ฟี​ลิบ​พอย 4 - ฉบับอักษรลาว

ເປົາ​ໂລ ຂວິນ ມ່ຽນ

¹ ເຢຍ ເຍີຍ ກໍ໋-ໂຢ໌ວ ອ່າ, ເຢຍ ຕສະເກ້ງ ຮນ້ຳ ໄຫ່, ຈັ໋ງ ໄຫ່ ເມີ່ຍ ບົວ. ເມີ່ຍ ບົວ ປຸນ ເຢຍ ອະເຮນີ້ຍ, ປຸນ ເຢຍ ອອນ-ເຫລາະ ໄຫ່. ທສຽນ ຮນ້ຳ ເຍີຍ ກໍ໋-ໂຢ໌ວ ອ່າ, ຮນັ້ງ ໜ່າຍ ເມີ່ຍ ບົວ ອ໋ອຍ ຕສຸ ເຂົາ ວ້ວນ ຕສ໊ຽວ.

² ເຢຍ ໂທ້! ຢູ​ໂອ​ເດຍ ເຖສົາ ສິນ​ທິ​ເຄ, ເມີ່ຍ ບົວ ອີ ເຕົ້າ ອ໋ອຍ ຕສຸ ເຂົາ ຕສ໊ຽວ ຫອບ ຟິມ ຕົ້ງ ເອີ໋ຍ.

³ ຕສຽບ ຕສົ໊ວະ ຈວັ່ງ ກົງ ໂຕສ໋ວ ເຍີຍ ຕ່ອຍ ອ້າ! ເຢຍ ຢ່າ ໂທ້ ເມີ່ຍ ເຖງ ນ້າຍ ເຕີ໋ຍ ອີ ເຕົ້າ ມເຊັຍ ຕອນ, ເຫວີ່ຍ ຕສຸ ນິ່ນ ບົວ ເຖສົາ ເຢຍ ທຈະ ໂຕສ໋ວ ຄູ້ ຝຽນ ເຍີຍ ກົງ, ແອ໋ງ ມ່າຍ ເຄນ​ເມນ ເຖສົາ ເຕສ່ງ ເອຈ່ຍ ເຍີຍ ຈວັ່ງ ກົງ ໂຕສ໋ວ ເຍີຍ ມ່ຽນ, ຕົ້ງ ມ່າຍ ບົ໋ວ ຝາວ ຈ໊ຽນ ຕສຢັ້ງ ແໝ່ງ ຕານ.

⁴ ເມີ່ຍ ບົວ ອ໋ອຍ ຕສຸ ເຂົາ ຕສ໊ຽວ ເຢ​ຊູ ຕສັ່ນໆ ມ່າຍ ອອນ-ເຫລາະ. ເຢຍ ແອ໋ງ ກ໊ອງ ດສຸ່ນ, ອ໋ອຍ ຕສຸ ອອນ-ເຫລາະ ມ່າະ!

⁵ ອ໋ອຍ ຕສຸ ປຸນ ມ່ຽນ ເຕສັ໊ຍ ຕຸ໊ ເມີ່ຍ ບົວ ໂຕສ໋ວ ໂຮຍ້ວ ສ່ວນ ເຍີຍ ມ່ຽນ. ຕສ໊ຽວ ຢຽມ ຟັດ ອ໊ະ.

⁶ ໄມ້ ຕູ໋ງ ເຫວີ່ຍ ຫາຍ ຫຍູ່ງ ກວ໋າ ໂຮຍ້ວ. ອ໋ອຍ ຕສຸ ເຫວີ່ຍ ຫຍູ່ງໆ ສີ່ ເຕົ໋າ ເກົ໋າ ໂຈ້ວ ທິນ-ຮູ່ງ, ແລ໌ງ ຕສີ້ງ ທິນ-ຮູ່ງ, ເອີຍ ເມີ່ຍ ບົວ ຖຈຽມ ຫລົ່ງ ເຍີຍ ໂທ້ ນິ່ນ ເຖງ.

⁷ ທິນ-ຮູ່ງ ເຍີຍ ແປ້ງ ອອນ, ຕົ້ງ ປ້າມ ມ່ຽນ ຕສູ໊ງ ຮນ້ຳ ໄມ້ ຕສ່າຍ ເຍີຍ ແປ້ງ ອອນ, ຕສ່ຽວ ເປວ ຈ໊ຽນ ເມີ່ຍ ບົວ ເຍີຍ ໂຮຍ້ວ ເຖສົາ ຮນ້ຳ ເຍີຍ ເຈົ໊າ, ເຫວີ່ຍ ຕສຸ ເມີ່ຍ ບົວ ເຖສົາ ກີ​ຕູ່ ເຢ​ຊູ ຈວັ່ງ ແໝ່ງ ຕສຢັ້ງ.

⁸ ເຢຍ ເຍີຍ ກໍ໋-ໂຢ໌ວ ອ່າ, ເຢຍ ແອ໋ງ ກ໊ອງ ເຕີ໋ຍ ເຊດ ເມວີ໌ຍ ຫວ່າ. ຫາຍ ຫຍູ່ງ ຕສຽນ ເຍີຍ, ຫອບ ຕສຸ ທ່າຍ ເຍີຍ, ແປ້ງ ຟິມ ເຍີຍ, ທສີງ-ເດສ່ງ ເຍີຍ, ຫອບ ຕສຸ ຮນ້ຳ ເຍີຍ, ເມ່ງ ເຕົ້າ ຫລົງ ເຍີຍ, ນ້າຍ ເຕີ໋ຍ ຫລົງ ໄຫ່, ຫອບ ຕສຸ ເທສງ ເຍີຍ ຢຽດ ຕສູ໊ງ ອ໋ອຍ ຕສຸ ຕສັ໋ນ ຈ໊ຽນ ໂຮຍ້ວ.

⁹ ເຢຍ ອຈ໋າວ ເມີ່ຍ ບົວ ໂຫະ ລິ໌ວ ຢ່າ ປຸນ ເມີ່ຍ ບົວ ຕຸ໊ ຕສິ໊ບ ເຍີຍ, ຕົ້ງ ເມີ່ຍ ບົວ ໄຮ໌ ເຢຍ ກ໊ອງ, ຢ່າ ປວັດ ເຢຍ ໂຕສ໋ວ ເຍີຍ ຫຍູ່ງໆ, ເມີ່ຍ ບົວ ອ໋ອຍ ຕສຸ ເອີຍ ຈ໊ຽນ ໂຕສ໋ວ. ຮນັ້ງ ໜ່າຍ, ເຖສີຍ ແປ້ງ ອອນ ເຍີຍ ທິນ-ຮູ່ງ ຕສ່ຽວ ເຖສົາ ເມີ່ຍ ບົວ ຢຽມ ອ໊ະ.

ເປົາ​ໂລ ແລ໌ງ ຕສີ້ງ ຟີ​ລິບ​ພອຍ ຈິວ-ປາງ

¹⁰ ຕສ໊ຽວ ປຸນ ເຢຍ ຕສະເກ້ງ ອອນ-ເຫລາະ ໄຫ່ ເຫວີ່ຍ ຕສຸ ແອກ໊ະ ເລົ່າ ເຕີ໋ຍ ມປ່າ ອີ້ ຕສັ່ນ ເມີ່ຍ ບົວ ແອ໋ງ ຈັ໋ງ ເຖົາ ເຢຍ. ເຢຍ ໄມ້ ເຕສີ໌ຍ ກ໊ອງ ເມີ່ຍ ບົວ ໄມ້ ຈັ໋ງ, ເຊ ເມີ່ຍ ບົວ ໄມ້ ມ່າຍ ຖຈັງ ປຸນ ເຢຍ ຮິ້ວ ຮນັ້ງ.

¹¹ ເຢຍ ຢ່າ ໄມ້ ເຕສີ໌ຍ ຮນັ້ງ ນ້າຍ ນໍ ກ໊ອງ ເຫວີ່ຍ ຕສຸ ເຢຍ ຖຈຽມ ຕສຸ ຫາຍ ຫຍູ່ງ. ເຢຍ ໂຫະ ລິ໌ວ ຕສ່ຽວ ຮິ້ວ ຕຸ໊ ໄມ້ ກຸ໊ນ ມ່າຍ ທສ້ຳ ໄຟ ໂຕສະ ເຢຍ ປວັ໊ງ ໂຮຍ້ວ ອ໊ະ.

¹² ເຢຍ ຮິ້ວ ຕຸ໊ ປວັ້ງ ຕັ໋ງ-ໂຕ້ວ ເຍີຍ ຕສຢັ້ງ ໂຫ່, ຢ່າ ຮິ້ວ ຕຸ໊ ປວັ້ງ ມ່າຍ ບ່ຽນ ເຍີຍ ຕສຢັ້ງ ໂຫ່. ເຢຍ ໂຫະ ລິ໌ວ ຕສ່ຽວ ຮິ້ວ ຕຸ໊ ຫາຍ ຕສັ່ນ, ຢຽມ ຫາຍ ເດົາ, ຕຸ໊ ຫຍັ່ນ ເປ໊ວ ໄຟ ໂຮຍ້ວ ເຊຍ ຈ໊ຽນ ຢຽມ, ມ່າຍ ເຕສ່ງ ໄຟ ໄມ້ ເກົ໋າ ຫລົ່ງ, ເຢຍ ປວັ໊ງ ໂຮຍ້ວ ອ໊ະ.

¹³ ກີ​ຕູ່ ປຸນ ເຢຍ ມ່າຍ ທຈະ, ຫຍູ່ງໆ ເຢຍ ຕສ່ຽວ ໂຕສ໋ວ ຕຸ໊ ອ໊ະ.

¹⁴ ມປ່າ ເຢຍ ມ່າຍ ຂວນ ນ່ານ ເຍີຍ ຕສຢັ້ງ ໂຫ່ ເມີ່ຍ ບົວ ເຖງ ເຢຍ, ນ້າຍ ເຊ ຫລົງ ໄຫ່ ອ໊ະ.

¹⁵ ເມີ່ຍ ບົວ ຟີ​ລິບ​ພອຍ ມ່ຽນ ຮິ້ວ ຕຸ໊ ເຢຍ ເຈ໌ຍ ກອນ ຕສຸ້ນ ຄູ້ ຝຽນ, ທສວດ ມາ​ຊີ​ໂດ​ເນຍ ວົ້ວ ຕສັ່ນ ໄມ້ ມ່າຍ ກັ້ນ ນອມ ຈິວ-ປາງ ຝູງ ເຢຍ ຫລົ່ງ ເປັຍ ຫລົ່ງ ທສວດ ເຍີຍ ຍ່ານ, ຂູງ ເມີ່ຍ ບົວ ກັ້ນ ເຍີຍ ຮນັ້ງ.

¹⁶ ເຢຍ ຢຽມ ເທ​ສະ​ໂລ​ນິ​ກາ ວົ້ວ ຕສັ່ນ ເຢຍ ຖຈຽມ ຕສຸ ເຍີຍ ເມີ່ຍ ບົວ ຈຸ໋ຍ ຕ້າຍ ໄມ້ ເຕສີ໊ຍ ຢຽດ ດສຸ່ນ.

¹⁷ ເຢຍ ຢ່າ ໄມ້ ເຕສີ໌ຍ ຂູງ ອ໋ອຍ ຕສິ໊ບ ເມີ່ຍ ບົວ ເຍີຍ ຕສີ້ງ ເຫຍີ່ຍ. ເຢຍ ອ໋ອຍ ເມີ່ຍ ບົວ ເຍີຍ ແຕສ໊ະ-ຕານ ຕຸ໊ ເຫລີ່ຍ ຕສິ້ນ ທສ້ຳ ຈ໊ຽນ ຝາວ.

¹⁸ ເມີ່ຍ ບົວ ຝູງ ຕ້າຍ ເຍີຍ ກະນ້າຍ ເຢຍ ຕຸ໊ ຕສິ໊ບ ດສ້ອຍ ໝີ່ ອ໊ະ, ຕສູ໊ງ ເກົ້າ ທສ້ຳ. ເອ​ປາ​ໂຟ​ດິ​ທັດ ຕໍ້ ເມີ່ຍ ບົວ ຈຸ໋ຍ ເຍີຍ ຕສີ້ງ ເຫຍີ່ຍ ເຖົາ, ເຢຍ ຖຈຽມ ຫລົ່ງ ເຍີຍ ຕສ່ຽວ ເກົ໋າ ເດສ່ງ ອ໊ະ. ເມີ່ຍ ບົວ ເຍີຍ ກະນ້າຍ ເຊ ຮນັ້ງ ເຕສ່ຍ ເຍີຍ ກະນ້າຍ ນໍ, ທິນ-ຮູ່ງ ໄຮ໌ ດາງ ເຍີຍ ຕສ່ຽວ ອະເຮນີ້ຍ ຕສິ໊ບ.

¹⁹ ເຢຍ ເຍີຍ ທິນ-ຮູ່ງ ມ່າຍ ດສ້ອຍ ຫຍູ່ງໆ. ເມີ່ຍ ບົວ ຖຈຽມ ຕສຸ ເຍີຍ ຢຽດ ຕສູ໊ງ, ຕສິ໋ວ ນິ່ນ ມ່າຍ ເຍີຍ ນິ່ນ ຕສ່ຽວ ຫລົ່ງ ກີ​ຕູ່ ເຢ​ຊູ ເຖສີຍ ປຸນ ເມີ່ຍ ບົວ.

²⁰ ບົວ ອ໋ອຍ ຕສຸ ຢຽດ ລິ໌ວ ເທສງ ບົວ ເຍີຍ ຕສັ່ງ ເຕ໋ຍ ທິນ-ຮູ່ງ ເຖົາ ໝ່ານ ໂກ໊ວ ໝ່ານ ຕ່ອຍ. ອາ​ເມນ.

ຈັ໋ງ ກໍ໋-ໂຢ໌ວ ເຍີຍ ຫວ່າ

²¹ ໂທ້ ບົ໋ວ ສຽນ ກີ​ຕູ່ ເຢ​ຊູ ເຍີຍ ຕສວັ໋ງ ມ່ຽນ ເຢຍ ຈັ໋ງ ເຖົາ ນິ່ນ ບົວ. ເຖສົາ ເຢຍ ຢຽມ ນ້າຍ ເຍີຍ ຕສວັ໋ງ ກໍ໋-ໂຢ໌ວ ຢ່າ ຈັ໋ງ ເຖົາ ນິ່ນ ບົວ.

²² ຢຽດ ຕສວັ໋ງ ສຽນ ກີ​ຕູ່ ເຍີຍ ມ່ຽນ, ເຫລ່ງ ເຈີ໊ຍ ໂລ​ມາ ຮູ່ງ ເຍີຍ ເປຢົ໊າ ຕສົງ ວົ້ວ ເຕີ໋ຍ, ຢ່າ ຈັ໋ງ ເຖົາ ເມີ່ຍ ບົວ.

²³ ໂທ້ ຕສ໊ຽວ ເຢ​ຊູ ກີ​ຕູ່ ເຖສີຍ ເອນ ປຸນ ເມີ່ຍ ບົວ.