UDÁNĪYƐ̄LU 9 - Ubáyíbu kú Idɔma

Udánīyɛlu gbɔ̄ɔkɔ ohígbū ācɛ ɔlɛ́ nū.

¹ Ipú iháyí aflɛ́yí nɛ̄ Udárīyɔsi, ɔyí kú Ahásɛ̄rɔ̄si, ɔ̄cɛ Uméde ā, lé ɔcɛ́ kú Ubábīlɔn ā,

² n yɔ̄ ī jɔ́kpa ihɔ ā, yɔ̄ ī gbɛlá ohígbū iháyí ofɛtá cigwó nɛ̄ Ujerúsālɛm mɛ́mla Agblīihɔ-nɛ̄hi ā géē tá alácɛ̄ lɛ, ɛ́gɛ́nɛ̄ Óndú ā ka lɛ Ujeremíya, ɔ̄comɛ́ɛbɛ ā.

³ Anɔ́ɔ n lɛ īlī ekwu kpó wiiyē, lɛ ewo wu klá ɛyí, gaá cīce ɛyétutulu ipú ewo. N le okónu gwū klla gbɔ̄ɔkɔ lɛ Óndú, Ɔwɔicō nɛ̄ɛ̄nɛ̄hi.

⁴ N le ɔkɔ gbā lɛ Óndú ā, nōo wɛ Ɔwɔicō kú um ā, n klla le íne nɛ̄ ācɛ ɔlɛ́ um bīya ā ka tɛ́ɛcɛ lɛ ɔ́. N gbɔ̄ɔkɔ lɛ ɔ́ kahíníī, “Óndú ā nōo wɛ Ɔwɔicō ā, awɔ lɔfú fíyɛ́ dúú á, a kē tūufi, alɔ lɛ ojīlīmā ce uwɔ. A ī lɛ okónu nɛ̄ a ce ā tū piyóó. A klla í ma ihɔtū nōó gē mɛ ŋ́ fú lɛ ācɛ nɛ̄ a he uwá ɔtū mɛ́mla ācɛ nēe klla gē yá ɔdā nɛ̄ a ka ā.

⁵ “Alɔ le íne kú uwɔ bīya, alɔ le ɔdōbɔ̄bí mɛ́mla ucē kú ɔ́bíipú yá. Alɔ le īkpɛ̄yí olɔfú yá tá uwɔ klla lɛ igbīhi ce kwu uwɔ. Alɔ klla kwúcē ŋmá íne mɛ́mla ɔwɛ kú uwɔ.

⁶ Alɔ í j­āhɔ̄ lɛ acomɛ́ɛbɛ, ācocɛ̄hɔ̄ kú uwɔ nēe bī iyē kú uwɔ kɛlā lɛ aɔ́cɛ́, aígabɔ̄, aádáádā alɔ, mɛ́mla odúúdú ācɛ kú ipú ajɛ kú alɔ ā ŋ́.

⁷ Óndú, a gē yá ɔdā nōo lɛ kpaakpa eko dóódu, amáŋ uwēyī nɛ̄ alɔ gē bī gé lɛ iyī alɔ á. Ɛ̄nyā wɛ ɔkwɛ̄yi kú oyēeyī kú odúúdú alɔ nēe lā Ujúda mɛ́mla ipú Ujerúsālɛm mɛ́mla odúúdú ācɛ kú Ísrɛ̄lu, nɛ̄ a fíyákátā ga ipú aéwo oligbó mɛ́mla aéwo nēe kwajaajɛ, ohígbū ka alɔ í cɛ̄ɛ̄lā kú uwɔ ŋ́.

⁸ Óndú, uwēyī lɛ aɔ́cɛ́ mɛ́mla aígabɔ̄ kú alɔ mɛ́mla aádáádā alɔ kwú ícɛ nyā, ohígbū ka alɔ le íne kú uwɔ bīya.

⁹ Óndú, Ɔwɔicō kú alɔ, a gē ményinyi klla ī je íne ō bīya yɛ́ɛhi, nááná nɛ̄ alɔ le īkpɛ̄yí olɔfú yá tú uwɔ ā.

¹⁰ Alɔ í klla ī bī ɛlā kú awɔ, Óndú ā, nōo wɛ Ɔwɔicō kú alɔ ā yúklɔ́ ŋ́, ɛ́ɛ́ nɛ̄ alɔ gē lɛyítáajɛ lɛ íne kú uwɔ nɛ̄ a je tá ajɛ lɛ alɔ bū okónu kú ācomɛ́ɛbɛ ā ŋ́.

¹¹ Odúúdú Ísrɛ̄lu lɛ íne kú uwɔ nyílá klla tá ō jāhɔ̄ lɛ ɔdā nɛ̄ a ka lɛ alɔ ā. Alɔ le íne kú uwɔ bīya. Ohígbū ɔ́ɔmā, a le okónu ō tá nēé tá tū ɔkpá kú íne kú Umósīsi, ɔ̄cocɛ̄hɔ̄ kú uwɔ ā tá lɛ alɔ.

¹² A le ɔdā nɛ̄ a ka ka anúɔ ī yá alɔ mɛ́mla aɔ́cɛ́ kú alɔ ā yá piíí. A le italā yá Ujerúsālɛm fíyɛ́ igelī nɛ̄hi ɔhá dóódu kú ipú ɛcɛ nyā.

¹³ Odúúdú italā nēé tá ipú ɔkpá íne kú Umósīsi ā nɛ̄ a yá alɔ á. Ó kōō kwu abālɔbányā nááná, Óndū ā, nōo wɛ Ɔwɔicō kú alɔ, alɔ í kōō hútū ō yá ɔdā nɛ̄ a tíne ā ɛ́ɛ́ ŋ́, ɛ́ɛ́ nɛ̄ alɔ í kē kwúcē ŋmá íne nɛ̄ alɔ gē bīya ā, cɛ́ɛ́ kú alɔ yɛce ɔwɛ nōo le kpaakpa ā glá ŋ́.

¹⁴ Awɔ, Óndú ā, nōo wɛ Ɔwɔicō kú alɔ ā kē le tútū ō yá alɔ italā. A kē le italā ā yá alɔ ɛɛ́, ohígbū ka a gē yá ɔdā nōo le kpaakpa ā eko dóódu. Alɔ í kē cɛ̄ jāhɔ̄ gā uwɔ ŋ́.

¹⁵ “Óndū ā, nōo wɛ Ɔwɔicō kú alɔ, a le ɔfú kú uwɔ mafú ɛ́gɛ́nɛ̄ a kpó alɔ bɛ̄cɛ ŋmá Íjīpiti ā. É kē ī blakwu ɔfú mɛ́mla iyē kú uwɔ̄ jāā kwu ícɛ. Alɔ le íne kú uwɔ bīya klla le ɔdōbɔ̄bí yá ɛɛ́.

¹⁶ Eko nōo ŋmá igbīhi ā, a gē cɛ̄ɛ̄pɔ̄ alɔ, ohígbū ɔ́ɔmā, ā híī cɔ̄nū mla Ujerúsālɛm igbɔhá ɛ́ɛ́ gɛ ŋ́. Igelī nɛ̄hi mɛ́mla ɛyí ɛfu otīihɔ kú uwɔ nōó wɛ á. Odúúdú ācɛ mɛ́mla aéwo nēe lā kwu alɔ ā géē yɛhɛ tū alɔ, klla í má alɔ bɛ̄ɛka ācɛ ɔdāhá klla í yá alɔ okónu ohígbū íne ō bīya kú alɔ mɛ́mla ɔdōbɔ̄bí nɛ̄ aádáádā alɔ yá ā.

¹⁷ Óndú, Ɔwɔicō kú um, pó ɔkɔ mɛ́mla ɛ̄ba nɛ̄ n ba uwɔ ā, ohígbū iyē kú uwɔ. Lɛ Agblīihɔ-nɛ̄hi kú uwɔ nōo tá alácɛ̄ ā túgwó kpɔ́ ɛ́ɛ́.

¹⁸ Jāhɔ̄ lɛ alɔ Óndú, awɔ nōo wɛ Ɔwɔicō kú alɔ ā. Lɛ eyī pīya má alɔ, ká ā má unwalu mɛ́mla ōwē nɛ̄ alɔ bá ipú nū ā. Má ōwē kú ācɛ Ujerúsālɛm, igelī nɛ̄hi nōo lé iyē kwu uwɔ ā. Alɔ ī gbɔ̄ɔkɔ gā uwɔ, ohígbū ka a gē ményīnyi ɔ̄cɛ, ó wɛ ka alɔ gē yá ɔdā nōo le kpaakpa ŋ́.

¹⁹ Óndú, kóocōō pó ɔkɔ nɛ̄ alɔ gē gbā ā. Kwú íne nɛ̄ alɔ bīya ā ú yá alɔ ɛhi Óndú, cɛ́ɛ́ ká ā jāhɔ̄ lɛ alɔ. A kpó eko bónū gɛ ŋ́ ohígbū iyē nɛ̄ a lé ā. Ohígbū ka igelī nɛ̄hi kú Ujerúsālɛm nyā mɛ́mla ācɛ nēe bā anú ā wɛ ákú uwɔ nɛ.

Ugébríyɛlu lɛ ɛyí kú ɛbɛ nēé má kú iháyí ofɛtá cigwó ā ka

²⁰ N yɔ̄ ī gbɔ̄ɔkɔ gɔbū, yɔ̄ ī ka íne nɛ̄ ami mɛ́mla ācɛ ɔlɛ́ um bīya ā tɛ́ɛcɛ lɛ Óndú ā, n klla yɔ̄ ī gbɔ̄ɔkɔ lɛ Óndú ā, nōo wɛ Ɔwɔicō kú um kóō kwú Agblīihɔ-nɛ̄hi kú nū ā ú túgwó kpɔ́ ɛ́ɛ́.

²¹ Abɔ̄ n yɔ̄ ī gbɔ̄ɔkɔ ā, Ugébríyɛlu, nɛ̄ n tɛtɛ má ipú ɛbɛ nɛ̄ n má gbɔbū ā, le wu wā ɛgiyí um. Eko nōo wā nyā, wɛ eko nēé gē gwɛ́ɛya kú ɔ̄nɔ̄ɔ̄nɛ̄ ā.

²² Anɔ́ɔ ó da um kahíníī, Udánīyɛlu, n wā amānyā gaá yá ká n̄ tá uwɔ abɔ̄ cɛ́ɛ́ ká ā géē jɛ́yí kú ɛbɛ ā.

²³ Eko nɛ̄ a gbɔɔ́ ō gbɔ̄ɔkɔ, ī ba Ɔwɔicō ɛ̄ba ā, ó lɛ ɔkɔ nɛ̄ a gbā ā pó. A he ɔ́ ɔtū nɛ̄hi, ohígbū ɔ́ɔmā, n wā gaá tá uwɔ ohi kú ɔkɔ nɛ̄ a gbā ā. Jāhɔ̄ abɔ̄ nɛ̄ n géē ka ɛyí ɛbɛ nɛ̄ a má ā gā uwɔ ā.

²⁴ Iháyí ofɛtá cigwó bá ɛga ahāapa ā wɛ eko nɛ̄ Ɔwɔicō le tū kóō hɛ́ ācɛ ɔlɛ̄ uwɔ mɛ́mla igelī otīihɔ ā tá ŋmá íne nɛ̄ ācɛ ā bīya ā. É géē je íne nɛ̄ ācɛ ā bīya ā yá uwā ɛhi, klla í lɛ ɛpɔ̄ okpaakpa kwaajɛ Ujerúsālɛm. Ohígbū ɔ́ɔmā, ɛbɛ nɛ̄ a má kú iháyí ofɛtá cigwó ā géē cɛ̄. É klla í je Agblīihɔ-nɛ̄hi kú Óndú ā kwaajɛ ɛgiyí nū.

²⁵ Lɛ ɛ̄nyā jé, ká ā klla kē lɛyí nū jé. Oŋmééko nɛ̄ Ɔwɔicō je ɔ́da kéē lɛ Ujerúsālɛm túgwó igbɔhá ā, jāā gbéeko nɛ̄ aɔ́cɛ́ nɛ̄ Ɔwɔicō fu ā géē wā ā, iháyí ahāapa bá ɛga ahāapa géē wā í gla. É klla í tá Ujerúsālɛm mɛ́mla úláyi kú nū gwó igbɔhá kpɔ́, é klla í hɛ́ igá olɔfú jīla anú tá. Ó géē yɔ̄ iháyí ofɛtá cahāapa, amáŋ eko nyā géē wɛ eko kú unwalu.

²⁶ Eko nɛ̄ eko ɔ́ɔmā mɛ, é géē ŋmó ɔcɛ́ nɛ̄ Ɔwɔicō fu ā icííci, nááná nɛ̄ igelī ā í kōō wā abɔ̄ nū ɛ́ɛ́ ŋ́ mā. Aícɔ́ɔja kú ɔcɛ́ olɔfú nɛ̄hi ā géē je igelī nɛ̄hi ā mɛ́mla Agblīihɔ-nɛ̄hi ā kpó yíífi tāajɛ ɛ́gɛ́nɛ̄ ɔkpá ī cēnyi gē kpó odée yíífi ā. Ɛfú géē yɔ̄ gē kpó jāā gbó oŋmɛ́yí kú eko ífi nɛ̄ Ɔwɔicō tútū ā.

²⁷ Ɔcɛ́ ɔ́ɔmā ī cokónu olɔfú mɛ́mla ācɛ alɛwa, iháyí ahāapa. Eko nɛ̄ iháyí ɛtá ce ɔyā ɛhīlī gaá le gla, ó gáā cɛ̄ lɛ ācɛ gwɛ́ɛya ámāŋ bī ɔdā ɛgbā wā í gbā Óndú ā ɛ̄gbā ɛ́ɛ́ gɛ ŋ́. É géē je ɔdā kú ɛbɛ ohéyī ɔ́ɔmā háyi ɛga o licō fíyɛ́ dúú kú ipú Agblīihɔ-nɛ̄hi kú Óndú ā. Ó ī ce abɔ́ɔ jāā gbéeko nɛ̄ Ɔwɔicō kwú ɔ̄cɛ nōo je ɔ́ ce abɔ́ɔ ā ú yíífi, ɛ́gɛ́nɛ̄ ó tɛtɛ miya ɔ́ táajɛ ā.”