اِلهام 9 - هُدائے پاکێن کتاب، بلۆچی زبانا

¹ پنچمی پرێشتگا وتی کَرنا جَت و من دیست که اِستارے چه آسمانا سِستگ و زمینا کپتگ‌اَت. آییا جُهلێن تَهتَرونئے چاتئے دپئے کلیت دئیگ بوت.

² اِستارا جُهلێن تَهتَرونئے چاتئے دپ پَچ کرت. نون چه چاتا دوتّ چست بوت، گوَشئیگا چه مزنێن کورَهێا دوتّ در آیگا اَت. چه چاتا در آیۆکێن دوتّان رۆچ و آسمانئے دێم تهار کرتنت.

³ نون چه دوتّان زمینئے سرا مَدَگ در آتک و اے مَدَگان زمینئے زومّانی پئیمێن زۆرے دئیگ بوت.

⁴ گۆن اِشان گوَشگ بوت که تهنا هما مردم که هُدائے مُهرِش پێشانیگا پِر نه‌اِنت، آیان و اَبێد زمینئے سرئے هچّ کاه و سبزگ یا دگه کِشار و درچکے تاوان مدئینت.

⁵ مَدَگان اے هکّ دئیگ نبوت که اِشان بکُشنت بله تهنا تان پنچ ماها اَزابِش بکننت، اَنچێن اَزاب که چه زومّئے تِجا مردمێا رسیت.

⁶ آ رۆچان مردم مرکَ لۆٹنت بله مرکِشَ نرسیت. مرکئے لۆٹۆکَ بنت و مرک چه آیانَ تچیت.

⁷ مَدَگ پوره اسپانی پئیما اَتنت که په جنْگا تئیار کنگ بوتگ‌اَتنت و آیانی سرگئے سرا تلاهێن تاجئے ڈئولێن چیزّ اَتنت و چِهرگِش انسانئے پئیما اَتنت.

⁸ آیانی مود جنێنی مودانی ڈئولا اَتنت و دنتان شێرئے دنتانانی پئیما.

⁹ آیانی سێنَگا آسنی سێنَگ‌پۆش بستگ‌اَت و بانزُلانی تئوارِش پوره هما بازێن اَرّابهانی تئوارئے ڈئولا اَتنت که اسپِش بستگ و په جنْگا مانَ رِچنت.

¹⁰ زومّانی ڈئولێن لِٹّک و تِجِش پِر اَت و لِٹّکان اے زۆر مان اَت که مردمان تان پنچ ماها ٹَپّیگ بکننت.

¹¹ بادشاهے هست‌اَتِش که جُهلێن تَهتَرونئے پرێشتگ اَت، اِبرانی زبانا نامی اَبَدّۆن اَت و یونانیا، اپۆلیۆن.

¹² ائولی ”اَپسۆز“ گوَستگ، بچار، چه اے چیزّان و رند دگه دو ”اَپسۆز“ آیگی اِنت.

¹³ ششمی پرێشتگا وتی کَرنا جت و هما تلاهێن کُربانجاه که هُدائے دێما اِنت، من چه آییئے چارێن کانٹان تئوارے اِشکت.

¹⁴ گۆن ششمی پرێشتگا، هماییا که کَرنایی گۆن اَت، گوَشگا اَت: ”هما چارێن پرێشتگان آزات کن که مزنێن کئور پَراتئے کَشا بستگ‌اَنت.“

¹⁵ نون چارێن پرێشتگ آزات کنگ بوتنت که په هما ساهت، رۆچ، ماه و سالا تئیار کنگ بوتگ‌اَتنت که بنی‌آدمانی سئےیکّا بکُشنت.

¹⁶ من اِشکت، اسپ‌سوارێن لشکر دو هزار لکّ اَت.

¹⁷ هما اسپ و اسپ‌سوار که من اِلهامئے تها دیستنت، چُش اَتنت: اسپ‌سوارانی سێنَگا آس‌رنگێن، سیه‌سبزێن و زردێن گۆکُرت‌رنگێن سێنَگ‌پۆش بستگ‌اَت؛ اسپانی سر، شێری سرگئے ڈئولا اَتنت و چه آیانی دپا آس، دوتّ و گۆکُرت در آیگا اَت.

¹⁸ بنی‌آدمانی سئےیکّ، سئے اَزابا کُشت، بزان هما آس، دوتّ و گۆکُرتئے اَزابا که چه اسپانی دپا در آیگا اَت،

¹⁹ چێا که اسپانی زۆر آیانی دپ و لِٹّکانی تۆکا اَت و آیانی لِٹّک مارئے ڈئولا اَتنت که سرِش پِر اَت و گۆن اِشان مردمِش ٹَپّیگَ کرتنت.

²⁰ پَشت کپتگێن مردم که اے اَزابان نکُشتگ‌اَتنت، اَنگت چه وتی دستانی کاران پشۆمان نبوتنت و تئوبهِش نکرت و تلاه، نُگره، بْرنج، سِنگ و دارئے هما پلیتێن اَرواه و بُتانی سُجده کنگِش یله نکرت که نه دیستَ کننت، نه اِشکتَ کننت و نه راه شتَ کننت.

²¹ اے مردم نه چه وتی کُشت و کۆشان پشۆمان بوتنت، نه چه وتی سِهر و جادوگریا، نه چه وتی زِنهکاریا و نه چه وتی دُزّیان.