یوهَنّا 2 - هُدائے پاکێن کتاب، بلۆچی زبانا

ایسّائے ائولی مۆجِزه

¹ سئیمی رۆچا، جَلیلا، کانا نامێن مێتگێا، سور و آرۆسے هست‌اَت و ایسّائے مات همۆدا اَت.

² ایسّا و آییئے مُریدِش هم لۆٹتگ‌اَتنت.

³ وهدے شراب هَلّتنت، ایسّائے ماتا گۆن آییا گوَشت: ”اِشان دگه شراب نێست.“

⁴ گوَشتی: ”او بانُک! منا و ترا گۆن اِشیا چِه کار؟ منی وهد اَنگت نئیاتکگ.“

⁵ ماتا گۆن کارندهان گوَشت: ”هرچے که شمارا گوَشیت، هما کارا بکنێت.“

⁶ اۆدا شَش سِنگێن کونزگ اێر اَت که هر یکّێا هشتاد تان سَد و بیست لیتر آپَ داشت و یَهودیانی شُشت و شۆدی رسمان کارمرزَ بوتنت.

⁷ ایسّایا گۆن کارندهان گوَشت: ”کونزگان چه آپا پُرّ کنێت.“ گڑا کونزگِش چه آپا پُرّ کرتنت.

⁸ ایسّایا گوَشت: ”نون کَمُّکے بکَشّێت و په دیوانئے کماشا ببرێت.“ آیان اَنچُش کرت.

⁹ اے آپ که شراب بوتگ‌اَتنت، دیوانئے کماشا چَشِتنت. نزانتی که چه کجا آرگ بوتگ‌اَنت، بله هما کارندهان که آپ کَشّتگ‌اَتنت، آیانَ زانت. نون دیوانئے کماشا، سالۆنک تئوار جت و

¹⁰ گوَشتی: ”هرکَس مهمانان شرترێن شرابا پێسرا دنت. وهدے آ مَست و ملارَ بنت، رَندا اَدنا و اَرزانترێنا کاریت. بله تئو شرترێن شراب نۆکی آورتگ.“

¹¹ اے مۆجزه و اَجَبَّتێن نشانی که ایسّایا جَلیلئے مێتگ کانایا پێش داشت، آییئے ائولی مۆجزه اَت. آییا گۆن همے مۆجزها وتی شان و شئوکت زاهر کرت و مُریدان آییئے سرا ایمان آورت.

¹² رَندا ایسّا گۆن وتی مات و برات و مُریدان کَپَرناهومئے شهرا شت. لهتێن رۆچا همۆدا داشتِش.

ایسّا چه پرستشگاها سئوداگرانَ گلّێنیت

¹³ یَهودیانی پِسَه، بزان سَرگوَزئے ائیید نزّیکّ اَت. پمێشکا، ایسّا اورشَلیما شت.

¹⁴ دیستی که مزنێن پرستشگاها مردم گۆک و پَس و کپۆتئے بها کنگا گُلاێش اَنت و سَرّاپ هم نِشتگ‌اَنت.

¹⁵ گڑا چه سادا هئیزرانے جۆڑی کرت و سجّهێن سئوداگر و پَس و گۆکی چه پرستشگاها گلّێنتنت و سَرّاپانی زرّ و سِکَّه‌ای هم رێتکنت و ٹێبَلی چپّی کرتنت.

¹⁶ گۆن کپۆت بها کنۆکان گوَشتی: ”اے چیزّان چه اِدا در کنێت. منی آسمانی پتئے لۆگا بازارے مکنێت.“

¹⁷ نون مُرید یاتا کپتنت که هُدائے پاکێن کتابا نبشته اِنت: آ جۆش و گئیرت که منا په هُدائے لۆگا هست‌اِنت، منا سۆچیت و پُرَ کنت.

¹⁸ گڑا یَهودیان گوَشت: ”تئو گۆن چۆنێن مۆجزه و اَجَبَّتێن نشانیے سابتَ کنئے که ترا اے کارانی اِجازت هست‌اِنت؟“

¹⁹ ایسّایا گوَشت: ”اے مزنێن پرستشگاها بپْرۆشێت، من سئے رۆچا پدا چستیَ کنان.“

²⁰ یَهودیان گوَشت: ”اے مزنێن پرستشگاه، چِلّ و شَش سالا جۆڑ کنگ بوتگ، تئو چۆن اِشیا سئے رۆچا چستَ کنئے؟“

²¹ بله آ پرستشگاه که ایسّا آییئے بارئوا هبر کنگا اَت، آییئے جندئے جسم و جان اَت.

²² ایسّائے مِرَگ و جاه جنَگا رَند، مُرید یاتا کپتنت که آییا وت اے هبر گوَشتگ‌اَت. نون آیان هُدائے پاکێن کتاب و ایسّائے هبرانی سرا ایمان آورت.

²³ آ رۆچان، ایسّا سَرگوَزئے ائییدا اورشَلیما اَت. بازێن مردمێا که ایسّائے اَجَبَّتێن نشانی دیستنت، آییئے نامئے سرا ایمانِش آورت.

²⁴ بله ایسّایا آیانی ایمانئے سرا باوَر نکرت، چێا که آییا سجّهێنانی دل و درونَ زانت.

²⁵ آییا انسانئے بارئوا هچکَسئے گواهیئے زلورت نه‌اَت، چێا که آ، انسانئے دلئے هر هالا سهیگ اَت.