2 ĀCƐ UTESALONÍKA 2 - Ubáyíbu kú Idɔma

Ɔ̄cɛ obɔ̄bíipú ā

¹ Abālɔbányā n tíne ō kɛlā lɛyíkwu ɛlā ɔkwɛ̄yi ka Óndú Ujísɔ̄si Ohɔ́nyɛtá géē kwúcē wā, ka alɔ géē túbá tɔ̄há mla anú ā. N gē gbɔ̄ɔkɔ lɛ aá, ayínɛ́ um,

² aá yá ɔ́ tɔ́ɔtɛ́ lɛ ācɛ kéē wu ɔtū kú aá klíico ŋ́ ámāŋ yá kú ɔtū kú aá kóō le gbájí ohígbū ɔdā nēé ka ka ɛ̄cī kú Óndú ā gā klla le yɛ ɛɛ́ ma ŋ́. Ekoōhī ŋ́ é gbɛlá ka alɔ ka lɛ ā ipú ɛbɛ nɛ̄ alɔ ī ka tɛ́ɛcɛ, ámāŋ ka eko nɛ̄ alɔ yɔ̄ ī kɛlā Ɔwɔicō lɛ ācɛ, ámāŋ ka alɔ tá ɔ̄ tū ipú ɔkpá éyi nɛ̄ alɔ tá ā.

³ Aá cɛ̄ lɛ ɔ̄cɛ dúúmā plla aá ɔwɛ dúúmā ŋ́, ohígbū ka n tíne kú aá le jé kpɔ́cíí ka ɛ̄cī nɛ̄hi ɔ́ɔmā í gáā wā ŋ́ jāā gbéeko nɛ̄ ācɛ alɛwa nɛ̄hi lɛ īkpɛ̄yí olɔfú yá tá Ɔwɔicō, mɛ́mla eko nɛ̄ ‘Ɔ̄cobɔ̄bíipú’ nōo ī tá ɔdā dóódu nɛ̄ Ɔwɔicō ka, nɛ̄ Ɔwɔicō géē je ɔ́ yíífi ipú ɔlíkɔtɔ piíí ā le bɛ̄cɛ.

⁴ Ó géē tá ɛjɛ̄ɛ̄jī alelékwū mɛ́mla ɔwɔ nɛ̄ ācɛ gē gbɛ̄ɛ̄gbā ā, cɛ́ɛ́ ó géē je iyī nū ka anúɔ lɔfú fíyɛ́ alelékwū ámāŋ ka ɔwɔ dóódu á. Ó kōō géē nyɔ̄ gáā cīce ipú Agblīihɔ-nɛ̄hi kú Ɔwɔicō kóō ka tɛ́ɛcɛ lɛ ācɛ ka anúɔ wɛ Ɔwɔicō abɔ̄yī nū á.

⁵ Aá bla gɛ ŋ́ nɛɛ? N da aá odúúdú ɔdā nōo gáā yá ā eko nɛ̄ n yɔ̄ mla aá kpɔ́ ā.

⁶ Nááná ā, ó lɛ odée nōó cɛ̄ lɛ aɔ́dā nēe bá nyā yá abālɔbányā ɛ́ɛ́ ŋ́, aá kē jé ɔdā ɔ́ɔmā. Ɛpléeko nɛ̄ Ɔwɔicō kóō le kpaakpa ā, ‘Ɔ̄cobɔ̄bíipú’ ā ī bī iyī nū wɛ̄ɛcɛ.

⁷ Odōtayínū kú ɔ́bíipu nyā gbɔɔ́ ō yúklɔ́ tayínū dúú ɛɛ́, ɔdā nōo gáā yá ā í gáā yá ɛ́ɛ́ ŋ́ jāā gbéeko nɛ̄ Ɔwɔicō kwú ɔ̄cɛ nōo yɔ̄ ī kwú odée ā tū kóō yá ŋ́ mā ŋmá ɔwɛ.

⁸ Eko ɔ́ɔmā é géē ma Ɔ̄cobɔ̄bíipú ā fú, amáŋ eko nɛ̄ Óndú Ujísɔ̄si kwúcē wā, ó géē ŋmó ɔ́ mla owu nōó í fu ŋmá okónu kú nū ā. Ó géē je ɔ́ yíífi mla ɛgahi nɛ̄hi kú ɛ́gɛ́nɛ̄ ó í wā lɛ ā.

⁹ Eko nɛ̄ Ɔ̄cobɔ̄bíipú ā gā, ó géē bī odúúdú ɔfú nɛ̄ ebilíi je lɛ ɔ́ ā le yá ɛdɔ kú ɔdā idáagó ɛ̄kɛ̄mgbɛ̄ dóódu mɛ́mla ɔdōcābɔ̄ dóódu.

¹⁰ Ó géē bī ɛdɔ ɔwɛ obɔ̄bí dóódu le pllá ācɛ nēé géē je kpó yíífi piíí, ohígbū kéē tá ō mīyɛ ɛlā ɔkwɔ̄ɔ̄kwɛ̄yi nɛ̄ Ɔwɔicō géē bī le nya uwá tá ā.

¹¹ Ohígbū ɛ̄nyā Ɔwɔicō lɛ abɔ̄ okléeyī nɛ̄hi bī wā ɛgiyí uwa cɛ́ɛ́ kéē cɛ̄ɛlā ɛ̄kɛ̄mgbɛ̄.

¹² Ɔwɔicō yá ɛ̄nyā cɛ́ɛ́ kóō lɛ odúúdú ācɛ nēé tá ka aá cɛ̄ɛ̄lā ɔkwɛ̄yi lɛyíkwu Óndú alɔ Ujísɔ̄si ŋ́, nɛ̄ íne he uwá ɔtū kéē bīya ā ŋmɛ́pɔ̄bí.

Ɔwɔicō fu aá kóō nya aá tá.

¹³ Alɔ í tá Ɔwɔicō ahínyá eko dóódu ohígbū aá piíí, ayínɛ́, nēe he Óndú ā ɔtū. Ohígbū ka Ɔwɔicō lɛ aá fu kú aá wɛ ācɛ aflɛ́yí nēé nyatá ohígbū ɛ́gɛ́nɛ̄ Alelékwū lɛ aá yá ācɛ o tīihɔ kú ɔlɛ́ Ɔwɔicō mɛ́mla ɛ́gɛ́nɛ̄ aá lɔtūkpóce ɛlā ɔ̄kwɛ̄yi ā.

¹⁴ Ɔwɔicō hī aá igwú wā ipú ɛ̄nyā bū ɔ̄kōolɔhi nɛ̄ alɔ tɔ́ɔna kú nū lɛ aá ā. Ó hī aá igwú kú aá mīyɛ ukpɛ̄ kú ɛgahi kú Óndú alɔ Ujísɔ̄si Ohɔ́nyɛtá.

¹⁵ Abɔ̄ ó le lɛ ā, ayínɛ́ alɔ, aá cɛ̄ lɛ ɔ̄cɛ dúú pīya ɔtū kú aá abɔ̄ ŋ́, aá lɛ abɔ̄ fúlá tū ɔdā nɛ̄ alɔ nwū aá ā eko nɛ̄ alɔ yɔ̄ ī kɛlā lɛ aá ámāŋ ka ipú ɔkpá nɛ̄ alɔ tá fu aá gbɔbū ā.

¹⁶ Alɔ í gbɔ̄ɔkɔ lɛ Óndú alɔ Ujísɔ̄si Ohɔ́nyɛtá abɔ̄yī nū mɛ́mla Ɔwɔicō Ádā alɔ nɛ̄ alɔ he uwā ɔtū, nōo ohígbū eyīnyinyi kú nū, tá alɔ ɔtū kwu ɔtū klla je eyīyōce kú olɔhi kpɔ́cíí lɛ alɔ ā.

¹⁷ Alɔ ba ɔ́ kóō tá aá ɔtū kwu ɔtū, kóō lɔfú tū aá iyē kú aá lɔfú bá ī kɛlā olɔhi klla bá ī yá ɔdā olɔhi.