په تیموتاووسا پولُسئے ائولی کاگد 4 - هُدائے پاکێن کتاب، بلۆچی زبانا

رَد مکپێت

¹ پاکێن روه تچکا تچکَ گوَشیت که آهری زمانگان لهتێن مردم ایمانا یلهَ کنت و رَد دئیۆکێن روهانی رَندا کپیت و هما تالیمانی نێمگا رئوت که پَلیتێن روهِشَ دئیَنت.

² اے تالیم چه درۆگبندانی دوتَل و دوپۆستیا پێدا بنت. اے درۆگبندانی زمیر گۆن تَپتگێن آسِنێا داگ دئیگ و کُشگ بوتگ.

³ اے درۆگبند، مردمان چه سور و آرۆسا منَه و مکنَ کننت و لهتێن وراکئے نئوَرگئے هُکما دئینت، هما وراک که هُدایا جۆڑ کُرتگ‌اَنت که باوَرمند، بزان راستیئے زانۆکِش په شُگرگُزاری بوَرنت.

⁴ هُدائے جۆڑ کُرتگێن هر چیزّ شرّ اِنت و چیزّے که یکّێا رسیت، باید اِنت په شُگرگُزاری بزوریتی و دئوری مدنت،

⁵ چێا که گۆن هُدائے هبرا و گۆن باوَرمندئے دْوایا پاک و پلگار کنگ بوتگ.

⁶ اگن تئو همے چیزّان باورمندان سۆج بدئیئے، گڑا بزان ایسّا مَسیهئے شرّێن هِزمتکارے ائے و ایمانئے راستیانی تها و شَرّێن تالیمئے تها رُستگئے، هما تالیم که تئو چه پێسرا آییئے رندگیریا کنگا ائے.

⁷ وتا چه وَتگڑێن و بے سر و پادێن کِسّهان که گۆن هُدایا هچّ سر و کارِش نێست، دور بدار. گۆن اِشان سر و چێر بئیگئے بدلا وتا هُداتُرسیئے تَمرینا بدئے.

⁸ چێا که جسمی تَمرین بێپائدگ نه‌اِنت، بله هُداتُرسیئے پائدگ هر هسابا باز اِنت که په انّوگێن زندا هم هُدائے کئول و کراری گۆن اَنت و په آیۆکێن زندا هم.

⁹ اے گپّ راست اِنت و کَرزیت که سرجمیا منّگ ببیت و

¹⁰ پمێشکا ما وتی وَسا کار و جُهدَ کنێن، چێا که ما وتی اُمێت نمیرانێن هُدائے سرا بستگ. سجّهێن مردمانی رکّێنۆک هما اِنت، هاس همایانی رکّێنۆک اِنت که ایمانَ کارنت.

¹¹ اے هبرانی هُکم و تالیما بدئے.

¹² تئیی کَسان‌اُمریئے سئوَبا کسّ ترا کَم‌اَرزش سرپد مبیت و تئیی گُپتار و کردار و مِهر و ایمان و پاکی په باوَرمندان مسالے ببنت.

¹³ تان منی آیَگا وتا گۆن اے کاران دَزگَٹّ کن: په مردمان پاکێن کتابا بُرزتئواریا بوان و آیان دِلبَڈّی و تالیم بدئے.

¹⁴ چه وتی هما روهانیێن نیامتا نادلگۆش مبئے که ترا هما وهدا رَست که کماشانی رُمبا تئیی سرا دست اێر مُشت و یکّێا ترا گۆن پاکێن روهئے اِلهاما اے نیامتئے هال دات.

¹⁵ په هُبّ و هُدۆناکی اے کاران بکن و وتا سرجما په اِشان وَپْک کن که هرکَس تئیی دێمرئویا بگندیت.

¹⁶ وتی زند و تالیم دئیَگئے نێمگا شرّیئے سرا دلگۆش بکن و دێما برانِش کن. اگن اے کاران بکنئے، وتا هم رَکّێنئے و وتی گۆش دارۆکان هم.