په تِسالونیکیان پولُسئے ائولی کاگد 1 - هُدائے پاکێن کتاب، بلۆچی زبانا

سلام و درۆت

¹ چه پولُس و سیلوانوس و تیموتاووسئے نێمگا، په تِسالونیکیانی کلیسایا که هُداێن پت و هُداوندێن ایسّا مَسیهئیگ اِنت. رهمت و اێمنی شمارا سر بات.

تِسالونیکیانی ایمان

² ما هر وهدا وتی دْوایانی تها شمئے ناما گرێن و مُدام په شما سجّهێنان هُدائے شُگرا گرێن.

³ ما وتی هُداێن پتئے دێما مُدام شمئے باوَرمندی کاران و پُرمِهرێن زهمتان و سَگّ و برداشتا یاتَ کنێن که آیانی سرچمّگ هما اُمێت اِنت که شمارا مئے هُداوندێن ایسّا مَسیهئے سرا هست‌اِنت.

⁴ او براتان، او هُدائے دۆستیگێن مردمان! ما زانێن که شما هدائے گِچێن کُرتگێن اێت،

⁵ چێا که مئے وشّێن مِستاگ هُشکێن گپّے نه‌اَت که شمارا سر بوت، زۆر و واک و پاکێن روهی هم گۆن اَت و مُهکمێن سِتکے هم مان اَتی. شما زانێت که ما گۆن شما چۆن اَتێن و ما په شما چے کرت.

⁶ شما مئیگ و هُداوندئے رندگیر جۆڑ بوتێت چێا که گرانێن سکّی و سۆریانی تها شما مئے هبر په گَلے زُرت، گۆن اَنچێن شادمانیے که چه پاکێن روها رسیت.

⁷ اے کارئے سئوَبا شما په مَکدونیَه و اَکایَهئے سجّهێن باوَرمندان مِسالے جۆڑ بوتێت.

⁸ چێا که هُداوندئے هبرئے تئوار چه شما شِنگ بوت، تهنا مَکدونیَه و اَکایَها نه، هُدائے سرا شمئے باور هر جاگه زانَگ بوت. پمێشکا زلورت نه‌اِنت که ما اِشیئے بارئوا چیزّے بگوَشێن.

⁹ چێا که شما مارا چۆن وشّ‌آتک کرت، مردم وت اے کسّها کننت، و اے گپّا هم کننت که شما چۆن بُت‌پرستی یله دات و دێم په هُدایا آتکێت که نمیران و راستێن هُدائے پرستش و هِزمتا بکنێت و

¹⁰ آییئے چُکّئے ودارا ببێت، هما که چه آسمانا کئیت، هما که هدایا چه مُردگان زندگ کرت بزان ایسّا که مارا چه آیۆکێن گزَبا رَکّێنیت.