UJƐRƐMÍYA 2 - Ubáyíbu kú Idɔma

Ɔwɔicō lɛlákwu Ísrɛ̄lu

¹ Igbɔhá Óndú ā da um ka

² amíyɔ̄ nyɔ̄ gaá lɛ ɛhɔ̄ nyā cɛ̄ tɛ́ɛcɛ lɛ odúúdú ācɛ kú Ujerúsālɛm. Ó kahíníī. ‘‘Ujerúsālɛm, n blakwu ɛ́gɛ́nɛ̄ a lɛyítáajɛ gā um kpaakpa eko ɔyípɛ̄ kú uwɔ lɛ ā. N blakwu ɛ́gɛ́nɛ̄ a yíihɔtū um lɛbɛ̄ɛka ɛ́gɛ́nɛ̄ ɔnyā ɛ̄yīpɛ̄ í yíihɔtū ɔbá nū ā. N klla blakwu ɛ́gɛ́nɛ̄ a yɛce um lɛ ipú ígbíli, nɛ̄ ɔ̄cɛ dúúmā í nyi ɔdɛ̄hɔ̄ tū ɔ̄ɔ̄ jéjéé ɛ́ɛ́ ŋ́ mā.

³ Ísrɛ̄lu, aá tɛtɛ wɛ ákú um ōfōōfū um. Aá lɛbɛ̄ɛka aɔ́dɛ̄hɔ̄ olɔhi fíyɛ́ dúú kú aɔ́dɛ̄hɔ̄ nēé cē aflɛ́yí ŋmá ɛhɔ̄ nēe ī wɛ ákú um ā. N gē ŋmó ācɛ nēe lɛ abɔ̄ kwu aá ɛpɔ̄bí klla ī yá uwā italā. Ācɛ ɛ́gɔ́ɔ́mā lɛbɛ̄ɛka ɔ̄cɛ nōo le ɛbéelihɔ lé ā. Ami nōo wɛ Óndú ā le ka ɛɛ́.’’

Ínoōbīya kú aádáádā kú Ísrɛ̄lu

⁴ Ujeremíya klla kahíníī, “Ipɔ́ɔ́ma kú Ujékɔ̄pu, aá pó ɛlā kú Óndú ā ooo! Odúúdú aípɔ́ɔnū kú ɔlɛ́ Ísrɛ̄lu, aá jāhɔ̄!

⁵ Óndú ā kahíníī, ‘‘Ɔdōōbɔ̄bí nyá nɛ̄ aádáádā aá ka ka n yá uwā, ɛ́ɛ́ nēé nyɛ̄ɛ̄ ŋmá ɛgiyí um āa? É nyɛ̄ɛ̄ nyɔ̄ í bá ī gbā aɛ́cí nēé tīle dúúmā ŋ mā ɛ̄gbā, anɔ́ɔ uwá abɔ̄yī uwā kwu pīya aɛ́flɛ́ɛfu á.

⁶ Nááná nɛ̄ n lɛ uwá hɛ́tá ŋmá Íjīpiti ā, é lɛ ɛlá wu um ŋ́. É kōō ka ka iní nɛ̄ Óndú ā, nōo kpó alɔ trɛ̄yí bū ipú ígbíli nōo wɛ ajɛ kú úmúlá mɛ́mla aɔ́gɔ̄ ā yɔ̄ ā ŋ́. Óndú nōo kpó uwā ŋmá ajɛ nōo le ŋmíkpākplā klla bɔ̄bí nɛ̄hi. Ɔ̄cɛ dúúmā í lɔtū bū ipú ígbíli ɔ́ɔmā jéjéē, ɛ́ɛ́ nɛ̄ ɔ̄cɛ dúúmā ī lā anú ɛ́ɛ́ ŋ́.

⁷ N lɛ aá bī wā ipú ajɛ nōo lɔhi lɛ ɔdɛ̄hɔ̄ nɛ̄hi, cɛ́ɛ́ ká aá jɔ́nyɛ kú īkpɔ̄cí kú nū mɛ́mla ɔdōōlɔhi kú nū. Amáŋ abɔ́ɔ aá gā ipú ajɛ kú um ā, aá kwú ajɛ ā ú tɛ̄ɛlihɔ. Aá klla kwú ɔdā nɛ̄ um je lɛ aá ā ú pīya ɔdā ō tēelihɔ.

⁸ Ācogwɛ́ɛya nēe nwū ācɛ ɛlā kú um í kōō jé um, ɛ́ɛ́ nēé klla í dɔɔ̄kā um ŋ́. Aɔ́cɛ́ ogbāājɛ ā lɛ īkpɛ̄yí olɔfu yá tá um. Ācomɛ́ɛbɛ ā gē bī ɛcí nēé hī ka Ubáalu ā le mɛ́ɛbɛ, klla ī nyɔ̄ ī gbā ɔdā nōó lɛ itene dúúmā ŋ́ mā ɛ̄gbā.

Ɛpɔ̄ nɛ̄ Óndú bī lɛyíkwu ācɛ ɔlɛ́ nū ā

⁹ Ohígbū aɔ́dā nēé yá ɔ́ɔmā ā, ami nōo wɛ Óndú ā, géē kɛpɔ̄ tū ācɛ ɔlɛ́ um, Ísrɛ̄lu, igbɔhá kpɔ́ ɛ́ɛ́. N kē í kɛpɔ̄ nyā tū ayááyí kú uwā dúú.

¹⁰ Aá ga ajɛ kú Usáyíprɔ̄s nōo yɔ̄ ɛnɔ̄ɔ̄nɛ̄ ā, cɛ́ɛ́ ká aá lɛ abɔ̄ jila Aá lɛ ɔ̄cɛ éyi tɛ̄hɔ̄ ga ajɛ kú Ukɛ́da nōo yɔ̄ ɛnɔɔcī ā, cɛ́ɛ́ ká aá lɛ eyī yɛ ɔ́ ká aá má ɔ̄ɔ̄. Aá géē má ka ɔdā ɛ́gɛ́nyā í yá jéjéē ɛ́ɛ́ ŋ́.

¹¹ Éwo ɔhá dúúmā í pīya aɛ́cí nēé pā ā abɔ̄ jéjēē ɛ́ ŋ́, nááná nɛ̄ ɛcí kú uwā í wɛ ɔdā ɔkwɛ̄yí ŋ́ mā. Amáŋ ācɛ ɔlɛ́ um kwú ami nōo ī cɛ̄ lɛ uwá ī lɛ ojīlīimā mɛ́mla ɛgahi ā ú hīlabɔ̄ mla aɛ́cí nēé gáā tīile dúúmā lɛ uwá glá ŋ́ mā.

¹² Ohígbū ɔdā nēé yá ɔ́ɔmā, eyījiii kóō yá ācɛ nēe bá ɔkpáncō ā, kéē yúúfi klla fīyēgbúlú, cɛ́ɛ́ ká okónu kóō hɛ́ uwā ŋ́ Ami nōo wɛ Óndú ā ka á.

¹³ Ācɛ ɔlɛ́ um lɛ aɔ́dōbɔ̄bí ɛpa yá ɛɛ́. Éyi wɛ ka é kwú igbīhi ú ce kwu ami, nōo lɛbɛ̄ɛka njɔlɔ kú éŋkpɔ̄ olɔhi nōo ī pɛ́ ā. Ɔ́mpā wɛ kéē klla lɛ obuga nōo le ca nɛ̄ ó bī éŋkpɔ̄ dúúmā glá ŋ́ mā bū lɛ īyī wā.

¹⁴ Ācɛ Ísrɛ̄lu, aá wɛ aɔ́fiyɛ ŋ́ māāā, é kē má aá tá ipú ahɔ̄ ɔfiyɛ ŋ́. Nááná aólɛlā kú aá gē tɔ́ɔtɛ́ aá kéē kpó aá kwú.

¹⁵ Aólɛlā ā bá ī cīlɛ̄fú tū aá bɛ̄ɛka ɛ́gɛ́nɛ̄ ágábá gē tōoji womwom kóō kwú ɛbɛ́. É kwú ajɛ kú ɔlɛ́ aá ú yíífi, klla kwú aígelī nɛ̄ŋcɛ́ kú aá ú tá alácɛ̄ nɛ̄ ɔ̄cɛ dúúmā í lā uwá ŋ́.

¹⁶ Ācɛ kú Íjipiti nēe ŋmá aígelī nēé hī ka Umémfīs mɛ́mla Utapánhes ā le uwá ɛyí kpó yíla.

¹⁷ Ācɛ Ísrɛ̄lu, aá bī unwalu nyā wā gé lɛ īyī aá á, ohígbū ka aá kwú igbīhi í ce kwu ami nōo wɛ Óndú ā nōo wɛ Ɔwɔicō ká aá ā. Aá kwúcē hɛ um tá, eko nɛ̄ n kpó aá trɛyí yɔ̄ ī bī aá jé ɔwɛ ā.

¹⁸ Aá gáā lɛ ile dóódu ŋmá lɛ ō ga Íjīpiti cɛ́ɛ́ kú aá nyɔ̄ í gwá éŋkpɔ̄ ísu kú Unáyilu ā ŋ́. Aá kē gáā lɛ ile dóódu ŋmá lɛ ō ga Asírīya cɛ́ɛ́ kú aá nyɔ̄ í gwá éŋkpɔ̄ ísu kú Uyúfrētīisi ā ŋ́.

¹⁹ Ɔ́bíipú nɛ̄ aá bī pií ā gáā je pīya italā lɛ aá á. Igbīhi nɛ̄ aá cē kwu um ā pií ā géē je pīya ɛpɔ̄bí lɛ aá á. Aá géē jé ɛ́gɛ́nɛ̄ ó lɔ́ɔnɔ klla bɔ̄bí nɛ̄hi lɛ ā, kú aá ce igbīhi kwu ami, Óndú ā nōo wɛ Ɔwɔicō kú aá ā, nɛ̄ aá klla lɛ ojīlīmā ce um gɛ ŋ́ mā. Ami Óndú ā, Ɔwɔicō nōo lɔfú fíyɛ́ ā dúú ā le ka ɛɛ́.”

Ísrɛ̄lu tá ká o gbā Ɔwɔicō ɛ̄gbā

²⁰ Óndú ā nōo wɛ Ɔwɔicō ā kahíníī, Ācɛ Ísrɛ̄lu, aá tá íkwu nɛ̄ um lɛ lɛyíkwu aá ā gbojī ɛɛ́. Aá klla tá ō gbā um ɛ̄gbā. Aá bá ī pā aɛ́cí ɔkwu aɔ́cí ɛ̄mɛ̄ɛ̄mɛ̄ nēe kwu ɛyí aɛ́fu ā bɛ̄ɛka akwuna nōo ŋmá ɛgiyí ɔ̄cɛ éyi gā ɛgiyí ɔ̄cɛ ɔhá ā.

²¹ N yá aá lɔhi lɛbɛ̄ɛka ɛ́gɛ́nɛ̄ ɔ̄cɛ gē nyi īkpō kú ɔcí Ufáyin nōo lɔhi fíyɛ́ dúú ā. Ó lɛ ā ɔdíyá nɛ̄ aá je pīya aɛ́flɛ́ɛfu bɛ̄ɛka īkpō kú ɔcí ufáyin kú ipácí nōó lɔhi ŋ́ mā āa.

²² Ó kōō he aá ɔtū, aá bī ukwɔ olɔfú nɛ̄hi lɛ iyē gwā, nááná n géē yɔ̄ ī má ɛpɔ̄bí kú aá kpɔ́.

²³ Aá bá ī híhó ka aá je iyī aá tɛ̄ɛlihɔ ŋ́. Ka aá klla pā ɛcí nēé hī ka Ubáalu ā jéjéē ɛ́ɛ́ ŋ́. Ɔdí nɛ̄ aá ī híhó nū āa? Aá má ucē obɔ̄bí nɛ̄ aá yá ɔpɛ́ ā ŋ́ nɛɛ? Aá kóō lɛ eyī yɛ ɔdā nɛ̄ aá yá ā. Aá lɛbɛ̄ɛka ɔnyā inyankwūlūmī nōo le nyílá yɔ̄ gē kwinya gicō gajɛ yɔ̄ ī tíne ɔbá dúúmā nōo í ce ɔ́ ā.

²⁴ Aá klla lɛbɛ̄ɛka ɔnyā ijakī kú ipácí nɛ̄ ígbíli le jé ɔ̄ɔ̄ iyē ā. Ó klá ī hípī owu yɔ̄ ī tíne ɔbá. Eko dúú nōo ī tíne ɔbá nōo í ce ɔ́ ɔ́ɔmā, ɔ̄cɛ dúú í kwú ɔ̄ɔ̄ klá cīī glá ŋ́. Ɔbá dúúmā nōo tínē ō ce ɔ́ ā, í gáā cɛ̄gbá ō je unwalu ō dɔ̄ɔka nū lɛ īyī nū dɛ̄ɛ̄ ŋ́. ohígbū ka eko dúúmā nɛ̄ eko nɛ̄ ɔbá tíne ō ce ɔ́, ó gē je īyī nū tá ajɛ lɛ ɔ́ piíí.

²⁵ Ācɛ Ísrɛ̄lu, n da aá ka aá cɛ̄ lɛ ikpó ká aá kóō le kpó plla, kú ipú ɔkɔ ká aá kóō le ŋmó flōflō ŋmá lɛ inya nɛ̄ aá bá ī kwu tíicō ga ajɛ yɔ̄ ī tíne ɛcí nɛ̄ aá ī pā ā ŋ́. Amáŋ aá tá kahíníī, “Ehé! Alɔ í cīgbīhi glá gɛ ŋ́. Aɛ́cí nɛ̄ aéwɔhá gē pā he alɔ ɔtū nɛ̄hi. Alɔ í yɔ̄ ī pā uwā.

Ācɛ Ísrɛ̄lu cíkā nēé gē yá uwā italā

²⁶ Óndú ā khíníīī, “Ɛ́gɛ́nɛ̄ uwēyī gē kwú uwī, eko nēé lɛ ɔ́ kwú ā, ɛ́gɔ́ɔmā nɛ̄ uwēyī gáā kwú odúúdú ācɛ kú Ísrɛ̄lu lɛ á. Uwēyī géē kwú aɔ́cɛ́ mɛ́mla aígabɔ̄ mɛ́mla ācogwɛ́ɛya klla mɛ́mla ācomɛ́ɛbɛ kú uwā.

²⁷ Uwēyī géē kwú odúúdú aá nēe gē da ɔcí ka anúɔ ɔ́ɔ wɛ ádā aá, klla ī da ápátɛ́cɔ̄ ka anú ɔ́ɔ wɛ ɛ́nɛ́ aá ā. Uwēyī nyā géē kwú aá ohígbū ka aá le igbīhi cē kwu um, ikɔkɔ nɛ̄ aá géē wā ɛgiyí um ā. Amáŋ eko nɛ̄ aá bá ipú unwalu nɛɛ, aá ī hī um igwú ka amíyɔ̄ kócōō wā í nya aá tá.

²⁸ Iní nɛ̄ aɛ́cí nɛ̄ aá yá lɛ īyī aá ā bá āa? Ɔ́dāŋ́ nēé nya aá tá glá, ká é kē nya aá tá eko dúúmā nɛ̄ aá bá ipú unwalu ŋŋ. Woó! Ācɛ kú Ujúda, ɛ́gɛ́nɛ̄ igelī nɛ̄hi kú aá lɛwa lɛ ā, ɛ́gɔ́ɔmā nɛ̄ ɛcí nɛ̄ aá gē pā ā lɛwa lɛ ā á.

²⁹ Ɔdíyá nɛ̄ aá gē kpɛ́lā ce um ā? Aá kē yá īkpɛ̄yí olɔfú tá um á.

³⁰ N yá ācɛ ɔlɛ́ aá ōhī italā, amáŋ ɔ́ɔmā í yá aá ɔdā dúúmā ŋ́. Aá cɛ̄ gā um pī aá tá ɔwɛ ŋ́. Aá bá ī ŋmó ācomɛ́ɛbɛ nɛ̄ um tɛ̄hɔ̄ fu aá lɛbɛ̄ɛka ágábá nōo le cɔ̄nū nɛ̄hi, yɔ̄ ī ŋmó aɛ́bɛ́ bónū ā.

³¹ Ācɛ kú Ísrɛ̄lu nēe béeyī eko mā ā, aá jāhɔ̄ lɛ ɛlā nɛ̄ n gē ka ā. Ń lɛbɛ̄ɛka ígbíli ámaŋ ka ajɛ nōo dobū klla tūufi nɛ̄hi ā lɛ aá jéjéēē ɛ́ ŋ́. Aá cíkā ō ka ka aá ɔ́ɔ géē yá ɔdā nōo he aá ɔtū ā ŋ́. Aá kē cíkā ō ka ka aá ɔ́ɔ gáā kwúcē wā í gbā um ɛ́ gɛ ŋ́ nɛɛ ŋ́.

³² Ɔyípɔ̄ŋ̄cɛ́nyā í gē je mlanyī agbá ōtɔ̄ɔkɔ mɛ́mla ɔdōōwabɔ̄ mɛ́mla ɔdōplahɔ̄ klla mɛ́mla ɔdōleyíifa ɔhá kú nū ā ŋ́. Ɔ̄nyā nōo yɔ̄ ī lɛ ɔbá í gē je mlanyi īlī ifa nōó bī gáā lɛ ɔbá ā glá ŋ́. Amáŋ, aá nēe wɛ ācɛ ɔlɛ́ um ā gē mlanyī um iháyí alɛwa.

³³ Amáŋ aá lɛbɛ̄ɛka ɔnyā nōo ī gbajā ā. Ɔnyā ɛ́gɔ́ɔmā jé ɛ́gɛ́nɛ̄ ó ī yá lɛ nɛ̄ ācɛnyīlɔ ī wā gaá cikpó nū ā. Ɛ́gɔ́ɔmā nɛ̄ aá jɛ́ ō tíne aɛ́cí nɛ̄ aá géē pā lɛ á. Ɛ́gɛ́nɛ̄ aá jé ō yá ɔ̄ lɛ ā, ó kōō ɔnyā nōo wɛ ɔbákwuna ā kē ī nwū ŋmá ɛgiyí aá.

³⁴ Oyī kú aógbɛhá mɛ́mla ācɛ nēe yá ɔdōbɔ̄bí dúúmā ŋ́ mā ce aá ɛyí. Ohígbū ka aá ŋmó uwā nááná nɛ̄ uwá í wɛ uwī ŋ́ mā. Nááná nɛ̄ aá ī yá ɔdā nēe bá ā kpɔ́ ā,

³⁵ aá gé híhó ka aá ɔ́ɔ bɔ̄bíipú dúúmā ŋ́. Ɔwɔicō í cɔ̄nū lɛyíkwu alɔ gɛ ŋ́. Amáŋ, ami nōo wɛ Óndú ā géē ŋmó aá ɛpɔ̄bí, í yá aá italā nɛ̄hi ohígbū íhó nɛ̄ aá hɛ́ ka aá ɔ́ɔ bɔ̄bíipú dúúmā ŋ́ mā.

³⁶ “Aá kwú īyī aá ú tá alahá ŋmá lɛ ō yɛce aɛ́cí kú aéwɔhá ā. Íjīpiti géē je uwēyī lɛ aá ɛ́gɛ́nɛ̄ Asírīya je lɛ aá ā.

³⁷ Aá géē kwúcē ŋmá abɔ́ɔ lɛyí playi ajɛ ipú uwēyī, ohígbū ka ami nōo wɛ Óndú ā tá ācɛ nɛ̄ aá kpɔ́tūce ɔ́ɔmā ɛɛ́. Aá kē gáā lɛ ile dúúmā ŋmá ɛgiyí uwā ŋ́.”