پِتْرُسئے دومی کاگد INTRO1 - هُدائے پاکێن کتاب، بلۆچی زباناپِتْرُسئے دومی کاگدئے پجّار پِترُسئے دومی کاگد گۆن دێم دئیۆکئے نام و گوَنڈێن درۆت و درَهباتێا بنداتَ بیت و په هما مردمان که کاگد نبشته کنگ بوتگ، آیانی پَجّار هم بنداتا مان اِنت. نبشته کنۆک وتی ناما ”شَمون پِترُس، ایسّا مسیهئے کاسِد و هِزمتکارَ“ گوَشیت. (پِترُسئے بارئوا گێشتر مالومداریئے واستا، پِترُسئے ائولی کاگدئے پجّارا بِچار). اے کاگدئے تها پِترُس گۆن هما مردمان هبَرا اِنت که ”چه مئے هُدا و رَکّێنۆک ایسّا مَسیهئے برکتا، هما پئیمێن بێبهاێن باوَرے رَستگِش که مارا رَستگ.“ اے هبر نبشته نه‌اِنت که اے مردم کجا نندۆک بوتگ‌اَنت، بله پِترُس گۆن اے مردمان وتی پێسری گپّ و ترانێئے ناما گیپت. اے کاگَدئے مسترێن مکسَد وانۆکان چه رَدێن تالیم دئیۆک و رَدێن پئیگمبران هُژّار و هبردار کنگ اِنت و اِشیئے بازێن هبرے یهودائے کاگدئے هبرانی پئیما اِنت. اے هم نبشته اِنت که ایسّا مسیه دنیایا پِرَ ترّیت و هساب و کتابئے رۆچَ کئیت. گۆن وانۆکان گوَشگَ بیت که هُدائے داتگێن ٹێکیان کار بِبندێت و پاک و پَلگارێن زندے بگوازێنێت و هُدائے هبران دلگۆش بکنێت. اے هبر هم نبشته اِنت که اے سجّهێن جهان نێست و نابود کنگَ بیت و نۆکێن جهانے اڈّ کنگَ بیت و اۆدا سَرجمیا اَدل و اِنساپَ بیت. |
© 2016-22 Wycliffe Bible Translators, Inc.
Wycliffe Bible Translators, Inc.