फिलिप्पी 4 - ह्योल्मोपावलगी लोप्ताम क्याहप्क्यो 1 ओ़ह सोङबे ङाहगी च्याहम्बा पेहक्योकी आदा-नो़ह दाङ आज्यी-नुहमुया़, ख्या दि ल़ेहमुराङ पेहती चो़वोला थिक-चि पेहती तेहतोङ। ए ङाहगी रो़हया़ ङाह ख्याया़ला निङज्यी पेहकें, ङाहगी ख्याया़ला ज्यिबुराङ टेहम्बा साल्दी येहबा। ख्याया़राङ ङाहती सेम काहसो दाङ पेस्यो यिहम्बा। 2 ङाह आज्यी इयोदिया दाङ सुन्तुखेला चो़वोकी छेनला थिन्दी तेहतोङ म़ेदी ओहर-छ्य़े स्युहउ येह। 3 ङाहगी यिह-छ्य़ेबु दाङ ङाह ङ्याम्बुराङ ल़ेह पेहकेन्की रो़ह, ख्येगी दि आज्यी ङ्यी़ला रो़हराम पेह तेर म़ेदी ङाह ख्येला ओहर-छ्य़े स्युहउ येह च्यिबेमाना खुङगी ङाहला ज्यिबुराङ रो़हदी पेहती येह ओहजे च्यी़राङ मिहम्बा या़हबु लेहङगु स्येकेन्गी ल़ेहला ङाह ङ्याम्बुराङ ल़ेह पेहकेन क्लेमेस दाङ ङाहती लेहमेन रो़हया़ ङ्याम्बुॱआङ कादुप च्येती ल़ेह पेहसीन, ओ़ह रो़हया़गी मिहन नाहमॱआङ मिहस्यीएँ मिहलीगी छ्य़ेला प्री़हदे येहबा। 4 चो़वोकी छेनला नाहम-माना काहसो पेहतोङ। ङाह येहपाराङॱआङ माएँ, काहसो पेहतोङ। 5 ख्याया़ ना़स्यीङ छ्यिम्बु पेहती तेह, दि ताम मिह थाम्ज्यीगी क्यी़ह ज्योर्च्यु। चो़वो ग्यो़बाराङ फेप्च्ये येह। 6 च्यि से़हगी तेहन्दालाॱआङ तुहङाल माहबे, यिहॱनाङ ख्याला च्यि कोहपु काहल्दी येहबा ओ़हगी तेहन्दाला किन्ज्यो ङ्याम्बु सोल्वाङ ताप्तोङ ओहले थुज्यी-छ्ये़ फुल्दी ओहर-छ्य़े स्यी़हदोङ। 7 ओहले मिहगी नोम्साङ ताङदीॱआङ ताङॱराङ मी़हखुएँ किन्ज्योकी स्य़िहदेगी ख्यागी यिह दाङ सेमला येशू मास्यीकाला सी़दे ज़्या़ नाङज्ये येह। 8 ज्युक्स्योलला आदा-नो़ह दाङ आज्यी-नुहमुया़, का़हन्दी ताम तेहम्बा येहबा ओहले चा़ पेहच्येला सी़हएँदी येहबा ओ़ह से़हला सेम ताङदोङ। का़हन्दी स़ेह ठिमला ते़बे या़हबु येहबा, चाङमा येहबा, चेवा पेहच्येला सी़हज्ये येहबा, चा़ छ्यिम्बु येहबा ओहले क्या़ज्येला सी़हज्ये येहबा ओ़ह से़हया़ला सेम ताङदोङ। 9 ङाहगी लोप्क्योकी तामया़ ता़ह ख्यागी स्य़े सिहन्दी येह, लेहन्दी येह ओहले ख्यागी थे़ॱआङ थ़ेसीन ओहले ङाहती मिहलीलाॱआङ थोङसीन ता़ह ख्याया़गीॱआङ ओ़हदीॱराङ पेहतोङ ओहले स्य़िहदे नाङगेन्गी किन्ज्यो ख्या ङ्याम्बु ज़्य़ू नाङज्ये येह। डेल्बाकी तेहन्दाला थुज्यी-छ्ये़ 10 चो़वोला ङाहती सेम ज्यिबुराङ काहसो येह। ङ्यिहमा माहङबुराङ तिङले येहपाराङ ङाहला चारा पेहच्येला ख्याया़ला लोहङ ज्योर्सीन। दि माक्योगी तेहन्दादी ङाहला ख्यागी चारा माहबे म़ेदी माक्योती मिहम्बा यिहॱनाङ चारा पेहच्येला ख्याला लोहङ माहन्ज्योर येहकें। 11 कोहपु काहल्सीन म़ेदी ङाहगी ख्याला माक्यो मिहम्बा, च्यिबेमाना क्यिपु-तुहक्पु काह-ठि येहॱनाङ ङाहगी ओ़हला सेम सेन्दोक पेहच्ये लोप्ती येह। 12 कोहपु डोॱनाङ, बोलो-छ्योलो येहॱनाङ, टेहपा काहङग्यो येहॱनाङ, तो़क्यो येहॱनाङ, माहङबु येहॱनाङ, ङ्ये़हमु येहॱनाङ काहन्डुमु ती़हजीला माॱनाङ ङाहगी सेम सेन्दोक पेहकेन तिहङ-रिहङबुकी ताम लोप्ती येह। 13 च्यिबेमाना ङाहला ओङ नाङगे मास्यीका लाहमलेॱराङ ङाह ना थाम्ज्यी पेह ख़ूएँ। 14 यिहॱनाङ ङाहगी तुहक्पु ङ्युहङगेमु ख्याया़गी रो़हराम पेहती ख्यागी ज्यिबुराङ या़हबु पेहसीन। 15 तोहङस्यो ङाहगी या़हबु लेहङगु स्येती माकेडोनियाले थेन्दी डोएँमु ङाहला रो़हराम पेहकेन छेन्छोक ख्या च्यी़राङ येहकें। ओ़ह ख्याया़ला क्यी़हराङ येह। तेर्केन-लेहन्गेन्गी ल़ेहला ख्याया़ च्यी़राङ ङाह ङ्याम्बु येहकें। 16 च्यिबेमाना ङाह थेसलोनिकेला येहकेंमु ख्याया़गी ङाहला लेहमा च्यी़ म़ेदी माहङबु डेल्बा ती़हदी ताङसीन। 17 ङाहगी डेल्बा छोल्ग्यो मिहम्बा, यिहॱनाङ ख्यागी ङाहला रो़हदी पेहती ख्याया़गीॱराङ मेलाम ज्योर्च्यु माएँ ङाहती सेम्बा येहबा। 18 ङाहगी ज्योर कोहएँ म़ेदी माहङबु ज्योर्ती येह। ख्यागी इपाफ्रोडिटसकी लाहक्पाला ताङग्यो डेल्बाया़ ज्योर्ती ङाह दाङस्यी काहल्दी येह। दि डेल्बा तेर्ती ख्यागी किन्ज्योला थु काहसो ज़ोएँगी छ्येपा फुल्सीन, दि डेल्बा किन्ज्योला टिहमा स्यिहम्बु खाएँगी स्युक्पा फुल्ग्यो ल़ेहमुराङ काहल्सीन। 19 ङाहती किन्ज्योगीॱराङ ख्याया़ती कोहपु काहल्ग्यो से़हया़ छाङबु ज़ो नाङज्ये येह। मास्यीका येशू ङ्याम्बु येहकेन किन्ज्योकी नाहमॱआङ मे़ह-चो़हएँकी क्युह लाहमले ख्याया़ला कोहएँगी से़हया़ नाङज्ये येह। 20 ता़ह ओहराङगी किन्ज्यो दाङ याहपला नाहम्स्यी किन्दुॱराङ ज़िज्यिद ओहङज्यु! आमेन। तिङस्यो टास्यी-देले 21 मास्यीका येशूला येहकेन थाम्ज्यीराङ नाम्पार-ताहक्पा मिहया़ला ङाहती टास्यी-देले मे तेर। देला ङाह ङ्याम्बु येहकेन नो़हया़गीॱआङ ख्याया़ला टास्यी-देले ताङदे येह। 22 मास्यीका येशूकी थाम्ज्यीराङ नाम्पार-ताहक्पा मिहया़गी ओहले खास पेहती रोमी स्युहङगी क्याहल-गाङला तेहकेन किन्ज्योला यिह-छ्य़े पेहक्यो मिहया़गी टास्यी-देले ताङदे येह। 23 चो़वो येशू मास्यीकाकी काटीन ख्या थाम्ज्यी ङ्याम्बु ज़्य़ू नाङज्यु। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.