UJƐRƐMÍYA 7 - Ubáyíbu kú Idɔma

Ujeremíya ka ɛlā Ɔwɔicō ipú Agblīihɔ-nɛ̄hi kú Óndú ā

¹ Óndú ā da ami nōo wɛ Ujeremíya ā ka,

² amíyɔ̄ nyɔ̄ gaá háyi okómpinu kú Agblīihɔ-nɛ̄hi kú Óndú ā. Ó ka amíyɔ̄ tɔ́ɔna ɛlā nyā lɛ odúúdú ācɛ kú Ujúda nēe gē bēhé ga ipú Agblīihɔ-nɛ̄hi, nyɔ̄ ī gbɔ̄ɔkɔ lɛ Óndú ā.

³ Ó ka amíyɔ̄ da uwā kahíníī, “Óndú ā, nōo lɔfú fíyɛ́ dúú, nōo wɛ Ɔwɔicō kú Ísrɛ̄lu ā ka aá lɛ ɛ́gɛ́nɛ̄ aá gē yá ucē ā pīyabɔ̄ ŋmá obɔ̄bí ga olɔhi, cɛ́ɛ́, n géē cɛ̄ ká aá lā amānyā gɔbū kpɔ́.

⁴ Aá híī kpɔ́tūce ɛlā ɛ̄kɛ̄mgbɛ̄ nɛ̄ aá ī ka ka, ‘Abɔ̄ Agblīihɔ-nɛ̄hi kú Óndú ā yɔ̄ amānyā ā, Óndú ā lā amānyā.’

⁵ Aá lɛ ɛ́gɛ́nɛ̄ aá ī yá ucē ā pīyabɔ̄ ŋmá obɔ̄bí ga olɔhi. Aá gbɔɔ́ ō yá ucē ɔkwɔ̄ɔ̄kwɛ̄yi lɛyíkwu īyī aá.

⁶ Aá pīya aúgbɔga mɛ́mla ayókwū mɛ́mla anyōkwū tū ŋ́. Aá kē híī ŋmó ācɛ nē é jíkpó ɔdā dúúmā ɛpɔ̄bí cɛ́ɛ́ ká aá lɛ ɔ́ ŋmó amānyā ŋ́. Aá híī nyɔ̄ í pā aɛ́cí kú aéwɔhá ŋ́, ohígbū ka ɔ́ɔmā géē kpó aá yíífi.

⁷ Ɔ́dāŋ nɛ̄ aá le yá ɛ́gɛ́nɛ̄ n ka ā, n géē yá ká aá lā amānyā nōo wɛ ajɛ nɛ̄ n je lɛ aádáádā aá, kóō wɛ ákú uwā piyóó.

⁸ Aá má ɔdā nɛ̄ aá ī yá ā ɛ ɛ́. Aá kpɔtūce ɛlā ɛ̄kɛ̄mgbɛ̄ nɛ̄ ó gáā tīile lɛ aá ŋ́.

⁹ Aá gē wūwī, gē ŋmó ɔ̄cɛ, ī gbaajā, ī kɛ̄mgbɛ̄ nɛ̄ aá le ɔkpa gwá nááná ā, gē gwɛ́ɛya lɛ ɛcí nēé hī ka Ubáalu ā, klla ī pā aɛ́cí kú aéwɔhá nɛ̄ aá tɛtɛ jé ŋ́ mā.

¹⁰ Eko nɛ̄ aá le aɔ́dā nēe bá nyā yá kpɛ́mm, cɛ́ɛ́ aá klla wā ī háyi iyɔ̄bū um, ipú Agblīihɔ-nɛ̄hi kú ami abɔ̄yī um ā, gē ka ka, ‘Ɔdā dóódu o bɔ̄bí í gáā yá alɔ ŋ́.’ Cɛ́ɛ́ aá klla bá ī yá aɔ́dōbɔ̄bí ɔ́ɔmā nēe ī wú um ɔtū ā.

¹¹ Aá gbɛlá ka ipú Agblīihɔ-nɛ̄hi kú um wɛ ɛga otayínū kú aúwī mɛ́mla ācohéjulúgwu nɛɛ? Amáŋ n húmáyī má ɔdā nɛ̄ aá bá ī yá ā.

¹² Aá nyɔ̄ ga Ussílo, ɛga nɛ̄ um fu aflɛ́yí kéē gbā um ɛ̄gbā ā, ká aá má ɔdā nɛ̄ n yá abɔ́ɔ ā. N kwú ɔ̄ ú yíífi, ohígbū ɔbíipú nɛ̄ ācɛ ɔlɛ́ um, Ísrɛ̄lu bī ā.

¹³ Nááná nɛ̄ n ge kɛlā lɛ aá klá ī ka igbalɛwa ā, aá jāhɔ̄ ŋ́. Amáŋ aá bá ī yá odúúdú aúcē ɔ́bíipú ā kpɔ́. Eko nɛ̄ n yɔ̄ ī hī aá igwú ā, aá tá um ohi ŋ́.

¹⁴ Ohígbū ɔ́ɔmā, ɔdā nɛ̄ n yá Ussílo ā, nɛ̄ n géē yá Agblīihɔ-nɛ̄hi kú abɔ̄yī um nyā nɛ̄ aá kpɔ́tūce piíí nyā á. Ajɛ nyā nɛ̄ n je lɛ aádáádā aá mɛ́mla aá, n géē yá ɔ̄ɔ̄ ɔdā nɛ̄ n yá Ussílo ā.

¹⁵ N géē nū aá bɛ̄cɛ ŋmá eyī um, ɛ́gɛ́nɛ̄ n nū aɔ́máapú aá, ācɛ Ísrɛ̄lu nēe lā ābɔ̄ ɔhá ā, bɛ̄cɛ ŋmá egiyí um ā.”

Ācɛ ā tá ō lɛyítáajɛ kpɔ́

¹⁶ Óndú ā da um kahíníī, “Ujeremíya, ā tíinalegwu ga um ohígbū ācɛ nēe bá nyā ŋ́. Ā jikwū ɛ́ɛ́ nɛ̄ a gē gbɔ̄ɔkɔ lɛyíkwu uwā ŋ́. A ba um ɛba lɛ uwā ŋ́, ohígbū ka ń gáā jāhɔ̄ ga awɔ ŋ́.

¹⁷ Á má ɔdā nēé bá ī yá ipú aígelī kú Ujúda mɛ́mla aúláyi kú Ujerúsālɛm ā ŋ́ nɛɛ?

¹⁸ Ayípɛ̄ ā lɛ ɛfú cē, aádā ā lɛ ɔlá gwó, ācɛnyā lɛ umu nwū klla lɛ ɔ́ ma, kéē yá igbō lɛ ɛcí nɔ̄nyā nēé hī ka, ‘Ɔcányā kú ɔkpáncō’ ā. É bá ī lɛ enyi mɛ́mla ejé fu ajɛ lɛ aɛ́cí kú aéwɔhá dúú, cɛ́ɛ́ kéē bīya um ɔtū

¹⁹ E gbɛlá ka aá bá ī bīya um ɔtū icííci nɛ. Amáŋ é bá yɔ̄ ī yá ɔdōbɔ̄bí, klla bá ī kpó uwēyī tū īyī uwā ɛyí.

²⁰ Ohígbū ɔ́ɔmā ami, Óndú ā nōo wɛ Ɔwɔicō ā géē cɔ̄nū nɛ̄hi lɛyíkwu ajɛ Ujúda. N géē bī ícɔ̄nū kú um í kpó ācɛ, aɛ́bɛ́, aɔ́cí mɛ́mla ɔdɛ̄hɔ̄ yíífi. Ícɔ̄nū kú um ā géē lɛbɛ̄ɛka ɔlá nɛ̄hi nɛ̄ ɔ̄cɛ dúúmā í gáā nyi ɔ̄ glá ŋ́ mā.”

²¹ Óndú ā nōo lɔfú fíyɛ́ dúú, nōo klla wɛ Ɔwɔicō nɛ̄ ācɛ Ísrɛ̄lu gē gbā ā klla kahíníī, “Ācɛ Ujúda, kwu ɛya nɛ̄ aá ī yi ɔlá dúúdú ga um ā mɛ́mla aɛ́dɔ ɛya ɔhá ā, ú kpó tɔ̄há, cɛ́ɛ́ ká aá kwú kpó lé abɔ̄yī aá.

²² Eko nɛ̄ n bī aádáádā aá bɛ̄cɛ ŋmá Íjīpiti ā, ó wɛ aɛ́hi mɛ́mla aɛ́ya nɛ̄ n je íne lɛ uwá kú nū ā nóó ŋ́.

²³ Amáŋ n je íne lɛ uwá kéē lɛyítáajɛ ga um, cɛ́ɛ́ ká n̄ wɛ Ɔwɔicō kú uwā, kéē kē wɛ ācɛ ɔlɛ́ um. N da uwá kéē yá ucē ɛ́gɛ́nɛ̄ n da uwá kéē yá lɛ ā, cɛ́ɛ́ ka ɔdā dóódu kóō lɔhi lɛ uwá.

²⁴ Amáŋ é jāhɔ̄ gā um ɛ́ɛ́ nēé gē lɛyítáajɛ gā um ŋ́. Ikɔkɔ ɔ́ɔmā, ɔdā nɛ̄ ɔtū olɔfú mɛ́mla ɔtū obɔ̄bí kú uwā da uwá kéē yá ā nēé bá ī yá á. É kwúcē hɛ́ um tá klla kwú igbihi ú cē kwu um.

²⁵ Ŋmífī nɛ̄ aádáádā aá bɛ̄cɛ ŋmá Íjīpiti ā, jāā kwu ícɛ nyā, n húmáyī tū ācomɛ́ɛbɛ kú um ɛhɔ̄ fu aá piyóó.

²⁶ Náaná ɔ̄cɛ dúúmā í jāhɔ̄, ɛ́ɛ́ nōó gē pó ɛlā kú um nēé ī ka ā ŋ́. Ikɔkɔ ɔ́ɔmā, aá ī yá īkpɛ̄yí olɔfú mɛ́mla ɔ́bíipú fíyɛ́ aádáádā aá á.

²⁷ Ujeremíya, a géē ka odúúdú ɛlā nēe bá nyā lɛ ācɛ ā, amáŋ é gáā jāhɔ̄ ga awɔ ŋ́. A géē hi uwā igwú, amáŋ é gáā tá uwɔ ohi ŋ́.

²⁸ A géē da uwá ka é wɛ ewo nēe ī lɛyítáajɛ lɛ Óndú ā, nōo wɛ Ɔwɔicō nēé ī gbā ā ŋ́. Italā nē é yá uwā ā, í gē nwū uwā ɔdā dúúmā ŋ́. Ɔ̄cɛ dúúmā í gē yá ucē ɔkwɔ̄ɔ̄kwɛ̄yi ɛ́ɛ́ gɛ ŋ́. Ɔ̄cɛ dúúmā í kōō cēē lɛ okónu hɛ́ ɛlā ɔkwɔ̄ɔ̄kwɛ̄yi ɛ́ɛ́ gɛ ŋ́.

É bá ī yá ucē ɔ́bíipú ɔpɛ́ kú Uhínɔm

²⁹ “Aá yēkwu, ācɛ kú Ujerúsālɛm. Aá lɛ īnyīlɛyí kú aá plla bónū. Aá tū ɛgíkwū, ɛyí ɛfú dóódu ohígbū ka aá nēe béeyī eko nyā ā lɛ ami, nōo wɛ Óndú ā yá cɔ̄nū, nɛ̄ n tá aá klla kwú igbīhi í cē kwu aá ɛɛ́.

³⁰ Ācɛ kú Ujúda lɛ aɔ́dā nēe bɔ̄bí tū um yá ɛɛ́. É kwú aɛ́cí kú uwā nēe gē wú um ɔtū nɛ̄hi ā ú kpó ce ipú Agblīihɔ-nɛ̄hi kú abɔ̄yī um ā ɛɛ́. Anɔ́ɔ é kē kwú Agblīihɔ-nɛ̄hi kú um ā í tɛ̄ɛlihɔ á.

³¹ Ipú ɔpɛ kú Uhínɔm ā, é lɛ ede eyī gwó, nēé hī ka Utɔ́fɛ̄ɛti, cɛ́ɛ́ kéē kpó ayí nɔ̄nyīlɔ mɛ́mla ayínɔ̄nyā kú uwā ŋmó klla kpó uwā yi ɔlá le gwɛ́ɛya. Ń je ɔ́da lɛ uwá kéē yá ɛgɔ́ɔmā ŋ́, ɛ́ɛ́ nɛ̄ ɛlā kú nū kōō ī hɛ́ wā ipú ɔtū kú um ŋ́.

³² Ohígbū ɔ́ɔmā, eko géē wā, nēé gáā hī abɔ́ɔ ka, Utɔ́fɛ̄ɛti amáŋ ka ɔpɛ́ kú Uhínɔm gɛ ŋ́. Amáŋ é géē hī ka ɔpɛ́ nēé í hɛ́ ācɛ ɔkɔ nɛhi. É ī kpó okwū ācɛ nyī ɔpɛ́ abɔ́ɔ, ohígbū ka ɛga ɔhá dúúmā í gáā táajɛ nēé gē nyī okwu ācɛ ɛ́ɛ́ gɛ ŋ́.

³³ Aókwū kú ācɛ Ujúda nyā í wɛ ɔdōlé lɛ aígbáanɔ mɛ́mla aɛ́bɛ́ ipácí, ɔ̄cɛ dúúmā í kē gáā yɔ̄ nōo gē nū uwā ŋmá ɛbɛ aókwū ā ō lé ŋ́.

³⁴ Ajɛ ā í je pīya ipú alácɛ̄. Uya kú ācɛ nēe bá ī gwéeyē géē mɛ ŋmá ipú aígelī kú Ujúda mɛ́mla aúláyi kú Ujerúsālɛm. Uya kú éeyē kú ɔnyā mɛ́mla ɔbá ōlɛ ā géē mɛ dúú.