Markus 3 - Jarawa

Yeso pa ɓǝs a lib wuusyid la Yahudawa

¹ I mǝs maan ki Yeso mud ban ɓeer, she i ko ɓaal nda ban raam la Yahudawa, ɓo maan nga bana ma ɓu'i kyam.

² Ɓoɓaan i bana mak mus ya ɓe sun, ko Yeso ɓi paan ɓǝs si ɓoma ɓuk kyaman ma, i lib Asabar, lib wuusyid la Yahudawa lama, ɓe kumban shap ɓiɓin kun nga muɗi, na i sun bil nzu la Yahudawa ma mud Asabar ra.

³ Yeso shappi ɓoma ɓu'i kyam ma na, “Lwak ɓu jaam i dum koyab ɓo.”

⁴ She Yeso maas ya na, “Mala nzu ɓi yad ɓi su pak i lib ma wuusyid? Ɓi su pak ɓwaɗan gǝr ko ɓiɓin gǝr, ɓi yak mud ko ɓi wal ɓo ɓe wu?” Ama ɓoɓa mwad a sun shap kun ɗa.

⁵ Ɓaas wuli la ya, i dwangal ban la mushi i ki sun ya. Ɓaali suk shangmi la ya, la tǝr ban wak kid laya, she i shappi ɓoma na, “Naat ɓu'u.” Ɓoma yak tiʻi, i naat ɓu'i, ɓu'i kad ka ndii tǝk-tǝk.

⁶ She Farisawa ɓa bana pur i nza, a bwal ban kud kunya la ɓoɓa ki kudtak ɓi rangan Hiridus, i mud woma ye wal Yeso ɓi wu gha.

Bǝlǝn ɓo yu ban Yeso.

⁷ Yeso la ɓoɓa ki bili ɓeer i kun shiim Galili, ɓoɓa bǝl a bana bili.

⁸ Ɓoɓa pur i nzaal Yahudiya la Urshalima la nzaal Edom la dalan sal Urdun la ban ɓa dwangal Taya la Sida yu bǝni ma a wak gǝrɓa i ki pak.

⁹ Lakunla ɓi bǝlǝn ɓoɓa ɓa, gan gaʻaɗi ɓa, she i shappi ɓoɓa ki bili ɓa na, ɓe shik mwala kurlukbiin mwak ɓi.

¹⁰ Ma Yeso mak ɓi bǝlǝn ɓoɓa yidkwanan kum ɓǝs, she ɓoɓa yidkwanan ɗangɗang ki tud ban ɓe kumban yu tuu la yi, a paʻani, ɓi yidkwanan le ɓwar ra.

¹¹ Ɓiɓin kwaʻar la ki sunum Yeso ye ki tuko na nzaal i dumi, a ki ngam, a ki shappi na, “Wu Munɓo la Koǝl na.”

¹² Ama yi ɗak ya na, ɓe gin li dum la ban shap yi yanna ɓa.

Yeso tar ɓoɓa ki bili lum ko rwap

¹³ Takwad wa, Yeso yab i mudtaal, i tuʻul ɓoɓa i yadte bili, she a yu bǝni.

¹⁴ She i tar muntum ɓali lum ko rwap, ɓe nǝk la yi, lakunla ɓi ki tum ya ɓe shap kun la Koǝl.

¹⁵ I dab ban pa nggur kun ban purun ɓiɓin kwaʻar i yid ɓo ɓe.

¹⁶ Ɓo lum ko rwap ɓa na: ɓi Siman ( ma i mak lwak ɓi na Bitrus);

¹⁷ Yakubu ɓola Zabadi la ngy imi Yohana ( ma i mak lwak ɓe na Buwanarjis, mun ɓa la haradu lama).

¹⁸ She Andarawus, la Filibus, la Batolamawus, la Matiyu, la Toma, la Yakubu ɓola Halfa, la Taddawus, la Siman ma ɓoma ngangan,

¹⁹ la Yahuda Iskariyoti ma pa nggur kun Yeso.

Yeso la Ba'alzabul

²⁰ Ma Yeso kad i la, bǝlǝn ɓo raam i bana, she ma yi la ɓoɓa ki bili gha gamban li gǝrliin ɗa.

²¹ Woma ɓi nggali Yeso la ɓi ngyimi wak kun mi, she a ɓeer ɓe buli gha, la a na, “Muɗi pilǝp ma.”

²² She ɓoɓa shik ɓo la nzu la Musa ɓa pur i Urshalima kwad a na, “Ɓiɓin kwaʻar Ba'alzabul koma ɓaal yiɗi! La ngyap la Ba'alzabul rangan la ɓiɓin kwaʻar la yi ki purun ɓiɓin kwaʻar ra.”

²³ She Yeso tuʻul ya i ɓaal sak, i shappe na, “Wake la Shetan ɓi purun Shetan na?

²⁴ Ɓoɓa nzaal ma kun ya sun gus ɗik ɓa, nzaal ma ɓi masak na.

²⁵ Lana ɓoɓa la maan la wal lo la biib ya, ɓoɓa lama ɓi masakna.

²⁶ La wa, lana sheɗan ɓi walyid la ɓiɓin kwaʻar ɓa bili, ban tuko li yuum laama.

²⁷ Mamiin, ɓomaan na gamban ko i ɓaal la la ɓoma nyaɓa ɓi pak nggippi ɓa, she yi la ngyap i taanɗi ɓoma nyaɓa ma, i kud mi, kasa ki pwan gǝrɓa la li .

²⁸ Mi la shap kun mamiin ɗi wun mi, Koǝl ɓi zuɓun mbuk ɓi ɓiɓo i mud ɓǝsǝn kun la ban sang Koǝl ɓa la wun pyang.

²⁹ Ama koyab ɓoma sang Wuus la Koǝl, gusum wa ɓǝsǝn kun li ma badbad na, ka zub mbuk ɓi mud ɓǝsǝn kun li ɓa.”

³⁰ I shap wami, lakunla, a na “Yi gha la ɓiɓin kwaʻar.”

Nggala Yeso la ɓi ngyimi

³¹ Takwad wa, she ɓi nggala Yeso la ɓi ngyimi yu lama yi gha ma. A jaam i nza, la a tum ɓomaan ɓi tuʻuli.

³² Bǝlǝn ɓoɓa nǝk i nzaal dwangal ma yi, she a shappi na, “Nggu la ɓi ngimu gha nza, ye yad ban shap kun la wu.”

³³ Yeso maas ya na, “Yala nggaa, la ɓi ngyama?”

³⁴ She i sun ɓoɓa nǝk a dwangali ɓa, la i na, “Nggaa la ɓi ngyama la ɓi!

³⁵ Koyab ɓoma pak gǝrma Koǝl ɓi yad, yina ngyama ma bid la ma nggalap la nggaa.”