اِلهام INTRO1 - هُدائے پاکێن کتاب، بلۆچی زبانایوهَنّائے اِلهامئے کتابئے پجّار اِلهامئے کتابئے نبیسۆک، چار رندا وتی ناما گیپت که من یوهَنّا آن (1:1، 4، 9؛ 22:8). گێشترێن زانتکارانی هئیال همِش اِنت که اے، ایسّا مَسیهئے کاسِدێن یوهَنّا اِنت، هما که تان سئے سالا ایسّائے همراه اَت و چارمی اِنجیلی نبشته کرتگ که یوهَنّائے اِنجیل گوَشگَ بیت. چه اے کتابئے وانگا، زانگَ بیت که اِشیئے نبشته کنگئے وهدا ایسّائے باوَرمند زُلم و زۆراکیئے چێرا اَتنت. گُمان اِش اِنت که اے زُلم و زۆر، رومی کئیسَر نێرۆ (54 تان 68 میلادیا) یا دُمیتیانئے (81 تان 96 میلادیا) زمانگا بوتگ. یوهَنّائے جِند، پَتموس نامێن جَزیرهێا دَرانڈێه کنگ بوتگ‌اَت (1:9). پَتموس، اَنچێن جاهے اَت که رومئے سرکارا، مردم په سِزایا دێمَ داتنت. کتاب چُش بِنداتَ#1:0 بِندات، بزان بُنگێج، شُرو. بیت: ”ایسّا مَسیهئے اِلهام، که هُدایا آییارا دات تانکه وتی هِزمتکارانا هما چیزّان پێش بداریت که اَلّم زوتّ بئیگی اَتنت“ (1:1). کتاب ایسّائے بارئوا اِنت که چه مرکا جاهی جَتگ. یوهَنّا، ایسّائے جندا وتی ائولی اِلهامئے تها گِندیت (1:9–18). ایسّا هُکمَ دنت: ”هرچے که تئو دیستگ، هرچے که انّون بئیگا اِنت و هرچے که رندترا بیت، نبشتهِش کن“ (1:19). بازێنێئے هئیالا، اے هبر په کتابئے مانا کنگا رهشۆنی اَنت. کتابئے دومی و سئیمی دَر، کاگد اَنت که په هَپت کِلیسایا نبشته کنگ بوتگ‌اَنت. کتابئے منتگێن بهر اے گپّئے سرا اِنت که چه یوهَنّائے مرکا و رند چے بیت. اے کتابا راز و رَمز باز مان اِنت و بازێنێئے مانا زانگ نبوتگ. پمێشکا ما باید اِنت وانگئے وهدا اے کتابا چه وت گێشێن مانا مان مکنێن. چۆناها اِلهامئے کتاب، وتی بازێن راز و رَمزے وت مانا کنت؛ کِلیسا، چِراگدان گوَشگ بوتگ‌اَنت (1:20)؛ اورشَلیم، گوَرانڈئے بانۆر گوَشگ بوتگ (21:9–10)؛ مزنێن کَهبگ په بابِلئے شهرا اِشاره اِنت (17:1، 5) که زمینئے بادشاهانی سرا هاکمیَ کنت (17:18). شهرئے هپتێن کۆهئے هبر (17:9)، هئیالا دێم په روما هم بارت. اے کتابئے دگه هاسێن گپّے، هَپتئے هساب اِنت. هَپت چیزّئے نام باز رندا گِرگَ بیت، بزان هپت مُهر اَنت (6:1—8:1)، هَپت کَرنا اَنت (8:2—11:9)، هَپت تاس اَنت (15:1—16:21) و هر یکّێئے سرا الکاپیا هبر کنگَ بیت. هَپتئے رَمزی مانا ”سرجمی“ اِنت. کتابئے بازێن چیزّێئے مانا کنگ ستَر گران ببیت بله کتابئے کُلئو تچک اِنت: ایسّا مسیه واترَّ کنت و کئیت (19:11–21؛ 22:7)، مُردگانی دادرسی بیت (22:11–15)، هرکَسا که ایسّا مَسیهئے سرا باوَر کرتگ، نۆکێن اورشَلیما، نۆکێن زمین و نۆکێن آسمانا گۆن ایسّا مَسیها یکجاهَ بیت، اَبد تان اَبد (21:1—22:5). |
© 2016-22 Wycliffe Bible Translators, Inc.
Wycliffe Bible Translators, Inc.