्या स्येक्यो। थेमे ख्योकोनगीचेन होथेबेकी च्योक खाला नोमुङ पापकी सजाय भोगे खिता माफाबो सिन छ्या स्येक्यो। 29 परमेश्वरगी ख्योकोनला थे खोरोङ दयेकी ख्रीष्टला विश्वास खित्च्येते मौकाकामा बिन्दा मेत, थेला विश्वास खित्जीन दुक्पा भोगे खिता ङेत्च्येते मौकाङ बिन्दा ओत। 30 गा लाङच्येते बात ङेन्गीन देताला थेमे फैले खिताला थरिङोला ख्योकोनगीङ ङे च्योकराङ दुक्पा खिता फापा ओत। जति दुक्पा ओङजीनोङ ङे चुक खाईन गा लाङच्येते बात लोप्कीनराङ देता ओताने थे ख्योकोनगी थोङातेराङ ईन। ङा थोरूमोङ थोकराङ खिन ओताते बादोङ ख्योकोनगी माथोबाते मेन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.