Omafú kú ɔ̄kā kú ipú ɔkpá ā
Ɔkpá nɛ̄ Upɔ́lu tá gé lɛ ācɛ Ufílipāyi nyā wɛ ɔkpá nōó tá fu icɔ́ɔci aflɛ́yí nōó le kwajɛ ajɛ kú Uyúróopu á. Ó yɔ̄ ipu ɔlɛ́ okwúbɔ́ha kú Uróm nēé hī Umasɛdónīya ā. Ó tɔ́kpá nyā eko nōó yɔ̄ agbá ā, ɛpléeko nɛ̄ ɔtū kú nū lɛ unwalu ohígbū ka ācɔ̄lóhɔ́nyɛtá oyúklɔ́ ā bá gé tá ɛlā kú nū. Ɛlā ɛ̄kɛ̄mgbɛ̄ nēé yɔ̄ gē nwū ipú icɔ́ɔci kú Ufílipāyi ā, cɛ̄ lɛ ɔtū kú nū le bīya nɛ̄hi.
Ɔdā ikpíikpó nōo yá ɛ́ɛ nōó tɔ́kpá ā wɛ kóō tá ācɔ̄lóhɔ́nyɛtá kú Ufílipāyi ahínyá ohígbū ɛhi nēé tɛ̄hɔ̄ fu ɔ́ ɛpléeko nɛ̄ aɔ́dā nēe ce ɔ́ ɛgbá kpɛ́mm ā mɛ. Ó bī eko nyā le kɛlā lɛ uwá, gē tū uwā ɔtū kwu ɔtū, gē ka kéē lɔtūlé, nááná nɛ̄ unwalu yɔ̄ gē yá uwā mɛ́mla anú abɔ̄yīnū dúú ā. Ó lɛ abɔ̄ tɛ́yīpɛ̄ lɛ uwá kéē tá iyī uwā wāajɛ bɛ̄ɛka Ujísɔ̄si ā, ikɔkɔ nēé í yɔ́bɔ́ɔ̄cɛ ámāŋ leyīkwu ɔdā ācɛ ā. Ó tū uwā ɛlá kwu ɔ́ ka oyēeyī ōpīyatɔ̄há mla Ohɔ́nyɛtá wɛ ɛhi kú Ɔwɔicō ohígbū koó ményínyi uwā abɔ̄ é lɔtūce ɔ́ ā. Oŋmá lɛ ɛyí nēé le táajɛ lɛ ɛlā uculo ō yá kú ācɛ Ujíyu ŋ́ mā. Ó tɔ́kpá lɛyíkwu éeyē mɛ́mla ɛbɔ́ nɛ̄ Ɔwɔicō gē je lɛ ācɛ nēe yɔ̄ gē pīyatɔ̄há mla Ohɔ́nyɛtá ā.
Ɔkpá nyā bī ɛlā okpɔ́cíí bɛ̄ɛka éeyē, ɔtōōce, opīyatɔ̄há, ɔtōolé nōo yɔ̄ ipú oyēeyī kú ācɔ̄lóhɔ́nyɛtá mɛ́mla ɔtōōce Ɔwɔicō kú uwā wɛ̄ɛcɛ. Ɔkpá ā klla mafú ɛ́gɛ́nɛ̄ icɔ́ɔci kú Ufílipāyi he Upɔ́lu ɔtū lɛ ā.
Aɔ́dā nēe bá ipú ɔkpá ā
Ɛlā ō mafú 1.1-11
Āhɔ̄ kú Upɔ́lu abɔ̄yī nū 1.12-26
Oyēeyī kú Ohɔ́nyɛtá 1.27—2.18
Ɔdā nɛ̄ Upɔ́lu miya ɔtū lɛ Utímōti mɛ́mla Epafrodítɔ̄si 2.19-30
Ahɔ̄ ōpi lɛyíkwu aólɛlā mɛ́mla ɔdōŋmɔ́cɛ glá 3.1—4.9
Upɔ́lu mɛ́mla ācɛ Ufílipāyi, aóklóbīya nū 4.10-20
Onmɛ́yí kú ɛlā 4.21-23.
