फिलिप्पी 3 - ह्योल्मोतेहन्दामकी टाहङदेन 1 ज्युक्स्योलला आदा-नो़ह दाङ आज्यी-नुहमुया़, चो़वोला ख्याया़ सेम काहसो पेहतोङ। ख्याया़ला ओ़ह तामया़ येहपाराङ लो़री क्याहप्ती प्रुहज्येला ङाह छेर्स्यी मेहबेएँ। दिगी ख्यागी यिह-छ्य़ेला थार च्य़ूगे। 2 क्यिबुया़ यिहन्ज्यु जेम्बु पेह, ल़ेह चोक्पा पेहकेनया़ यिहन्ज्यु जेम्बु पेह ओहले ज़ुबुला स्या-ताक पेहकेनया़ यिहन्ज्यु जेम्बु पेह। 3 तेहन्दामकी स्या-ताक पेहकेनया़नी ओहराङया़ गा यिहम्बा च्यिबेमाना ओहराङ किन्ज्योला नाम्स्यी लाहमले छ्येपा फुल्गे ओहले मास्यीका येशूकी छेनला छ्य़ेन्दो तेन्गे। ओहले ज़ुबुला स्या-ताक पेहकें तामला ङ्यिह यिह मे़हछ्येएँ। 4 माज्येराङ माना ङाह राहङगी राहङला ज़ुबुला स्या-ताक पेहकेन्की ल़ेहला यिह छ्य़ेगेन्गी तेहन्दा येहबा। लेहमेन मिहगी ज़ुबुला यिह छ्य़ेगेन्गी तेहन्दाया़ येह म़ेदी ने़सीमाना, ङाहतीनी जेन माहङबु तेहन्दाया़ येहबा। 5 ङ्यिहमा क्य़ेहला ङाहती स्या-ताक काहल्ग्यो यिहम्बा। क्यी़हराङ ताज्ये मानानी ङाह बेन्यामीन छाङकी इस्राएल क्यिहपाती यिहम्बा, हिब्रूया़दीॱआङ हिब्रू, छ्य़े-ठिमकी तेहन्दाला माज्ये माना फरिसी यिहम्बा। 6 स्युक तेन्गेन्की तेहन्दाला माज्ये मानानी थाम्ज्यी म़ेदी माहङबु छेन्छोकला तुहक्पु तेर्केन मिह ङाहराङ यिहन, टाहङदेनकी तेहन्दाला माज्ये माना छ्य़े-ठिम ची़दे किन्ज्योकी दिनला ठाबे सी़हक्यो मिहॱआङ ङाहराङ यिहन। 7 यिहॱनाङ काहजे ताम ङाहती तेहन्दाला ख्येप्साङ येहकें, ओ़हनी ङाहगी मास्यीकाकी तेहन्दाला स्यिती काम्बुलाराङ थोङसीन। 8 तेहम्बाराङ माज्ये माना मास्यीका येशू ङाहती चो़वोला ङोह स्य़े ङ्युहङगेन मेलाम तादाङलानी ना थाम्ज्यीराङ से़हया़ ङाहगी स्यिती काम्बुलाराङ थोङसीन। मास्यीकाला ज्योर ख़ूज्यु म़ेदी मिहरोगी तेहन्दाला ङाहगी रेबेॱराङ से़हया़दी क्यी़ह खुर्ती येहबा, ओ़ह रेबेॱराङ से़हया़ ङाहगी तेहन्दाला ङ्योहक्तोङ यिहम्बा। 9 ओहले ङाह मिहरो ल़ेहमुराङ काहल्ग्यो थोङज्यु। छ्य़े-ठिम ची़दे किन्ज्योकी दिनला ठाबे सी़हगेन ङाह राहङदीराङ टाहङदेन मिहन। यिहॱनाङ ता़ह किन्ज्योगीॱराङ ङाहला मास्यीकाला तेहपा नाङग्यो सोङबे ठाबे सी़ह च्य़ू नाङगे। दि टाहङदेन तेहपाला छ्या़दी येहबा। 10 ङाह मास्यीकाला ङोह स्य़े ख़ूज्यु ओहले मिहरो टोहङदे येहपाराङ सोम्बो ज़्याङ नाङग्योकी ओङला ङाहगी ङे़स्यी स्य़े ख़ूज्यु, मिहरोगी तुहक्पु खुर नाङग्यो ल़ेहमु ङाहगीॱआङ तुहक्पु खुर ङ्युहङज्यु ओहले मिहरो टोहङ नाङगेन्गी ङ्यिहमा थु ङाहॱआङ मिहरो ल़ेहमु ओहङ ख़ूज्यु 11 ला़ खासीमाना स्यिक्योया़लेगी ङाह सोम्बो लाहङ ख़ूज्यु। ते़ च्य़ूक्यो ग्या़ ङो़ले डो कोहएँ 12 ङाहगी दि से़हया़ तोहङलेराङ ज्योर सिहन्दी येह, ङाह तोहङलेराङ याहङ-ताहक्पा काहल सिहन्दी येह म़ेदीनी मिहम्बा, यिहॱनाङ ओ़ह से़हया़ला ज़ुङज्येकी तेहन्दाला ङाह तोहङदा-तोहङ स्युक पेहती छ्योङगेराङ येह ओ़ह से़हया़गी तेहन्दालाराङ मास्यीकागी ङाहला ज़ुङ नाङसीन। 13 आदा-नो़ह दाङ आज्यी-नुहमुया़, ङाहगी दि थाम्ज्यी ज़ुङ सिहन्दी येह म़ेदीनी ङाह मेहमाएँ, यिहॱनाङ ङाह ल़ेह च्यी़ पेहकें, काहल सिहन्ग्योकी तामया़ टेहम्बा च्येहती ता़ह ङाहती दिनला येहकेन्की से़हया़ ङो़ले सेम ताङगे। 14 ओ़ह सोङबे स्यिहङगामकी च्याहगा ज्योर्केन छ्याप्स्यीगी ते़-च़ूक्यो ग्या़ ङो़ले ङाह छ्योङगेराङ येह। दिगी तेहन्दालाराङ किन्ज्योगी ङाहला मास्यीका येशू लाहमले क़े क्याहप नाङग्यो यिहम्बा। 15 ओहराङ यिह-छ्य़ेला सान्दी काहल सिहन्ग्योया़गीती दि ल़ेहमुराङ सेम थो़ कोहएँ, ओहले लाहलाती लेहमेनॱराङ नोम्साङया़ येहसीमाना किन्ज्योगीॱराङ ख्याया़ला प्रा साल नाङज्ये येह। 16 च्यि यिहॱनाङ ओहराङ दि थु काह-ठि पेहती लेप्पा ता़ह ओ़हठीॱराङ पेहती याहर याहर डो कोहएँ। 17 ए आदा-नो़ह दाङ आज्यी-नुहमुया़, ख्याया़गीॱआङ ङाहगी ल़ेहमु पेहतोङ। ङ्यिह ख्याया़गी तेहन्दाला या़हबु पे च्यी़ काहल्दी येहबा। ओ़ह सोङबे ओ़ह पे-ला ते़बे डोलु-तेहलु पेहकेनया़ला ख्यागी तिङ ङ्यादोङ। 18 ङाहगी लेहमा माहङबुराङ स्य़े सिहन्ग्यो मिहया़गी तेहन्दाला येहपाराङॱआङ ङाह मिज्यु ताङदी ख्याया़ला माउ येह खुङ मास्यीकाकी क्याहङस्यीङकी टाहया़गी ल़ेहमुराङ पेहती राहङगी मिहजी ताङगे। 19 ता़ह खुङ ज्युक्स्योलला ङ्याल्वाला छ्यिच्ये येह च्यिबेमाना फोवाराङ खुङदी ल्हा यिहम्बा। खुङ राहङगी ङोहजागी तामया़ला छ्य़ेन्दो तेन्गे। ओहले खुङ जाम्बुलीङगी दि ल़ेहमुराङ से़हया़ थो़ला सेम च्याङगे। 20 यिहॱनाङ ओहराङनी स्यिहङगामकी नागरिकता ज़्योरक्योगी मिह यिहम्बा। थार्पा नाङगेन ओहराङगी चो़वो येशू मास्यीका स्यिहङगामले फेप नाङगे म़ेदी ओहराङ क़ूह तेहकेंॱराङ येहबा। 21 मास्यीकागी ओङ लाहमले थाम्ज्यीराङ से़हया़ला राहङती ओङ चो़ला नोम फेप नाङज्ये येह ओहले ओ़ह ओङ लाहमलेॱराङ ओहराङदी दि स्यिदी डोएँ ज़ुबुला मिहरोदी ल़ेहमुराङ ज़िज्यिद-च्येन ज़ो नाङज्ये येह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.