UJƐRƐMÍYA 3 - Ubáyíbu kú Idɔma

Onyíleyī kú Ísrɛ̄lu

¹ Anɔ́ɔ Ujeremíya ka Óndú ā ɔ́ɔ da anúɔ kahíníī, “Ɔ́dāŋ́ ka ɔ̄cɛ tá ɔnyā nū, nɛ̄ ɔnyā ɔ́ɔmā nyɔ̄ í lɛ ɔbá ɔhá lɛ, ɔbá nū nɛ̄ŋcɛ̄ ā í gáā kwúcē nyɔ̄ í lɛ ɔnyā ɔ́ɔmā igbɔhá glá gɛ ŋ́. Ɔ́dāŋ́ kōó nyɔ̄ í lɛ ɔnyā ɔ́ɔmā lɛ kpɔ́, ayíka ó kwú ajɛ ú tɛ̄ɛlihɔ ɛɛ́. Amáŋ Ísrɛ̄lu, aá nyɛ̄ɛ̄ ŋmá ɛgiyí um nyɔ̄ í bá ī pā aɛ́cí alɛwa bɛ̄ɛka ɔnyā nōo ī gbajā tá ācɛnyīlɔ alɛwa ā. Anɔ́ɔ á kē bá ī tíne ō kwúcē wā ɛgiyí um kpɔ́.

² Aá je eyī gicō kú aá má ɛyí ɛfu dóódu. Ɛyí ɛfu dúúmā í táajɛ, nɛ̄ aá pā ɛcí anú ŋ́ nɛɛ ŋ́. Aá lɛbɛ̄ɛka akwuna néē ī cīkpó nū ɛbɛɛbɛ ā. Aá klla bá ī tíne ɛcí nɛ̄ aá géē pā, bɛ̄ɛka akwuna nōo ī hayi áklō kú ɔwɛ yɔ̄ ī gbēyī ācɛnyīlɔ nōo í cikpó nū ā. Aá klla kwáajɛ gē tíne aɛ́cí nɛ̄ aá ī pā bɛ̄ɛka ācɛ kú Arébīya nēe ī héjulúgwu ipú ígbíli ā. Aá kwú ajɛ ā ú tɛ̄ɛlihɔ ŋmá lɛ ucē ɔ́bíipú mɛ́mla akwuna ō yá kú aá.

³ Ɔ́ɔmā yá nɛ̄ ami nōo wɛ Óndú ā í cɛ̄ lɛ ɔwɔ kú aflāāflɛ̄yī ā mɛ́mla ɔwɔ kú igbīhāajɛ ā yā ŋ́ má. Aá bá ipú ɛcí ō pā uwēyī í kōō ī yá aá ŋ́, bɛ̄ɛka akwuna ā.

⁴ Uwēyī í gē yá aá ŋ mā, anāānā, aá da um ka, ‘Ádā alɔ, awɔ yíihɔtū tá alɔ ŋmá eko nɛ̄ alɔ wɛ ayípɛ̄ obene á.

⁵ A híī cɔ̄nū tū alɔ piyóó jāā ga ajaajɛ ŋ́?’ Amáŋ abɔ̄ aá gē kɛlā lɛ ā nááná, aá bá gē yá ɔdōbɔ̄bí dóódu nɛ̄ aá fū ɔ̄ iyē yá glá ā.”

Ísrɛ̄lu mɛ́mla Ujúda géē pīyabɔ̄ piíí

⁶ Eko nɛ̄ Ujosíya wɛ ɔcɛ́ ā, Óndú ā da um kahíníī, “A má ɔdā nɛ̄ ācɛ Ísrɛ̄lu gē ya bɛ̄ɛka ɔnyā nōo ī gbajā āa? É habɔ̄ ɛ̄gbā ō gbā um tá gaá gbɔɔ́ ō pā aɛ́cí ɔkwu aɔ́cí ɛ̄mɛ̄mɛ̄ nēe kwu ɛyí ɛfu dóódu ā. Ucē nēé yá ā lɛbɛ̄ɛka ákú ɔnyā nōo kwu ŋmá ɔlɛ́ ɔbá nū nyɔ̄ í klá ī yá akwuna ā.

⁷ N gbɛlá ka eko nēé lɛ odúúdú ɔdā nēe bá nyā yá kwɛyí ā, é géē kwúcē wā ɛgiyí um. Amáŋ ó kwúcē wā ŋ́. Anɔ́ɔ Ujúda nōo lɛbɛ̄ɛɛka ɔnyínɛ́ nɔ̄nyā kú Ísrɛ̄lu ā kē má odúúdú aɔ́dā nēe bá ā kpɛ́m.

⁸ Ācɛ Ujúda má ka n tá Ísrɛ̄lu bɛ̄ɛka ɛ́gɛ́nɛ̄ ɔ̄cɛ ī tá ɔnyā nū ā. N klla le ɔ́ nū, ohígbū ka é lɛ igbīhi cē kwu um bá ī pā ɛcí bɛ̄ɛka ɔnyā nōo nyɛ̄ɛ̄ ŋmá ɔlɛ́ ɔbá nū nyɔ̄ ī yá akwuna ā. Nááná ācɛ Ujúda nēe lɛbɛ̄ɛka ɔyínɛ nɔ̄nyā kú Ísrɛ̄lu ā í yúufi ŋ́, anɔ́ɔ ó gaá gbɔɔ́ ō pā ɛcí dúú bɛ̄ɛka akwuna ō gbajā ā.

⁹ Ɛcí ō pā ī wɛ ɔdōbɔ̄bí dúúmā tū ācɛ Ujúda ŋ́ lɛbɛ̄ɛka ɔnyā nɛ̄ ajā ō gbo í gē tū ɔ̄ uwēyī ŋ́ mā. Ohígbū ɔ́ɔmā, é kwú ajɛ ā ú tēelihɔ, ŋmá lɛ o pā ɔcí mɛ́mla ɛcɔ̄ nɛ̄ é le kwaajɛ ā.

¹⁰ Igbīhi nēé lɛ ucē obɔ̄bí ɔ́ɔmā yá ā, ācɛ Ujúda nēe lɛbɛ̄ɛka ɔyínɛ́ nɔ̄nyā kú Ísrɛ̄lu nōo ī gbajā dúú ā, lɛ ula yá ká aá ɔ́ɔ kwúcē wā ɛgiyí um ɛɛ́. Ó wɛ ɛlā ɔkwɔ̄ɔ̄kwɛ̄yí ŋ́. Ami nōo wɛ Óndú ā ka á.”

¹¹ Anɔ́ɔ Óndú ā kɛlā ga um gɔbū ka, nááná nɛ̄ ācɛ Ísrɛ̄lu cīgbīhi kwu um dúú ā, é béyī fíyɛ́ ācɛ Ujúda, nēe lɛbɛ̄ɛka ɔnyā nōo ī gbajā ā.

¹² Ó da um ka amíyɔ̄ nyɔ̄ í pīyeyī kwu ɛhícō kú amíyɔ̄ da Ísrɛ̄lu kahíníī, “Ācɛ Ísrɛ̄lu, aá nēé ī gbā um kpaakpa ŋ́ mā, aá kwúcē wā ɛgiyí um. N gáā cɔ̄nū da aá gɛ ŋ́, ohígbū ka n gē ményinyi. Ń gáā klá ī cɔ̄nū da aá piyóó gɛ ŋ́.

¹³ Aá cɛ̄ ofōōfūnū ka aá le ɛpɔ̄bí lé. Ka aá klla lɛ īkpɛ̄yí olɔfu yá tá ami, Óndú ā nōo wɛ Ɔwɔicō kú aá ā. Aá le okónu cɛ̄ ɔ̄ ka aá bá ī gbā aɛ́cí kú aéwɔhá ɛ̄gbā ɔkwu ɔcí ɛ̄mɛ̄mɛ̄ dóódu. Ka aá ɔ́ɔ klla lɛyítáajɛ lɛ ɛlā kú um ŋ́. Ami nōo wɛ Óndú ā lɛ ɛlā ka ɛɛ́.

¹⁴ Ācɛ Ísrɛ̄lu, aá nēé gbā um kpaakpa ŋ́ mā, aá kwúcē wā ɛgiyí um. Aá wɛ ákú um nɛ. N géē je ɔ̄cɛ éyééye ámaŋ ka ācɛ ɛpɛɛpa kú aá ŋmá igelī nɛ̄ŋ́cɛ́ mɛ́mla ipɔ́ɔmā dóódu. N klla í bī aá kwúcē wā Usáyɔn.

¹⁵ N géē kpó aótrɛyí lɛ aá nēe géē lɛyítáajɛ gā um. É kē í bī íjééyī mɛ́mla ɛyí ɔdōōjé le gbō aá.

¹⁶ Cɛ́ɛ́ eko nɛ̄ aá kwú nyīla ipú ajɛ ā ɛɛ́, ācɛ í klla gáā kɛlā lɛyíkwu ikpati kú okónu ō ce kú um ā ɛ́ɛ́ gɛ ŋ́. É gáā gbɛlá nū, ɛ́ɛ́ nēé gē blakwu ɔ́ ŋ́. É gáā cɛgbá nū, ɛ́ɛ́ nēé gē yá ɔhá kú nū ŋ́.

¹⁷ Eko nɛ̄ eko ɔ́ɔmā gā, é géē hī Ujerúsālɛm ka Akpa kú ɔcɛ́ kú Óndú ā. Odúúdú aéwo kú ɛcɛ ā géē jīla abɔ́ɔ kéē gbā um ɛ̄gbā. É kē gáā yá ɔdā ɔtū olɔfú mɛ́mla ɔtū obɔ̄bí kú uwā ā ɛ́ɛ́ gɛ ŋ́.

¹⁸ Ísrɛ̄lu mɛ́mla Ujúda géē pīyatɔ̄há wā ɔlɛ́ ŋmá ajɛ éwɔhá, nōo yɔ̄ ipú ajɛ kú ɛhícō ā. É géē wā ipú ajɛ nɛ̄ n je lɛ aádáádā uwā ká o wɛ ukpɛ̄ kú uwā ā.”

Ɛcí ō pā kú ācɛ kú Ɔwɔicō

¹⁹ Óndú ā kahíníī, “Ācɛ Ísrɛ̄lu, n tíne ō mīyɛ aá bɛ̄ɛka ayínɔ̄nyīlɔ ōcɛ̄ kú um ā. Cɛ́ɛ́ ká n̄ kwú ajɛ nōo lɔhi ō lā fíyɛ́ dúú ipú odúúdú ajɛ kú ɛcɛ ā ú lɛ aá. N tíne ká aá hī um ka ádā aá, ká aá klla cīgbīhi kwu um ɛ́ɛ́ gɛ ŋ́.

²⁰ Amáŋ ācɛ Ísrɛ̄lu, aá nyɛ̄ɛ̄ hɛ̄ um tá nyɔ̄ í bá ī pā aɛ́cí lɛbɛ̄ɛka ɔnyā nōo nyɛ̄ɛ̄ ŋmá ɔlɛ́ ɔbá nū nyɔ̄ ī yɔ̄ ī gbajā ā. Ami nōo wɛ Óndú ā ka á.”

²¹ N pó uya ce ɛyí aɛ́fu gbōō. Uya ɔ́ɔmā wɛ ikwū nɛ̄ ācɛ kú Ísrɛ̄lu bá ī je, bá ī gbɔ̄ɔkɔ ohígbū ka é le igbīhi cē kwu Óndú ā nōo wɛ Ɔwɔicō kú uwā ā klla gbɔɔ́ ō yá ucē obɔ̄bí.

²² Óndú ā kahíníī, “Odúúdú aá nēe nyɛ̄ɛ̄ hɛ̄ ami nōo wɛ Óndú ā tá ā, aá kwúcē wā. N géē hɛ́ aá tá ŋmá ɔdā nōo ī yá nɛ̄ aá yɛce um kpaakpa glá ŋ́ mā. Anɔ́ɔ ācɛ ā kahíníī, “Īī, alɔ géē wā ɛgiyí uwɔ, Óndú ā, ohígbū ka awɔ wɛ Ɔwɔicō kú alɔ á.”

²³ Odúúdú aɛ́cí nɛ̄ alɔ húmáyī pā ɛyí aɛ́fu ā mɛ́mla uya wōōō ā wɛ ɛ̄kɛ̄mgbɛ̄ dúú. É tá alɔ abɔ̄ ɔwɛ dúúmā glá ŋ́. Awɔ nōo wɛ Ɔwɔicō kú alɔ ā, ōfōōfū uwɔ tá alɔ abɔ̄ glá á.

²⁴ Amáŋ ŋmá eko íkée ɛcí nēé hī ka Ubáalu, nōo wɛ ɔdā uwēyī ɔ́ɔmā, nɛ̄ alɔ húmáyī pā ā, cɛ̄ lɛ aɛ́na mɛ́mla aálá kú alɔ mɛ tū ajɛ ɛɛ́. Kwu ayí alɔ mɛ́mla ɔdā dúúdú nɛ̄ aádáádā alɔ húmáyī yúklɔ́ nū ā mɛ tū ajɛ dúú.

²⁵ Uwēyī lɛ alɔ kwú dúúdú bɛ̄ɛka ɛ́gɛ́nɛ̄ ɔ̄cɛ gē gwutá lɛ īlī klá iyē ŋmá ɛyí wā ajɛ ā. Ohígbū ka alɔ mɛ́mla aádáádā alɔ lɛ íne kú Óndú ā nōo wɛ Ɔwɔīcō kú alɔ ā bīya ɛɛ́. Alɔ í kē lɛyítáajɛ lɛ ɛlā nōó ī ka ā ŋ́.”