HAR'OHUUSE INTRO1 - Biblía Axweesantá Hhohho' ar Mungú 2004Alki/ituú niiná daanduú kitaábuuwihe Alaá Yoshua iwa gwaá', xoorór Israeli aa kumitká Munguú baabi'ii'ín nguwa sluufmiisiya'. Ala nguna geexayé', nee slaqsa'aá munguaá hatlá' ngiri sluufmisuú ayé'. Umuúqo qoomár adoorí ngiwa tleehhiyé', AAKOÓ MUNGÚ gina muúx ar loohír kiwa baali nee xoordaá hatlá'. Qoomár xoorór Israeli bar kaa adoorí wa slahh'eemiís, kari baál nee xoordaá hatlá', inooín nina ki/iyé' amór AAKOÓ MUNGÚ, nee nguri firiné' as ngiwa alee/iisi. Inós giri geeraharusmoó ii ya/aáw. Geeraharusmoodá' kuna báy «har'ohusmo». Har'ohusmoodá' xoorór Israeli gana alee/iís wakuuser'ín ngiwa baaliya'. Aluudae wayda nguri slayé', nee qoomár har'ohusmoodá' iwa slafi, muu sleeme ina kumiít tawa inkihhimúr hooti dír Munguhe. Ala har'ohusmo bira gwá', muu sleeme dír Mungú gan geexáy. Xoorór Israeli ina adoorír hotaatiín de'emaá yaariire. Har'ohuuse bahh'ale a xooro sleémeero gana geeraharaahát, ala har'ohuusér yaariir a tlahh'aá niina gina geeraharaahát. Qoomaadae xoorór Israeli ina hót ar daqooroó tlahhi'i, nee ngaa tsaahhi'iiká inooín niwa wakleeli'iimárár hootiya', nee tawa adór xoorór wák. Asma qoomaadae umuúqo heewo adór sagose i slai gana tleéhh (21:25), asma qoomaadae waawutmo i kaahh. Ala tam adoorihe muu gana intsatsaáhh adór Munguú hariím sluufmisuwo tar AAKOÓ MUNGÚ kilós, nee inooín bir naa inkihhimúr hooti'iiká dirose, inós gin muux. Digir wakeetíngw kitaábuuwí: Muruú aa tleehhaaruumiit ay qoomár Yoshua iwa gwaá' 1:1—2:10 Har'ohuusér xoorór Israeli 2:11—16:31 Muruú dimbadimbé oo aa tleehharuumiit 17:1—21:25 |
The Bible in Iraqw © Bible Society of Tanzania, 2004.
Bible Society of Tanzania