پولُسئے کاگد په رومیان INTRO1 - هُدائے پاکێن کتاب، بلۆچی زباناپه رومیان پولُسئے کاگدئے بارئوا په رومیان پولُسئے کاگد، نۆکێن اَهدنامَگئے شَشُمی کتاب اِنت و ائولی کاگد. اے کاگد، په رومئے کلیسایا نبیسگ بوتگ (7:1، 15). روم، رومی بادشاهیئے بُندَر#1:0 بُندر، بزان مُلکئے تهت. اردوا صدر مقام و پارسیا پایه تخت. اَت و اے شهرا بازێن کئومێئے مردم نندۆک اَتنت. اِشانی نیاما یَهودی هم هست‌اَ ت. اے هبر پَکّاییا زانَگَ نبیت که رومئے شهرا، کلیسائے بِندات چۆن بوتگ. بوتَ کنت که هما رومی که پِنْتیکاسْتئے#1:0 پِنْتیکاسْت یَهودیانی رۆن و مۆشئے ائیید اِنت. رۆچا اورشَلیما آتکگ‌اَتنت و پِتْرُسئے وازا گۆن اَتنت، چه آیان لهتێنا، گۆن هما سئے هزارێن مردمان هئوار پاکشۆدی#1:0 پاکشۆدیئے لبز، یونانی زبانا ”بَپْتیسْمَه“ گوَشگَ بیت و اِشیئے مانا ”آپا بُکّ دئیگ“ یا ”گۆن آپا شۆدگ“ اِنت. کرتگ که آ رۆچا باورمند بوتنت (کاسِدانی کار، دَر 2) و همے باورمند که پدا روما پِر تَرِّتگ‌اَنت، وشّێن مستاگئے شِنگ کنگِش بندات کرتگ و چه همِشانی جُهدان کلیسا بندات بوتگ. اے هم بوتَ کنت که لهتێن مردما تُرکیه، یونان یا دگه مُلکێا وشّێن مِستاگ اِشکتگ، پدا روما شتگ‌اَنت و مِستاگئے شِنگ کنگِش بندات کرتگ. رومئے شهرئے گێشترێن مردم یَهودی نه‌اَتنت. پمێشکا گُمان همِش اِنت که اۆدئے کلیسایا یَهودی و درکئومێن باورمند هئوار بوتگ‌اَنت. اے کاگدئے تها، پولُس گۆن یَهودیان هم هبرَ کنت و گۆن اے دگه کئومانی مردمان هم. چه اے کاگدئے جندا زاهِر اِنت که اِشیئے نبشته‌کار پولُس اِنت (1:1). پولُس، اِسراییلیے اَت که مرۆچیگێن تُرکیهئے شهر تَرْسوسا پێدا بوتگ‌اَت. اے کاگدئے نبشته کنگئے زمانگا، اے دَمگ آسیا گوَشگ بوتگ. پولُس، پَریسی و وانِندهێن مردمے اَت. آییا اورشَلیما دینی کانون وانتگ‌اَت. کاسِدانی کارئے کتابا، نبشته اِنت که پولُس چۆن باورمند بوت (دَر 9) و چۆن رومی بادشاهیئے بازێن جاگهان تَرّ و تابیَ کرت و وشّێن مستاگئے جاریَ جت (دَر 10 تان 28). پولُس، وتی باورمندیئے سئوَبا دو رندا بندیگ کنگ بوت و گُڈسرا کُشَگ بوت. پولُسا سێزدَه کاگَد نبشته کرتگ که نۆکێن اَهدنامَگا هئوار اَنت. پولُسا، رومئے باورمندانی سرا اے کاگَد چه کُرِنْتئے شهرا نبشته کرت. اے وهدا، آ وتی سئیمی مِستاگی سپَرا اَت. اے پئیما اے کاگَدئے نبیسگئے وهد و زمانَگ 56 یا 57 میلادیَ بیت. رومئے باورمند پولُسا وت ندیستگ‌اَتنت و آیانی کلیسائے جێڑهان سرپد نه‌اَت، پمێشکا اے کاگدئے تها، آیانی جێڑهانی سرا هبرَ نکنت، چۆ که دگه لهتێن کاگَدئے تها کنت. اے کاگَد سئے بهرا اِنت؛ دَر یکّ تان یازده ائولی بهر اِنت، دَر دوازده تان پانزده دومی بهر اِنت و دَر شانزده سئیمی بهر اِنت. ائولی بهرا، پولُس نجاتئے سَرجمێن کِسّها کاریت، هما نِجات که چه ایسّا مَسیهئے سرا باورمندیا رسیت. پولُس اے هبرئے سرا زۆرَ دنت که سجّهێن مردمان گناه کرتگ و کَسّ چه شَریَتئے دارگا نرَکّیت (در 1 تان 5). پولُس اے چیزّئے بارئوا هم هبرَ کنت که اِنسان باوَرمند بئیگا رند باید اِنت گناهئے راها مرئوت (در 6 و 7). هما هَکّئے بارئوا هم هبرَ کنت که هُدائے چُکّ بئیگئے برکتا مارا هست‌اِنت (در 8). پدا، هُدائے کارانی تها اِسراییلی کئومئے جاگه و مَکامئے بارئوا هبرَ کنت. گوَشیت که پێسرا وشّێن مستاگ جهانئے اے دگه کئومان سَر کنگَ بیت و رندا سجّهێن اِسراییلی باورَ کننت که ایسّا، هما واده داتگێن مَسیه اِنت (در 9 تان 11). دومی بهرا، پولُس اے هبرا کنت که باورمند چۆن په تپاکی زِند بگوازێننت و یکدومیگا#1:0 یکدومی، بزان یَکدِگَر، یَکّ و دومی. اێر مجننت. پولُس، رومئے کلیسایا وتی کار و اِرادَهانی بارئوا هم هالَ دنت، چێا که آییئے دێمتِری کارانی تها اے کلیسائے مردم هم گۆن اَنت. اے کاگَدئے نبشته کنگئے وهدا پولُس هما سجّهێن زَرّان یکجاه کنگ و اورشَلیما سَر کنگَ لۆٹیت که چه بازێن کلیساێئے نێمگا په اورشَلیمئے گریب و نێزگارێن کلیسایا نَزّ آرگ بوتگ‌اَنت. پولُس اِرادهَ کنت که چه اے زَرّانی سر کنگا و رند روما و پدا اِسپانیایا برئوت و وشّێن مستاگا شِنگ بکنت. کاگَدئے گُڈّی#1:0 گُڈّی، بزان آهِری. بَهرا په کلیسائے بازێن مردمێا سَلام و دْرۆت مان اِنت و هُدائے سَتا و سَنا هم. |
© 2016-22 Wycliffe Bible Translators, Inc.
Wycliffe Bible Translators, Inc.