دَرگوَز 2 - هُدائے پاکێن کتاب، بلۆچی زبانا

موسّائے پێدائِش

¹ لاوی کَبیلهئے مردے شت و لاوی جنکّے سانگی کرت.

² جنێن لاپ‌پُرّ بوت و مردێن‌چُکّے آورتی. جنێنا دیست که چُکّ شَررَنگے، تان سئے ماها چێری دات.

³ وهدے آییا چُکّ چه اِد و گێشتر چێر دات نکرت، په آییا چه کَلَم و کاشا گوَپتگێن سَپْتے زرتی، سَپْتی گیر و ڈامبر جَت، چُکّی سَپْتا کرت و نیلّئے کئورئے لَمبا کاشانی تها اێری کرت.

⁴ چُکّئے گُهار کَمّے دور اۆشتات و چارگا لگّت که بارێن چُکّ چۆنَ بیت.

⁵ پِرئونئے جنکّ جانئے شۆدگا نیلّئے کئورا آتک. مۆلد نیلّئے کئورئے کرّا گَردگا لگّتنت. پِرئونئے جنکّا کاشانی نیاما سَپْت دیست و وتی مۆلدے راهی دات که سَپْتا بیار. آییا آورت.

⁶ پِرئونئے جنکّا سَپْت پَچ کرت و نُنُّک دیست. نُنُّک گرێوگا اَت. پِرئونئے جنکّا آییئے سرا بزّگ بوت. گوَشتی: ”اے چه اِبرانیانی چُکّان اِنت.“

⁷ گڑا نُنُّکئے گهارا چه پِرئونئے جنکّا جُست کرت: ”برئوان و اِبرانی جنێنے تئوار بکنان که نُنّکا په تئو شیر بمێچێنیت؟“

⁸ پِرئونئے جنکّا گوَشت: ”برئو.“ جنکّ شت و نُنّکئے ماتی تئوار کرت.

⁹ پِرئونئے جنکّا گۆن آییا گوَشت: ”اے نُنّکا گۆن وت بر و په من مێچێن. من تئیی مُزّا دئیان.“ جنێنا نُنّک زرت و مێچێنت.

¹⁰ چُکّ که رُست و کمّے مستر بوت، ماتا پِرئونئے جنکّئے کرّا آورت. پِرئونئے جنکّا چُکّ زرت و وتی چُکّ کرت. آییئے نامی موسّا کرت، گوَشتی: ”اے من چه آپا کَشِّتگ.“

موسّائے تَچگ

¹¹ وهدے موسّا رُست و مزن بوت، یکّ رۆچے وتی مردمانی کرّا شت و آیانی بیگاری و گرانێن کاری دیستنت. موسّایا مِسریے دیست که اِبرانیێا، بزان چه موسّائے جندئے مردمان یکّێا جنَگا اَت.

¹² موسّایا وتی چپّ و چاگرد چارت و دیستی که کَسّ نێست. گڑا مِسری‌ای کُشت و رێکانی تها کَلّ کرت.

¹³ دومی رۆچا پدا ڈَنّا شت و دیستی که دو اِبرانی مِڑَگا اِنت. گۆن مئیاریگێن مردما گوَشتی: ”چێا وتی هَمکئوما جنَگا ائے؟“

¹⁴ آییا پَسّئو دات: ”کئیا ترا مئے سرا هاکم و دادرَس کرتگ؟ زانا تئو لۆٹئے منا هم بکُشئے اَنچۆ که مِسری‌اِت کُشت؟“ موسّایا تُرست و دلا گوَشتی: ”پَکّایا هبر پاشْک بوتگ.“

¹⁵ پِرئون اے هبرا سهیگ بوت و موسّائے کُشگئے اِرادهی کرت. بله موسّا چه پِرئونئے کِرّا تتک و میدیانئے مُلکا شت و چاتێئے کرّا نِشت.

¹⁶ میدیانئے دینی پێشوایا هپت جنێن‌چُکّ هست‌اَت. اے جنکّ آتک و آپئے کَشّگ و تَگارئے پُرّ کنگا لگّتنت که پتئے رمگا آپ بدئینت.

¹⁷ بله لهتێن شپانک آتک و جنکِّش گلّێنتنت. موسّا جنکّانی کُمَکّا پاد آتک و آیانی رمگی آپ دات.

¹⁸ جنکّ که وتی پت رئوێلئے کرّا آتکنت، پتا جُست کرتنت: ”مرۆچی چێا چۆ زوتّ آتکگێت؟“

¹⁹ آیان گوَشت: ”مرۆچی مِسریێا مارا چه شپانکانی دستا رَکّێنت. آپی هم کَشِّت و رمگی آپ دات.“

²⁰ پتا گۆن وتی جنکّان گوَشت: ”گڑا کُجا اِنت؟ شما آ مرد چێا نئیاورتگ گۆن؟ تئواری کنێت، بِلّی کئیت و نانَ وارت.“

²¹ موسّا مردئے کرّا جَهمنند بئیگا رازیگ بوت و مَردا وتی جنکّ سَپورَه گۆن موسّایا سور دات.

²² سَپورَها مردێن‌چکّے آورت و موسّایا آییئے نام گئیرشام کرت، گوَشتی: ”من دَرمُلکا دَرامدے آن.“

²³ ماه و سال گوَستنت و همے نیاما مِسرئے بادشاه مُرت. اِسراییلی چه وتی گُلامیا نالَگ و پِریاتا اَتنت. آیانی اے نالَگ و پِریات بُرزاد شت و هُدایا سر بوتنت.

²⁴ هُدایا آیانی نالَگ اِشکتنت و وتی هما اَهد و پئیمانئے ترانَگا کپت که گۆن اِبراهێم و اِساک و آکوبا بَستگ‌اَتی.

²⁵ هُدایا اِسراییلی دیستنت و آیانی سرا بَزّگی بوت.