پِتْرُسئے ائولی کاگد INTRO1 - هُدائے پاکێن کتاب، بلۆچی زباناپِتْرُسئے ائولی کاگدئے پجّار پِترُسئے ائولی کاگَد گۆن دێم دئیۆکئے نام و گوَنڈێن درۆت و درَهباتێا بنداتَ بیت و په هما مردمان که کاگد نبشته کنگ بوتگ، آیانی پَجّار هم بنداتا مان اِنت. نبشته کنۆک وتی ناما ”پِترُس، ایسّا مسیهئے کاسِدَ“ گوَشیت. پِترُس اَسلا جلیلئے دمگئے مردمے اَت. ماهیگیرے اَت و چه ایسّا مسیهئے ائولی کاسِدان یکّے اَت. پِترُس چه ایسّا مسیهئے نزّیکتِرێن کاسِدان یکّے اَت و مُدام چه سجّهێنانی نێمگا هبریَ کرت. پِترُسئے نام پێسرا شَمون اَت، بله وهدے مُریدانی دێما گوَشتی که ایسّا هما مسیه اِنت که آیگی بوتگ، ایسّا مسیها آییئے نام بدل کرت و پِترُس کرت. پِترُسئے مانا ”تَلار“ اِنت. پِترُس، ایسّا مسیهئے جاه جنَگا رند، چه کلیسائے بِنداتی سرۆکان یکّے بوت. آ ائولی کاسِد اَت که دَرکئومی پاکشۆدی داتنت و اے هبری هم کرت که درکئوم چه موسّائے شَریَتئے پابندیا آزات ببنت. کلیسایی کِسّه و سرگوَستَ گوَشنت که کاسِدێن پِترُس کِساس شَست میلادیا رومئے شهرا شهید کنگ بوتگ. اے کاگَد هما باوَرمندانی سرا نبشته کنگ بوتگ که رومئے آسیایی دمَگا نِندۆک اَتنت. اے دمَگ مرۆچیگێن تُرکیه اِنت. اے مردمان ایسّا مسیهئے سرا ایمان آورتگ‌اَت و کاگدئے تها هُدائے گچێنی مردم گوَشگَ بنت. کاگدئے نبشته کنگئے زمانَگا باوَرمند گۆن بازێن جێڑه و جنجالێا دێم په دێم اَتنت. آیانی سرا بَدکاریئے بُهتام جنَگَ بوت، ایسّا مسیهئے سرا ایمان آرگئے سئوَبا بےاِزّت کنگَ بوتنت و همساهِگان که اِشانی تَچکی و راستیَ دیست، چه اِشان نپرتِشَ کرت. اے کاگدئے بُنیادی مکسَد باوَرمندان دِلبڈّی دئیَگ اِنت که همساهِگانی نپرتانی دێما هم په دلپَهکی شَرّێن کار بکننت. پِترُس باوَرمندان دلبَڈّیَ دنت که شما هُدائے گِچێن کرتگێن مردم اێت و هُدایا وادَه داتگ که شمارا رکّێنیت. اے گپّا بێهئیال مکنێت که ایسّا مسیها هچ گُناه و مئیارے نکرتگ‌اَت و ناهَکّا آزار دئیگ بوت و هرکس که ایسّائے سرا ایمانَ کاریت، اے دنیا گۆن آییا هم انچُشَ کنت. وتی اے کاگدئے تها پِترُس باوَرمندان سر و سۆجَ کنت که شما اے گرانێن ساهَتان باید اِنت چۆ وتی زندا بگوازێنێت: هُدائے پرمانبَرداریا بکنێت، تچک و راست ببێت، هاکِمانی اِزّتا بکنێت، اے دگه باوَرمندان و وتی لۆگئے مردمان دۆست بدارێت و گۆن آیان همدل ببێت، وتی ایمانئے سرا مُهر بۆشتێت و اے گپّا دلجم ببێت که هُدا مئےشمئے هئیالا داریت. |
© 2016-22 Wycliffe Bible Translators, Inc.
Wycliffe Bible Translators, Inc.