Milimo 2 - Ibbaibele 1963

Imbungano mboyakabapatizigwa a-Muuya Uusalala

¹ Nobwakasika buzuba bwa-Pentekoste, bakali antoomwe boonse,

² Ndilyonya kwakazwa mujulu muzunzumina mbuli guwo ilyuungisya, wakazuzya ŋanda yoonse mobakakede.

³ Kwakabasikila milaka; iili mbuli mulilo, yakabakala umwi umwi.

⁴ Boonse bakazyula Muuya Uusalala, batalika kwaamba myaambo imbi, mbubonya mbwaakabaambya Muuya.

⁵ Eno kwakaliko mu-Jerusalemu ba-Juda, bantu basyomi abakazwa kumasi oonse enyika.

⁶ Nokwakamvwigwa muzunzumina oyo, akabungana makamu makamu aabantu, bazingwa nkaambo umwi umwi wakabamvwa balaamba mwaambo wakwe mwini.

⁷ Baankamana, bayoowa bati, Sena aba abaamba tabali ba-Galilaya boonse?

⁸ Kuli buti ino, twamvwa toonse mwaambo wesu ngotwakazyalilwa?

⁹ Toba-Pati aba-Midi aba-Elami, tobamwi totukala ku-Mesopotamiya, ku-Judaya, aku-Kapadokiya, ku-Ponto aku-Asiya,

¹⁰ ku-Frugiya aku-Pamfuliya, ku-Egepita ezisi zya-Libiya izibambene a-Kurene, tobeenzu totuzwa ku-Roma, toba-Juda antoomwe abakasanduka,

¹¹ toba-Krete aba-Arabiya, twabamvwa balaamba milimo mipati ya-Leza mumyaambo yesu,

¹² Nkabela boonse bakaankamana, bazingwa, babuzyanya kuti, Ino eci cili buti?

¹³ Bamwi basabula bati, Bakuta mbote iilweela.

¹⁴ Kwalo Petro wakaima abaapostolo abali ikumi muumwi wakoompolola, wakati, Nobaalumi baku-Judaya, anywebo nyoonse nomukala mu-Jerusalemu, azibwe ndinywe makani aya, muswiilile majwi aangu.

¹⁵ Aba tabakoledwe pe, mbuli mbomuyeeya, ciindi cicili cacikasaalizi buyo.

¹⁶ Pele eci ncencico ncaakaamba musinsimi joeli kuti,

¹⁷ Leza ulaamba kuti, Kumazuba aakumana Ndiyootila Muuya wangu atala lyabantu boonse, Bana banu balombe abasimbi bayoosinsima, Baalumi banu bapya bayoobona zilengaano, Abanene banu bayoolota ziloto.

¹⁸ Atala lyabacinkombwa bangu baalumi abakaintu, Ndiyootila Muuya wangu kumazuba ayo, Bayoosinsima.

¹⁹ Ndiyootondezya malele mujulu, Azitondezyo ansi, Bulowa, amulilo, asikunku wabusi.

²⁰ Izuba liyoosanduka kusia, Amweezi uyoosanduka bulowa, Kabutanasika buzuba bwa-Jehova, Obo bupati bulemu.

²¹ Kuyooba kuti umwi umwi uukomba muzina lya-Jehova uyoofutulwa.

²² Nobaalumi ba-Israyeli, amuswiilile majwi aya, Ngaa-Jesu wa-Naza-reta, mwaalumi ngomwakatondekelwa Leza, emilimo mipati amalele azitondezyo, Leza nzyaakacita anguwe akati kanu, mbubonya mbuli mbomuzi nobeni.

²³ Walo wakaabwa, mbubonya mbuli Leza mbwaakakanzide akuziba, nywebo mwakamubambuzya akumujazya maanza aabatakwe mulao.

²⁴ Pele Leza wakamubusya, wamwaangulula kumapenzi aalufu, nkaambo taakwe lwali kukonzya kuti lumujate.

²⁵ Davida ulaamba aanguwe kuti, Ndakabona Jehova lyoonse uli kubusyu bwangu, Uli kululyo lwangu kuti entazunganizigwa.

²⁶ Aboobo moyo wangu wabotelwa, Mulaka wangu wasekelela, Alimwi mubili wangu unookede alulangililo,

²⁷ Nkaambo tokooyoosia muuya wangu kucikalilo cabafwa, Tokooyooaba Uusalala wako kuti abone kubola.

²⁸ Wandizibya nzila zyabuumi, Uyoondizuzya akubotelwa kubusyu bwako.

²⁹ Nobaalumi bakwesu, ndimulungulwide aamupati Davida, kuti wakafwa akuzikwa, cuumbwe cakwe nkocili kulindiswe asunu,

³⁰ Aboobo mbwaakali musinsimi, wakali kuzi kuti Leza wakakonka kulinguwe acikonko cakuti, kubana bakwe kuyoozwa umwi uuti kakale acuuno cakwe cabwami,

³¹ eno mbwaakabona obo, wakaamba aakubuka kwa-Kristo kuti muuya wakwe tuukasiidwe kucikalilo cabafwa, mubili wakwe tuukabolede.

³² Oyu Jesu Leza wakamubusya, swebo toonse tuli bakamboni bamakani aya.

³³ Mbwaakasumpwidwa kujanza lyalulyo lya-Leza, alimwi mbwaakatambula kuli-Wisi cisyomezyo ca-Muuya Uusalala, watila eci ncomubona ancomwamvwa.

³⁴ Nkaambo Davida takainkide kujulu, pele ulaamba mwini kuti, Jehova wakaambila Mwami wangu wati, Kala kujanza lyangu lyalulyo.

³⁵ Mane nkacite basinkondonyoko Babe citandabalilo camatende aako.

³⁶ Aboobo iŋanda yoonse ya-Israyeli izibisye kuti oyu Jesu nguwenya ngomwakabambula, Leza wamucita abe Mwami a-Kristo.

³⁷ Nobakamvwa obo bakayaswa kumyoyo, bati kuli-Petro akulibamwi baapostolo, Nobaalumi bakwesu, ino tucite buti?

³⁸ Ndilyonya Petro wakabaambila kuti, Amusanduke, mubapatizigwe umwi umwi muzina lyaJesu Kristo, mujatilwe zibi zyanu, nomwati tambule cipego ca-Muuya Uusalala.

³⁹ Nkaambo cisyomezyo cili kulindinywe, akubana banu, akuliboonse abali kule, mbati kaite Mwami Leza wesu,

⁴⁰ Amakani amwi manjimanji wakabakananina akubakombelezya wati, Amulifutule kulibasunu ababisya.

⁴¹ Mpoonya abo abakatambula makani aakwe bakabapatizigwa, mbubonya buzuba obo bakayungililwa bantu bati kabe myaanda iili makumi otatwe,

⁴² Balo bakacilisungweede mukwiisya kwabaapostolo, amukuswaana muuya, amukukomona mukamu, amukukomba.

⁴³ Bantu boonse bakasikilwa kuyoowa. Malele azitondezyo zinjizinji zyakacitwa baapostolo.

⁴⁴ Boonse basyomi bakali antoomwe, basanganya zyoonse nzobali kujisi,

⁴⁵ bauzya lubono lwabo ezintu zyabo, baabana boonse mbuli kubula kwaumwi umwi.

⁴⁶ Mazuba oonse bakali kusungweede amoyo omwe muntempele, akukomona mukamu mumaanda aabo, balya zilyo zyabo akubotelwa amyoyo iituba,

⁴⁷ balalumba Leza akukonda bantu boonse, Mazuba amazuba Mwami wakabayungilila abo abali kufutulwa.