یوهَنّائے ائولی کاگد INTRO1 - هُدائے پاکێن کتاب، بلۆچی زبانایوهَنّائے ائولی کاگدئے پجّار ایسّا مسیها چه وتی مُریدان دْوازدَه کَسّ گِچێن کُرت و وتی هاسێن کاسِد نامێنت. چه اِشان یکّێئے نام یوهَنّا اَت. پاکێن کتابئے گێشتر زانتکارئے هئیال اِش اِنت که اے کاگدئے نبشته کنۆک همے یوهَنّا اِنت، چێا که وتَ گوَشیت که من ایسّا مسیهئے جند و کارانی شاهِد آن (1:1). اے کاگَدئے هبر و نبشتهئے وَڑ و ڈئول هم گۆن یوهَنّائے انجیلا همرَنگ اَنت. نۆکێن اَهدنامَگئے گێشترێن کاگَد چه نبشته کنۆکئے نام و دْرۆت و دْرَهباتا بِنداتَ بنت، بله اے کاگد اے پئیم نه‌اِنت. اے هبر هم مان نه‌اِنت که کاگَد په کئیا نبشته کنگ بوتگ، بله ما چه کاگدئے هبران آ باورمندانی هال و جاوَران سرپدَ بێن؛ چه آیان بازێنێا رُمب یله داتگ‌اَت و رَدێن تالیم دئیگا اَت. اے مردم مَنّگا تئیار نه‌اَتنت که اِنسان گُنَهکار اِنت. اے گپِّش هم نَمَنِّت که ایسّا، مسیه اِنت و هُدائے چُکّ اِنت و اِنسانی درۆشُما جهانا آتکگ. اے کاگد مارا سۆجَ دنت که ما چۆن هُدا و ایسّائے اَسلیگێن جئوهَرا زانتَ کنێن. اے زانت مارا چه پاکێن کتابئے هبران و چه پاکێن روهئے کُمَکّا رسیت. کاگَدئے دگه گَپّے اِش اِنت که ایسّا مسیهئے سرا ایمان آرۆکێن مردم هُدایا و یَکدگرا دۆست بدارنت. یوهنّائے ائولی کاگَدا هُدا، ”رُژن“، ”مِهر“، ”مئے آسمانی پت“ و ”ابَدمانێن زند دئیۆک“ گوَشگَ بیت و یوهَنّائے اِنجیلا هم هُدائے پَجّار همے پئیما اِنت. ایسّا ”زندئے گال“ گوَشگَ بیت که چه ازَلا هست اِنت. یوهَنّائے انجیلا هم همے هبر نبشته اِنت. ایسّا ”هُدائے چُکّ“ هم گوَشگَ بیت و اے هبر هم کنگ بوتگ که هرکَس که ایسّائے سرا ایمانَ کاریت، آ هم هُدائے چُکَّ بیت. ایسّا آدِلے بله هُدائے کِرّا په گُنهکاران رهمَ لۆٹیت، چێا که گُنَهکارانی تاوانی گۆن وتی هۆنا پُرّ کرتگ‌اَنت. اے کاگد تچکا گوَشیت که ما سجّهێن گُنهکار اێن و مارا نجات پَکار اِنت. اگن ما وتی گُناهان بِمَنّێن و باوَر بکنێن که ایسّائے مِرَگ و جاه جنَگ په مئے گُناهان کُربانیگے، گڑا ایسّا مارا پَهِلَّ کنت و پاک و پَلگارَ کنت. ایسّا مسیهئے برکتا مارا ابَدمانێن زند هم رسیت. ما که ایسّائے برکتا پاک و پَلگار بوتێن، باید اِنت هُدائے راها رُست و رُدۆم بکنێن، هُدائے هبَرانی پَرمانبَردار ببێن و وتا چه گُناها دور بِدارێن. مارا اے هُکم هم دئیَگ بوتگ که یَکدگرا دۆست بدارێت، یَکدگرا کُمَک بکنێت و اگن پکار بوت په یکدومیا وتی ساها هم نَدر بکنێت. |
© 2016-22 Wycliffe Bible Translators, Inc.
Wycliffe Bible Translators, Inc.