فيلبي 4 - Hijazi New Arabic Version

افرحوا في الرب دايماً

¹ اذاً، ياخواني الاحباء واللي مشتاق ليهم، و فرحي واكليلي، كذا اثبتوا في الرب يا حبايبي.

² بنصح أفودية، زي ما بنصح سنتيخي، انو يكون ليهم، في الرب، نفس التفكير، نصيحة وحث

³ إيوه، بطلب منك انت كمان، يا زميلي المُخلص، انك تساعدهم، لانهم الاثنين تعبو معايه بخدمة الانجيل، هم و َأَكْلِيمَنْدُس والناس اللي ساعدوني كمان، الي مكتوبة اسمائهم في كتاب الحياة.

نصايح نختم فيها

⁴ افرحوا في الرب دايما، و أقول كمان: افرحوا.

⁵ ولازم الكل يعرف عن صبركم. و الرب قريب.

⁶ لا تقلقوا من أي حاجة، خلو طلباتكم معروفة عند الله، بالصلاة والدعاء، مع الشكر.

⁷ وسلام الله، اللي يفوق كل العقول، يحمي قلوبكم وافكاركم في المسيح يسوع.

⁸ و في النهاية يا اخوان: كل شي حق، كل شي شريف، كل شي عادل، كل شي طاهر و كل شي مستحب، و كل شي سُمعتو طيبة، و كل شي فيه فضيلة وصفة طيبة، اشغلو افكاركم فيه.

⁹ اشتغلو بكل حاجة اتعلمتوها واستقبلتوها وسمعتوها مني وشفتوها فيَّا. و إله السلام يكون معاكم.

الشكر عشان العطايا

¹⁰ و بعدين أنا افرح بالرب فرح مرة كثير لأنكم جدَّدتو فيَّا اهتمامكم مرة ثانية. و مع انو كان ليكم زي ذا الاهتمام، بس الفرصة ما جات ليكم من قبل.

¹¹ ما بقصد اني كنت محتاج، فأنا أتعلمت اني اكون مقتنع على كل حال.

¹² و أعرف كيف اعيش و انا محتاج، و كيف لمَّا اعيش في البركة. انا بكل شي، و بكل الاحوال، متعود على الشبع وعلى الجوع، و اني أعيش في العز أو في الحاجة.

¹³ إني بقدر على كل حاجة، و المسيح هواللي بيديني القوة.

¹⁴ بس انتو عملتو الخير انتو ساعدتوني في اني اعدي أزمتي.

¹⁵ و تعرفو كمان، يا مؤمنين فيلبي، انو لما بدأت خدمتي للانجيل، كانت بداية جيَّتي من منطقة مقدونية، وما في كنيسة ساعدتني و ساهمت في العطاء الا انتو بس.

¹⁶ حتى وانا بمدينة تَسَالُونِيكِي، ادّيتوني كل حاجة كنت ابغاها، و اكثر من مرة كمان.

¹⁷ و الحقيقة اني ما ادور على العطايا، ادور على الفايدة الكبيرة لحسابكم.

¹⁸ و عندي دحين كل اللي ابغاه وزيادة. انا في عيشة هنية و أخذت من أَبَفْرُودِيتُس اللي ارسلتولي هو، عطر ريحتو مرة حلوة، ذبيحة بيقبلها الله ويفرح بيها.َ

¹⁹ و ربي راح ييسد حاجاتكم كلها بالكامل بحسب غناه في المجد، في المسيح يسوع.

²⁰ لربنا و ابونا، المجد الى دهر الدهور. آمين!

تحيات ختامية

²¹ سلمو على كل قديس في المسيح يسوع.

²² الإخوان اللي معايا يسلمو عليكم. ويسلمو عليكم كل القديسين، وبالذات اللي هَّم كمان من جماعة القيصر.

²³ نعمة ربنا يسوع المسيح تكون مع روحكم. آمين!