फिलिप्पी 1 - ह्योल्मो1 फिलिप्पी क्याहसाला येहकेन मास्यीका येशूकी नाम्पार-ताहक्पा मिहया़, एल्डरया़ ओहले डिकनया़ला ङ्यिह मास्यीका येशूकी योक्पु पावल दाङ तिमोथीगी दि यिहगी प्रुहएँॱराङ येहबा। 2 ओहराङ किन्ज्यो याहप दाङ चो़वो येशू मास्यीकागी ख्याया़ला काटीन दाङ स्य़िहदे नाङज्यु। पावलगी थुज्यी-छ्ये़ दाङ सोल्वाङ 3 नाहम-माना ख्याया़ला टेहम्बा साल्गेमु ङाह ङाहती किन्ज्योला थुज्यी-छ्ये़ फुल्गे। 4 नाहम-माना ख्या थाम्ज्यीगी तेहन्दाला सोल्वाङ ताप्केमु ङाह क़ेहनाङ पेहती सोल्वाङ ताप्कें, 5 च्यिबेमाना ख्याया़गी ङाहला या़हबु लेहङगु स्येकेन्गी ल़ेहला छ़ूगे ङ्यिहमा यिहन्ज्यु ताहन्दा थु रो़हराम पेहतीराङ येहबा। 6 किन्ज्योगी ख्याया़गी पाहरक्यीला छ्या़ले या़हबुज्यी छ़ू नाङसीन, ओहले मिहरोगीॱराङ येशू मास्यीकाकी ङ्यिहमाला ओ़ह तेहन्दा डुप च्य़ू नाङज्ये येह। 7 ख्याया़ला नाहम-माना ङाहगी सेम नाहङला ज़्या़दी येह। दि ल़ेहमु पेहच्येला ङाहला ठाबे ऩेसीन च्यिबेमाना ताहन्दा ङाह चोन-खाङ नाहङला येहकेंमु ओहले चोन-खाङ म़ेदी फिला येहकेमुॱआङ ख्याया़गी ङाहला या़हबु लेहङगु स्येकेन्गी ल़ेहला ओहले दिला सी़दे ज़्या़ज्येला किन्ज्योगी नाङग्यो दि थाम्ज्यी काटीनला ख्याया़ ङाह ङ्याम्बुराङ पी़मा काहल्दी येह। 8 काह-ठि पेहती मास्यीका येशूकी निङज्यीगी पेहती ङाह ख्या थाम्ज्यीला टेहम्बा साल्गे माएँ तामला किन्ज्यो ङाहती पाङबु ज़्य़ू नाङदी येह। 9 ङाहती सोल्वाङ दिराङ यिहम्बा– येहन्देन दाङ या़हबु चोक्पा खा फे़ ख़ूएँगी रिहक्स्यीला ख्याया़गी चेवा माहङरो माहङरो पेहती डो ख़ूज्यु। 10 दिठी पेहती ख्याया़गी का़हन्दी ल़ेह या़हबु येहबा ओ़ह खा फे़ ख़ूज्यु, ओहले मास्यीका फेप नाङगेन्गी ङ्यिहमाला ख्याया़ चाङमा दाङ च्यिॱआङ क्येन म़ेहबा पेहती तेह ख़ूज्यु। 11 किन्ज्योकी ज़िज्यिद दाङ त़ेरा तेच्याकी तेहन्दाला येशू मास्यीका लाहमले ओहङगेन टाहङदेनकी सेदोगी ख्याया़ काहङदी तेहतोङ। ङाह सोम्बो लिहक्योदी मास्यीकाकी तेहन्दालाराङ 12 आदा-नो़ह दाङ आज्यी-नुहमुया़, ख्याया़गी दि ताम ह्अ कोहज्यु माएँ ङाहती सेम्बा येहबा। ङाह थो़ला बाप्क्यो तामया़गी तेहम्बाराङ या़हबु लेहङगुला याहरक्यी ख्येर्च्येला रो़हदी पेहती येह। 13 माज्येराङ माना ङाह चोन-खाङला छ्यिक्योती मास्यीकाकी तेहन्दागी पेहतीराङ यिहन म़ेदी क्याहल-गाङगी थाम्ज्यीराङ माक्मीया़ दाङ लेहमेन मिहया़लाॱआङ क्यी़ह येह। 14 ङाह चोन-खाङला छ्यिक्यो सोङबे माहङ-छ्येवा नो़हया़ चो़वोला सान्दी काहल्दी येह, ओहले खुङ ज्यिक्पा म़ेहबा पेहती या़हबु लेहङगु स्येच्येला स्युक क्ये़दी येह। 15 यिहन्ज्येनी लाहलागी ठादो पेहती, ङाहगी लेहमेनगी म़ेदी माहङबु पेहसीन म़ेदी तेन्ज्येला मास्यीकाकी तेहन्दाला मिहया़ला स्येकें ओहले लाहलागीती सेम या़हबु थो़दी निङज्यीगी मिहया़ला स्येकें। 16 च्यिबेमाना किन्ज्योगी ङाहला या़हबु लेहङगु स्येच्येलाॱराङ कुल नाङग्यो यिहम्बा म़ेदी क्यी़ह येहकेया़गीदी ङाहला च्याहम्बा पेहती खुङया़ला सेम यिहन्ज्युराङ दि ल़ेह पेहकें। 17 यिहॱनाङ ठादो पेहकेनया़गीदी ङाहला चोन-खाङला तोहरोङॱआङ तुहक्पु काल तेर्के माएँ नोम्साङगी च्याहङज्यु सेम थो़दी मिहम्बा यिहॱनाङ राहङला ख्येप्साङ ओहङज्यु माएँ सेम थो़दी मास्यीकाकी तेहन्दाला मिहया़ला स्येकें। 18 च्यि यिहॱना़ यिहन ङाह दिगी तेहन्दाला क़ेहनाङ पेहकें। सेम या़हबु थो़दी यिहॱना़ यिहन्ज्यु, सेम चोक्पा थो़दी यिहॱना़ यिहन्ज्यु ना थाम्ज्यीले मास्यीकाकी तेहन्दालाराङ लेहङगु फेल्दी येह। 19 यिहम्बा, ङाह क़ेहनाङ पेहकें। च्यिबेमाना ङाहला क्यी़ह येह ख्याया़गी ताप्क्यो सोल्वाङ दाङ चो़वो येशू मास्यीकाकी थुगी नाङग्यो रो़हरामकी जेती ङाह दि चोन-खाङलेगी थेन ङ्युहङज्ये येह। 20 ङाहगी पेह कोहकेन्गी ल़ेहलेगी ङाह नाहमॱआङ ङोहजाला माहछ्यीज्यु यिहॱनाङ तोहङमा ल़ेहमु खास पेहती ताहन्दा ङाह सेम-स्युक छ्यिम्बु पेहती तेहकें। ङाह स्यिॱना़ङ सोॱनाङ ङाहती थाम्ज्यी मिहली लाहमले मास्यीकालाॱराङ चा़ ओहङज्यु माएँ ङाहती सेम्बा दाङ रेहवा यिहम्बा। 21 च्यिबेमाना ङाह सोम्बो लिहक्योदी मास्यीकाकी तेहन्दालाराङ यिहम्बा, ओहले स्यिएँदी ङाहती तेहन्दाला ख्येप्साङ यिहम्बा। 22 का़हलेॱआङ ङाह सोम्बो लिहसीन माना मास्यीकाकी तेहन्दाला ङाहगी माहङबुराङ ल़ेह या़हबुया़ पेह ङ्युहङगे। यिहॱनाङ ङाहगी का़हन्दी दाम कोहएँ यिहम्बा, ओ़हनी ङाह मा मी़हखुएँ। 23 दिगी तेहन्दाला ङाहती सेम ङ्यी़ काहल्दी येह। दि जाम्बुलीङ क्युर ज़्या़दी मास्यीका ङ्याम्बु तेहच्ये ङाहला ज्यिबुराङ छ्यिम्बु सेम्बा येहबा, च्यिबेमाना दि ज्यिबुराङ या़हबु ताम यिहम्बा, 24 यिहॱनाङ ख्याया़गी तेहन्दालाती ङाह थार्केतीॱराङ या़हबु यिहम्बा। 25 ङाहला दि या़हबु पेहती क्यी़ह येह। ओ़ह सोङबे ख्याया़ला यिह-छ्य़ेला याहरक्यी डो च्य़ूज्येला ओहले काहसो डो च्य़ूज्येला ङाह सोम्बोराङ लिहच्ये येह ओहले ख्या थाम्ज्यी ङ्याम्बु तेहच्ये येह, 26 ङाह ख्यासाला येहपाराङ ओहङगेमु ङाहती तेहन्दागी पेहती ख्याया़गी मास्यीका येशूकी छेनला माहङबुराङ सेम काहसो पेह ङ्युहङज्ये येह। 27 चा़ छ्यिम्बु ताम दिराङ यिहम्बा, काहन्डुमु पेहती यिहॱनाङ ख्यागी डोलु-तेहलुया़ मास्यीकाकी लेहङगुला पे-सी़हएँदी ओहङज्यु। ओ़ह सोङबे ङाहगी ख्याया़ला थ़ू ख़ूॱनाङ मी़हखुॱनाङ ख्याया़ ताम च्यी़ला डी़दी थिक-चि पेहती सेम च्यी़ थो़दी या़हबु लेहङगुकी तेहपाकी तेहन्दाला तुहक्पु पेहकेनॱराङ दु लो माएँ ताम ङाहगी थ़े ङ्युहङज्यु। 28 ख्याया़ राहङला टाहसेम पेहकें मिहया़ ङ्याम्बु मा़हन्ज्यी। ख्या नाहम-माना स्युक छ्यिम्बु पेहती तेहतोङ, दि तामगी ख्याया़ला टाहसेम पेहकेनया़ फाम्दे डोएँ ओहले ख्याया़गीदी थार्पा ज्योर्के म़ेदी तेन्गे। किन्ज्योगीॱराङ ख्याया़ला थार्पा नाङज्ये येह। 29 च्यिबेमाना मास्यीकाला ख्याया़ला दि तामॱआङ नाङदी येह, ख्यागी मास्यीकाला यिह छ्य़ेगे च्यी़राङ मिहम्बा, यिहॱनाङ मिहरोगी तेहन्दाला तुहक्पुॱआङ खुर कोहएँ। 30 काहल्ग्यो ङ्यिहमाया़ला ङाहगी तुहक्पु पेहक्यो ख्याया़गी थोङदी येह ओहले ताहन्दाॱआङ तुहक्पु पेहकेनॱराङ येह म़ेदी ख्याया़गी थे़दी येह ता़ह ख्याया़गीॱआङ दि तुहक्पुराङ खुर्केॱराङ येह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.