फिलिप्पी INTRO1 - ह्योल्मोछ्य़ेगी ङोहस्यी फिलिप्पी माएँ क्याहसा ग्रीस क्याहल-खापला पार तीएँ। माहङबुराङ रोमी मिहया़ ओहले माक्मीया़ ओ़ह क्याहसाला तेहक्यो सोङबे फिलिप्पी क्याहसाला रोम क्याहल्बुगी ओङ छ्य़ेक्यो येहकें। (ल़ेह-पेन १६:१२)। दि क्याहसा माकेडोनियाकी चा़ छ्येस्यो क्याहसा यिहम्बा। पावल लेहमा ङ्यिपाकी पा़लोला या़हबु लेहङगु स्येच्येला डोएँमु खो फिलिप्पी क्याहसाला लेप्क्यो येहकें। ओ़ह ती़हजीला यूरोप क्याहल-खाप छ्यिम्बुला मास्यीकाकी लेहङगु या़हबु स्य़ेक्योदी दि तोहङस्यो पा़लो यिहन्गे। दि ल़ेहमु पेहती मास्यीकापा छ्य़े-ठिम एसियालेगी यूरोप थु फेल्दी काहल्सीन। मास्यीकापा छ्य़े-ठिम एशियाला छ़ूक्यो सोङबे दि नुहप ङो़गी छ्य़े मिहम्बा। ज्याल्गा च्यी़गी पेहती पावल तोहङले फिलिप्पीला काहल्सीन, ओ़ह ज्याल्गाला माकेडोनियाकी मेहन्दा च्यी़गी “माकेडोनियाला फेप नाङदोङ, ओहले ङ्यिहला रो़हराम जे नाङदोङ” म़ेदी माक्यो येहकें (ल़ेह-पेन १६:९-१०)। पावलगी दि यिहगी राहङ चोन-खाङला छ्यिक्योकी ती़हजीला प्रुहक्यो येहकें। माहङ-छ्येवा बाइबलकी ख्येम्बा ताहक्पुया़गी साम्लुला दि छ्य़े एफिसीया़, कलस्सीया़ ओहले फिलेमोनला प्रुहक्योगी यिहगीया़ ङ्याम्बुराङ दि छ्य़ेॱआङ मिह-लोह (ईस्वी सम्बत्) ६२-६३ ला रोमलेगी प्री़हदे ताङग्यो यिहम्बा। दि छ्य़ेला येहकेन्गी चा़ छ्यिम्बु ने़जोया़ ङोहस्यी १:१-११ पावलकी क्यिदु १:१२-२६ मास्यीकाला येहकेन्गी मिहली १:२७–२:१८ तिमोथी दाङ इपाफ्रोडिटसकी तेहन्दाला ज़ोक्योकी च्याहम्दा २:१९-३० टाह पेहकें मिहया़ यिहन्ज्यु जेम कोहएँ ३:१–४:९ पावल दाङ फिलिप्पी रो़हया़ ४:१०-२० ताम था़-छ्येक्यो ४:२१-२३ |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.