Marku 2 - Etkwen New Testament

Yeso è gwano ya modwa-edan ebgen mbwe nè matswa ye

¹ Chashin mo be tsǝnò nwofyan, Yeso è twabǝ ken a Kapanahum, be nobǝ è fo jan ge no a mu.

² Be nobǝ embo è bwa mbo shi tswa àtá hon a gè no a ángá, zǝn a ba kwa a shi chá tafǝmo è mbo binbin ngge be nobǝ. Yeso è no jan be fwa mo Ehwya anga.

³ Nobǝ ndwe è tso ya modwa-edan akan ti bwa a zǝn.

⁴ Adia be nobǝ è fifi ara ángá, bè ben be efwa a be ti kwa a shi a zǝn Yeso ra. Enona, bè tonvǝ́ tkofwi edu a chu ba mo àtá, a chu zǝn a Yeso è no ángá, nè ti ya modwa hon éè dwano a chu sǝ ángá, du shi adi edu hon ngge sǝ hon, shi a zǝn a Yeso è no ángá.

⁵ Atan a Yeso è di chaebi mo be ya è ti ye bwa ángá, gè jan ya modwa-edan hon jan, “Nobǝ, be gwano ara o be ebgen mbo.”

⁶ Atan enò, be etumo mo edon mo Mosa ya ehwyà ya è no a zǝn ángá, è kwa ara fwa ekam a tsuruku mo be jan,

⁷ “Ano bwe a ge ende ena jan fwa enò? Gè jan ara ejanpin. Kpwà Ehwya tete e gwano be ebgen anga.”

⁸ Kè akan, Yeso è yi ara a tsuruku mbwe, mò a be ka anga a tswa tsuruku mo be, nè jan, “Ano bwe a ge nye ka shwa yishwa enò anga?

⁹ Nwene e shàn ti ara be e jan ya modwa-edan hon anga a ani, ‘Be gwano ara o ebgen mbo nè’, eno e ra, ‘Nyi etkyen, fǝ sǝ mbo we nya?’

¹⁰ Tea evǝa nye e yi jan Nwen Nobǝ no ngge emwentì a tswa zǝnchaje ge e gwa e no be ebgen.”

¹¹ Kǝnggwa, gè jan ya modwa-edan hon, “M jan o nyi etkyen, fǝ sǝ mbo we nya a mu.”

¹² Kè akan, gè nyi etkyen, fǝ sǝ mbwe, nè kenkèn vǝ́ a je a fǝzǝn mo be ya è no a zǝn ángá binbin. Mò ena è kǝn egwa egwa nya. Bè tàn Ehwya nè jan, “Je chà didi je yishwa mò ena ra.”

Yeso fǝ́ Lawi dwa ge e no etsonchi mbwe

¹³ Nò kè akan efwe, Yeso è ken a tón edan a Galili. Be nobǝ embo è bwa fǝn a zǝn ye. Gè kwa ara be moetum.

¹⁴ Abu gè no ken anga a tón edan hon, gè di Lawi nwen Alfiyu chuno a afku mo tse-eten echam. Yeso è jan ye jan, “Ba m.” Lawi è nyi etkyen nè ba ye.

¹⁵ Beti bishi nò eni, Lawi è fǝ́ Yeso dwa tangge be etsonchi mbwe ken a mbwe ye, evǝa be e de mode. Be ya tse-eten echam embo ngge be ya ebgen efki, è de mode anga ngge ge, adia be nobǝ embo è ba ye anga.

¹⁶ Atan a be etumo mo edon ya éè no adi etso mo be Farisi, è di ye gè de mode anga ngge be ya tse-eten echam ngge be ya ebgen ya ehwyà ángá, bè ká be etsonchi mbwe eka jan, “Ano bwe a ge ge de mode anga ngge be ya tse-eten echam tangge be ya ebgen ya ehwyà?”

¹⁷ Atan a Yeso è fo gu fwa ena, gè jan be jan, “Fwa ye ya etkwaju e nda ematwa anga ra, kpwà ya modwa. M̀ bwa m evǝa me e fǝ́ ya ebitete dwa ra, kpwà be ya ebgen.”

Bè ká Yeso eka a chu vǝ etsem

¹⁸ Engga a be ya è ba Yohana anga ngge be ya è ba be Farisi, è tse vǝ anga, be nobǝ ya ehwyà è bwa ká Yeso eka jan, “Ano bwe a ge be ya e ba Yohana ngge be ya e ba Farisi tse vǝ anga, tea be ya e ba o anga, tse be vǝ ra?”

¹⁹ Yeso è janfwe be, “Be ya echan mo edon-gwa a tse vǝ atan a ge chà no ngge be ángá? Ba tse be vǝ ara, chìchì mo nó atan a ge chà no ngge be ángá.

²⁰ Tea ekpengga nyabwa atan a ba ti edon-gwa hon chafya mo be, kǝnggwa engga hon ba tse vǝ.

²¹ “Nobǝ a ban ye mokàn ehwe ngge eta adanmo efwe ra, ano ge bwe enò, eta adanmo efwe hon, a fǝ́n n vǝ a ngga a ju mu eta adanmo ehwe hon na du evǝnggam hon twa a fǝ̀ nwone è no ekwafya ángá.

²² Efwe, ba ti be mbǝ enabi efwe ti a gu be adi etsǝn kpumo ehwe ra. Adia mbǝ enabi hon a sǝ́ n kǝn a bwi etsǝn kpumo mo mbǝ enabi hon. Etsǝn kpumo hon tangge mbǝ enabi hon dì a gu. É yé, mbǝ enabi efwe, be ti gu anga adi etsǝn kpumo efwe.”

Yeso no Etsodwe mo Nò nya Etkem

²³ Nò nya Etkem mo ya a Yahuda, Yeso è twafǝ̀ nyaken a tswa kpèn alkama ngge be etsonchi mbwe, abu bè no ken anga, be etsonchi mbwe è kwa ara fwen alkama hon ekpanm.

²⁴ Kǝnggwa, be Farisi è ká ye eka jan, “Fo, ano bwe a ge be etsonchi mbo bwe mò a edon cha ye dwa je e bwe Nò nya Etkem ra?”

²⁵ Gè janfwe be jan, “Nye chà ka nye mò a Dawuda ngge ya bè no abibi è bwe atan a mbe è fu be, ngge bè nda mode anga ra?

²⁶ Adi ekpengga mo Abiata, Chu mo ekǝ́n, Dawuda è kwashi a Àtá mo Ehwya nè de borodi nwone be ekǝ́n de a kpwà nó a be. Gè no èé be ya è no abibi ngge ge ángá.”

²⁷ Yeso è jan be jan, “Nò nya Etkem hon bè bwe nó ḿ mo nobǝ, fwa ye nobǝ no ḿ mo Nò nya Etkem ra.

²⁸ Enona, Nwen Nobǝ no Etsodwe èé ḿ mo Nò nya Etkem.”