نامَه فیلیپی کلیسا را 2 - کتاب مقدس به زبان تالشی شمالی

مسیح فروتنی کا سَرمشق گِتِه

¹ بَس اَگم مسیح کا دیلگرمیرونه، اَگم چَیی مُحبت شِمَه تَسلی بَدای، اَگم خِدا روحْ کا رفاقت هِستِرونه، و اَگم میهروونی و دیلَه سوجی هِستِرونه،

² هَم رأی بییِه نَه، هِم محبتی نَه، یَکدیلی و هَم نَظر بییِه نَه چِمِن شادی کامِل آکَرَه.

³ هیچ کاری مَنم مَنم و چِم هَم چِمی نَه مَکَرَه، بَلکَم فروتنی نَه خَلکی اِشتَن کا چاکتَر بِزونه.

⁴ هیچ گِله شِمَه کا فقط اِشتَن مَنفعتی فیکری کا مَبون، بَلکَم خَلکی فیکری کا نی بِبییَه.

⁵ هَ فیکرونی بِدارَه که مسیحْ عیسی داری:

⁶ اَ که هَر چَن خِدا نَه هَم شِکل بَه، دِ دَسی دَنِچیکیستَه خِدا نَه برابر بییِه،

⁷ بَلکَم اِشتَن تِیی آکَردِشه نوکَری شِکلی گِتِشه، آدَمون شبیه آبَه.

⁸ و چوم آدَمون شِکلی شیوار آبَه اِشتَن فروتن کَردِشه و تا بِه مرگ، حتی مرگ صلیبی سَری کا تابع بَه.

⁹ بَس خِدا اَیی بَرک بِلَند آکَردِشه و ایلَه نومی اَیی آدوشَه که گِردِ نومون کا کَفاتَر بَه،

¹⁰ تا عیسی نومی نَه هَر زِنگی قات آبو، آسِمونی کا، زَمینی سَری کا و زَمینی جیری کا،

¹¹ و هَر زَوونی اِقرار بِکَرِه که عیسایِ مسیحْ ’خِداوندَه‘، خِدای دَده جلالی را.

دنیا دیلَه کار نور

¹² بَس اِی عزیزِن، هَتَه که هَمیشه تابِع بَیرونه، حِسَه نِه فقط چِمِن پیشی کا، بَلکَم بَسی وِرتَر، چِمِن نِبییِه کا، شِمَه نجاتی را تَرس و لَرزی نَه عمل بِکَرَه،

¹³ چوم خِدایَه که شِمَه دیلَه کا اِشتَن خشنودی را کار بَکَردی، هَم اِراده کا هَم عَملکردی کا.

¹⁴ هَر کاری بیدون غُرغُر و جنگ و جَدل اَنجام بِدییَه،

¹⁵ تا بی‌ عیب و ساده دیل، و خِدا بی عیبه خِردَن بِبییَه، ناخَلَف و گُمراهَ نسلی دیلَه کا که شِمَه نور چَوون دیلَه کا ستاره اونْ شیوار اِم دنیا کا شَفَق ژَنه،

¹⁶ زِندگی کلامی مُحکم غَم بَرَه تا مسیح آگَردِستَه روزی کا فَخر بِکَرِم که بیخودی ویریتَه نیمَه و بیخودی زحمت کَشَه نیمَه.

¹⁷ حتی اَگم لازم بِبو چِمِن خون ایلَه هدیه‌ای شیوار، شِمَه ایمانی قِربونی را ویکَردَه بِبو، خوشحالیمَه و گِردِ شِمَه نَه شادی بَکَردیم.

¹⁸ و شِمَه نی بَسی هِنتَه خوشحال بِبییَه و مِنَه شادی بِکَرَه.

تیموتائوس و اِپافْرودیتوس

¹⁹ خِداوند عیسی کا اُمید هِستِمه که هِم زودییون تیموتائوسی ویسا آکَرِم شِمَه وَر تا شِمَه اَحوالاتی کا خَوَر دار بِبوم و چِمِن دیل‌ شاد آبو.

²⁰ چوم دِ هیچکسی نیمَه که حَقیقتن شِمَه راحتی فیکری کا بِبو.

²¹ اَوِن گِرد اِشتَن مَنفَعَتی دومله کا اینه، نِه عیسایِ مَسیح.

²² امّا شِمَه بَزنیرون که تیموتائوس اِشتَن اِمتحانی پس دوعَشَه، که چِنتَه مِنه، ایلَه زوعَه ای شیوار اِشتَن دَده نَه، اِنجیلی کاری کا خِدمَت کَردَشه.

²³ بَس اُمیدوارمَه هِنتَه که چِمِن تکلیف روشون آبَه، اَیی ویسا آکَرِم شِمَه وَر؛

²⁴ و خِداوندی کا مُطمئِنیمه که اِشتَن نی اَلبَحَل بومَیم.

²⁵ هِنتَه، از لازِم بَزنیم اِپافْرودیتوسی ویسا آکَرِم شِمَه وَر، کسی که ایی طرفی نَه چِمِن بِرا، همکار و چِمن هَمرزمَه، و ایی طرفی نَه، کسی یَه که شِمَه اَیی چِمِن اِحتیاجاتی بَرطرف کَردِه را ویسا آکَردَرون بَه.

²⁶ چوم که اَ شِمَه گِردی ویندِه را مشتاق بَه و اِمی واسی که دَرَسَرونه مریض آبَه، پَریشونه.

²⁷ راس راسی که مریض بَه و کارا مِریسته. امّا خِدا اَیی رَحم کَردِشه، و نِه فقط اَیی، بَلکَم بَر مِن نی رَحم کَردِشَه، تا چِمِن غَمون سَر ایلَه دییَر غَمی اِضافه آمَبو.

²⁸ بَس از چَیی ویسا آکَردِه را وِرتَر ذوق هِستِمَه، تا هَنی چَیی ویندِه نِه شاد آبییَه و چِمِن غمی کا نی کم آبو.

²⁹ بَس خِداوندی کا، اَیی تمون شادی نَه قبول بِکَرَه و اِنتَه رَه کسون حُرمتی بِدارَه،

³⁰ چوم که اَ، مسیح کاری واسی کارا مِریستِه و اِشتَن جانی خطری کا دَرَفَندِشه تا شِمَه خِدمتی کم و کَسری بَه مِن را جبران بِبو.