نامَه فیلیپی کلیسا را 3 - کتاب مقدس به زبان تالشی شمالی

صالِح بییِه، مسیح راه ایمانی کا

¹ آخِرسَر اِی چِمِن بِرااِن، خِداوندی کا شاد بِبییِه! گِردِ اِم چییون که شِمَه را بَنویشتیم بَه مِرا زحمتی نیشَه، بَلکَم شِمَه اَمنیتی را یَه.

² اَ اِسبه اون کا دوری بِکَرَه! اَ گناه کارون کا دوری بِکَرَه، کسونی کا که خَتنه کَرِده را جِسمی دَوِرِن، دوری بِکَرَه!

³ چوم خَتنَه بییَه، اَمَه ایمونه که خِدا روح نَه پرستش بَکَردیمون، و مسیح عیسی کا فخر بَکَردیمون و چَمَه تَکیَه جِسمی سَر نییَه-

⁴ هَر چَن اَز اِشتَن جِسمی تَکیَه دوعِه را دلیل هِستِمَه. اَگم کسی خَیال بَکَردی که جِسمی تَکیَه دوعِه را دلیلی هِستِشَه، اَز وِرتَر هِستِمَه:

⁵ خَتنَه‌ بییَه هَشتُمین روزی کا، قوم اِسرائیلی کا، بِنیامینی تیر و طایفه کا، عِبرانی یَه خِردَن عِبرانی یَه دَده نَنه کا؛ شریعتی بییِه کا، فریسی؛

⁶ غیرتی کا، کلیسا اَذیت آزار کَرار، صالِح بییِه ای کا که شریعتی کا بومَی، بی‌عیب بیمَه.

⁷ امّا هَر چیی که بَه مِرا نَفعِش اِستبَه، اَیی مسیح واسی ضَرر بِه حساب وَردِمَه.

⁸ راس راسی، از گِردِ چییون اِمی واسی که چِمِن خِداوند مسیحْ عیسی آزونستِه را، گِردِ چییون کا کَفاتَرَه، ضَرر بَزنیم. چَیی واسی نی گِردِ چییون از دَس دوعَمَه و اِمون گِردی هیچ بَزنیم تا چِمِن نفع مَسیح بِبو،

⁹ و چَیی دیلَه کا پیدا بِبوم، نِه چِمِن صالِحی نَه که شریعتی کا بومَی، بَلکم اَ صالِحی نَه که اَز راه ایمان بِه مسیح بِه دَس بومَی، اَ صالِحی که خِدا کایَه و طبق ایمانَه.

¹⁰ تا مسیح و چَیی زِنده آبییِه قدرتی آزونِم و چَیی رَنجون کا شَریک بِبوم، چَیی مرگی کا، چَیی شیوار بِبوم،

¹¹ تا هَر جوری که بِبو مَردَه اون دیلَه کا زِنده آبییِه بِه دَس بواَرِم.

تَقَّلا کَردِه هدفی آرَستِه را

¹² نِه اِم که تا حِسَه اِمون چِمِن شِن کَردَمَه یا کامل آبَیمَه، بَلکَم اِشتَن بَشیم ناری را تا اَیی بِه دَس بواَرِم چوم که مسیحْ عیسی مِن اِشتَن شِن کَردَشه.

¹³ بِرااِن، گَمون نِکَرِم که حَلا اَیی بِه دَس وَردَم بِبو؛ امّا ایلَه کار بَکَردیم، اَ چیی که پِشت سَری کا نوعَه ویر بَرکَرِم و اَ چیی واسی که ناری کایَه تَقّلا بِکَرِم،

¹⁴ تَقَّلا بَکَردیم هَدفی آرَستِم، تا جایزه‌ای بِه دَس بواَرِم که خِدا، چَیی واسی مِن، مسیحْ عیسی کا کَفا را دَخوندِشه.

¹⁵ چَمَه دیلَه کا کسونی که یالَ آدَمی نَه، بَسی اِنتَه فیکر بِکَرِن؛ و اَگم هَر چی کا ایجور دییَر فیکر بَکَردیرون، خِدا اِمی نی شِمَه را آشکار بَکَردی.

¹⁶ اَمَه بَسی هَر چیی که بِه دَس وَردِمونه، عِین هَ، رَفتار بِکَرَم.

¹⁷ اِی بِرااِن، بَه مِن کا سَرمشق بِگِرَه، و شِمَه چِم بِه کسونی بِبو که عِین هَ چیی که اَمَه کا سُراغ دارَه، رَفتار بَکَردین.

¹⁸ چوم که از چِندی کَرَه درباره چَوون شِمَه نَه واتِمَه، و حتی حِسَه نی اِسِرگ ویکَردِه نَه بَواتیم، وِر کَسِن، مسیح صلیبی دِشمنی شیوار رَفتار بَکَردین.

¹⁹ چَوون عاقبت هَلاکتَه. چَوون خِدا چَوون اِشکَمَه و نَنگ‌آوَرَه چیون را فَخر بَکَردین، اَوِن زَمینی یَه چییون درباره فیکر بَکَردین.

²⁰ حِسَه اَمَه آسِمونی شِنیمونه و خِداوند عیسایِ مسیح مُنتظریمونه که ایلَه نجات دَهنده یَه.

²¹ اَ که چَمَه ذَلیلَ بَدنی عوض آکَرِه تا چَیی جَلال گِتَه بَدنی شیوار بِبییَم، اَ قدرتی نَه که اَیی قوت بَدای تا گِردِ چییون اِشتَن فرمانبُردار بِکَرِه.