2 USÁMUWƐ̄LU 9 - Ubáyíbu kú Idɔma

Udéfīdi mɛ́mla Umefíbōsɛti

¹ Ɛ̄cī éyi Udéfīdi le ɔ̄kā da ɔ́daŋ ka ɔ̄cɛ dúúmā hile ŋmá ipɔ́ɔnū kú Usɔ́ɔlu nɛ̄ anɔ́ɔ géē méyīnyinyi nū ohígbū Ujonátan n?

² Eko ɔ́ɔmā, ɔ̄cocɛ̄hɔ̄ kú Usɔ́ɔlu éyi yɔ̄ nēé hī iye nū ka Usíba. É le da ɔ́ ka ɔ́ɔ̄ nyɔ̄ ɛgiyí Udéfīdi. Anɔ́ɔ eko nōó ga ɛgiyí Udéfīdi ā, Udéfīdi da ɔ́ ɔ̄kā ka anú ɔ́ɔ wɛ Usíba áā? Anɔ́ɔ Usíba lɛ ɔgbá tá ɔ̄ ka anúɔ nɛ.

³ Anɔ́ɔ Udéfīdi da ɔ́ ɔ̄kā ka ɔ̄cɛ dúúmā hile ŋmá ipɔ́ɔnū kú Usɔ́ɔlu, nɛ̄ anúɔ géē méyīnyinyi nū ohígbū okónu nɛ̄ anúɔ ce lɛ Ɔwɔicō ka anúɔ géē yá āa? Anɔ́ɔ Usíba da Udéfīdi ɔcɛ́ ā ka ɔyí kú Ujonátan éyi yɔ̄ nɛ̄ ɔ́ɔ wɛ oŋmíkpó

⁴ Anɔ́ɔ Udéfīdi, ɔcɛ́ ā le ɔ̄kā da ɔ́ ka iní nɛ̄ ɔ́ɔ yɔ̄ āa? Anɔ́ɔ Usíba tá ɔ̄ ohi ka ɔ́ɔ yɔ̄ ɔlɛ́ Umákīyɛ, ɔyí kú Ámmīyēlu, ipú ajɛ kú Ulódéba.

⁵ Anɔ́ɔ Udéfīdi, ɔcɛ́ ā lɛ ɛhɔ̄ tū nyɔ̄ kéē lɛ ɔ́ bī gé lɛ ɔ́ ŋmá abɔ́ɔ á.

⁶ Anɔ́ɔ Umefíbōssɛ̄ti, ɔyí kú Ujonátan nōo wɛ ɔyɔ́ɔ́yí kú Usɔ́ɔlu ā, gā ɛgiyí Udéfīdi. Anɔ́ɔ ó má gbo kláajɛ iyɔ̄bū Udéfīdi, ɔcɛ́ ā, le ɔ́gbá tú ɔ̄ á. Udéfīdi da ɔ́ ka “Umefíbōssɛ̄ti,” anɔ́ɔ ó cɛ̄ á.

⁷ Udéfīdi da ɔ́ ka ɔ́ɔ̄ yúúfi ŋ́, ohígbū ka anúɔ í méyīnyinyi nū ohígbū ádā nū Ujonátan. Ó ka anúɔ géē kpó odúúdú ajɛ kú ádā kú ádā nū, Usɔ́ɔlu, lɛ ɔ́. Ó klla da ɔ́ ka ɔ́ɔ géē yɔ̄ ī lé ɔdōlé mɛ́mla anúɔ eko dóódu.

⁸ Anɔ́ɔ Umefíbóssɛ̄ti tukpɛɛ́ le ágbá tá ɔ́ yɔ̄ ī ka ka anúɔ í lɔhi fíyɛ́ okwū ewō ŋ́, ɔdíyá nɛ̄ ɔ́ɔ gē yá ɔdā olɔhi lɛ anúɔ āa.

⁹ Anɔ́ɔ Udéfīdi lɛ Usíba hīīgwú, anɔ́ɔ ó da ɔ́ ka anúɔ géē kpó ɛjɛ̄ɛ́jī ɔdā dóódu nēe wɛ ákú Usɔ́ɔlu mɛ́mla ákú ipɔ́ɔnū kú nū ā lɛ Umefíbōssɛ̄ti, ɔyɔ́ɔ́yí kú ɔkpani nū.

¹⁰ Udéfīdi klla da ɔ́ ka anú, mɛ́mla ayí nū nɔ̄nyīlɔ, mɛ́mla ācocɛ̄hɔ̄ kú ɔlɛ́ nū, ɛ́ɛ géē hí ajɛ kú ipɔ́ɔnū kú ɔlɛ́ ɔkpani nū Usɔ́ɔlu, cɛ́ɛ́ ka ɔ́ɔ̄ bī ɔdōlé ŋmá anú lɛ uwá. Ó klla da ɔ́ ka amáŋ Umefíbōssɛ̄ti abɔ̄yī nū ɔ́ɔ géē yɔ̄ ī wā í lé ɔdōlé mɛ́mla anúɔ ojigógó. (Usíba lɛ ayínɔ̄nyīlɔ igwɛ́ɛhɔ̄ mɛ́mla ācocɛ̄hɔ̄ ofu.)

¹¹ Anɔ́ɔ Usíba da Udéfīdi, ɔcɛ́ ā, ka ɔdā dóódu nɛ̄ ɔcɛ́ ɔ́ɔ da anúɔ, anúɔ géē yá. Anɔ́ɔ Umefíbōssɛ̄ti gē lé ɔdōlé mɛ́mla ɔcɛ́ bɛ̄ɛka éyi kú ayínɔ̄nyīlɔ kú ɔlɛ́ nū á.

¹² Umefíbōssɛ̄ti lɛ ɔyínɔ̄nyīlɔ éyi nēé hī ka Umíka. Anɔ́ɔ o ŋmá eko ɔ́ɔmā gɔbū ā, odúúdú ipɔ́ɔ́nū kú Usíba kwú pīya ācōcɛ̄hɔ̄ kú Umefíbōssɛ̄ti á.

¹³ Anɔ́ɔ Umefíbōssɛ̄ti nōo wɛ oŋmíikpó ā má lā Ujerúsālɛm, ohígbū koó gē lé ɔdōlé mɛ́mla ɔcɛ́ eko dóódu.