نامَه فیلیپی کلیسا را 4 - کتاب مقدس به زبان تالشی شمالی

¹ بَس، اِی چِمِن بِرااِن که از شِمَه نَه خِشیمَه و مُشتاقیمه شِمَه بِوینِم، اِی که شِمَه چِمِن شادی و چِمِن سَری تاجییرونه، اِی عَزیزِن، اِنتَه خِداوندی کا قُرص بِبییَه.

پند، تشویق، دعا

² اِفُودیه کا خواهیشت بَکَردیم و سینتیخی کا خواهیشت بَکَردیم که خِداوندی کا همرأی بِبون.

³ ها، وفادارَه همکار، بَه تِه کا نی پیستِمَه که اِم دِ گِله بانو کمک بِکَری. چوم اَوِن، اَکْلیمِنتُس و اَلباقی همکارون همراه که چَوون نوم دفتر حیاتی دیلَه کا نیویشته بییَه، چِمِن دوشادوش اِنجیلی کاری را، زحمت کَشِشونه.

⁴ همیشه خِداوندی کا شاد بِبییَه؛ هَنی بَواتیم: شاد بِبییِه.

⁵ بِدارَه گِرد بِوینِن شِمَه با ملاحضه آدَمونی اِستیرونه. خِداوند نِزدیکه؛

⁶ هیچی را نِگران مَبییَه، بَلکَم هَر چی کا دعا و مِنَتی نَه، شُکرکَردِه نَه، شِمَه پیستَه اون خِدا نَه بوآجَه.

⁷ خِدا صُلح و سلامتی، که هَر فهمی کا کفاتَرَه، شِمَه دیلون و فیکرون مسیحْ عیسی کا مُحافظت بَکَردی.

⁸ آخِرسَر، اِی بِرااِن، هَر چی که راستَه، هَر چی که حُرمت هِستِشَه و هَر چی که دُرسته، هَر چی که پاکَه، هَر چی که باب دیلَه و هَر چی که قابل پرستشَه، اَگم چاکَه، اَگم پرستشی اِرزِشی هِستِشَه، چِمون درباره فیکر بِکَرَه.

⁹ اَ چیی که بَه مِن کا آموتَه رونَه و بِه دَس وَردَرونَه، دَرَسَرونَه و بَه مِن کا ویندَرونَه، هَیی اَنجام بِدییَه، که خدا صُلح و سلامتی شِمَه نَه بَمَندی.

خِدا تَدارک ویندِه

¹⁰ خِداوندی کا وِر شادیمَه که حِسَه هَنی چِمِن واسی نیگران بَییرونه. راس راسی که شِمَه چِمِن فیکری کا بَییرونه، امّا فُرصتِرون نِبَه.

¹¹ اِمی اِحتیاجی کا نِواجم، چوم آموتمَه که هَر وضعی کا قانع بِبوم.

¹² از نی بَزنیم محتاج بییِه چِنتَه یَه، و هَم بَزنیم نعمتی فَت و فَراوونی کا زِندگی کَردِه چِنتَه یَه. هَر وضع و حالی کا، زِندگی سِرّی کا، سیری و وِشیی اِحتیاجی و محتاجی آموتَمَه.

¹³ هَر کاری بَشایم بِکَرِم، چَیی واسطه نَه که مِن قوّت بَدای.

¹⁴ با اِم حال، لطف کَردِرونَه که چِمِن زَحمَتون کا شریک بیرونَه.

¹⁵ شِمَه نی، اِی فیلیپیان، چاک بَزنیرون که اِنجیلی کاری بنا کا، مقدونیه نَه شییِه پَش، هیچ کلیسایی شِمَه غِیراز دَخل و خرجی کا بَه مِنه شریک نِبَه.

¹⁶ حتی وختی که تَسالونیکی شهری کا بیمَه، شِمَه چِمِن اِحتیاجاتی را کمک ویسا آکَردِرونَه و هَنی ویسا آکَردِرونَه.

¹⁷ نِه اِم که هدیه ویگِتِه دومله بِبوم، بَلکَم ایلَه ثَمَری دومله ایمَه که شِمَه اِعتباری خِدا وَری کا وِر آکَرِه.

¹⁸ شِمَه کُمکِن کامل آرَستینَه چِمِن دَس و چِمِن اِحتیاجی کا نی وِرتَر هِستِمه. حِسَه که شِمَه کمکی که اِپافْرودیتوسی واسطه نَه بَه مِرا ویسا آکَردَرونَه، ویگتَمَه، حسابی تامینیمَه، شِمَه هدیه خوشبویَه عطر و مَقبولَه قِربونی یَه که خِدا راضی بَکَردی.

¹⁹ و چِمِن خِدا، شِمَه گِردِ اِحتیاجاتون طبق اِشتَنِش پُرجلال دولت، مسیحْ عیسی کا بَرطرف بَکَردی.

²⁰ خِدا و چَمَه آسمونی یَه دَده تا هَمیشه و تا اَبَد جلال بِبو.آمین.

آخِرین سلامِن

²¹ گِردِ مقدّسون را مسیحْ عیسی کا سلام آرِساوونه. بِرااونی که مِنه اِستینه، شِمَه را سلام ویسا آکَرِن.

²² گِردِ مقدّسِن اییا کا شِمَه را سلام ویسا آکَرِن، بخصوص کسونی که رومی اِمپراطوری کَ اَهالی کا اینَه.

²³ خِداوند عیسایِ مَسیح فیض، شِمَه روح نَه بِبو. آمین.