فيلبي 1 - Hijazi New Arabic Version

¹ من بُولُسَ وَتِيمُوثَاوُسَ، عبيد المسيح يسوع، لِكُل القديسين في المسيح يسوع، اللي عايشين في مدينة فِيلِبِّي، وكمان الرعاة والمدبرين۔

² ادعي لكُم بالنِعمة والسَّلام مِنَ الله أبونا والرب يسوع المسيح۔

شكر وصلاة

³ تراني أشكر ربي كل ما أتذكرتكم،

⁴ انا بتذَلَّل بفرح علشانكم كُلَّكُم في كل وقت في كل صلواتي،

⁵ بسبب انكم ساعدتوا في نشرَ الإنجيل من أول يوم إلين دحين.

⁶ وعندي ثِقه في ذا الشي بالذات: انو اللي بيبدأ فيكم بعمَل صالح رح يكَمَّلو إلين يومَ ما رح يجي المَسيح يسوع.

⁷ كمان من حقيَّ انو يكون عندي ذا الشعور ناحيتكم كُلَّكُم، لانكم في قلبي، لأنكم كُلَّكُم شُركا ليَّا في النَّعمة، اذا كان في قيودي او في دفاعي عن الانجيل وتثبيتو.

⁸ الله شاهد ليا كيف أحن ليكم كُلّكم بعواطف المسيح يسوع۔

⁹ وصلاتي علشانكم هي هذي: انو تزيد محبتكُم أكثر وأكثر في كُل المعرفة والفهم،

¹⁰ علشان تفَضِّلو الحاجات الكويسة، علشان تكونو نُضاف ومافيكم عقَبَات الين يومَ ما رح يجي المَسيح،

¹¹ كاملين في حسنات البرالجاية من يسوع المسيح، لتمجيد الله وشكرو۔

سلاسل بولس تِشتغل على نجاح الإنجيل

¹² عشان ابغاكم تِعرِفو، يا اخواني، انو أحوالي في الحقيقة هيا اللي خلَّت الانجيل ينتشر بنجاح،

¹³ كمان إنو صار معروف عِندَ الحرس الامبراطوري كلُّو وعِندَ الكُل انو قيودي هيَّا عشان المسيح؛

¹⁴ وكمان أكتَرَالإخوة، صار عِندهم ثِقة بالرب بسبب قيودي، بيجروجري ْعلى التبشير بكلام الله بدون خوف۔

¹⁵ ومن جد في ناس منهم بِيبَشِّرو بالمسيح عن حسد وفتنة؛ أما الباقين عن حسن نية۔

¹⁶ فهذولا تدفعهم المحبة، عارفين اني صرت مسؤول عشان ادافع عن الإنجيل؛

¹⁷ وذولاك بيدفعهم التحزّب، بينادو بالمسيح مو بإخلاص، يِحْسِبو إنَّهم راح يزودوا عليا الضيقة زيادة على القيود۔

¹⁸ فإذاً إيش؟ ومهما صار؟، وفي اي وَضع، المَسيح بيتنادى باسمو، سواء كان بدون سبب أوعلشان حق۔ وبكده انا حتْبَسِط وأتونس وأفرح كمان!

¹⁹ وانا أدري انو ذا الشي بيودي للخلاص، بمساعَدة صلاتكم وتعاون روح يسوع المَسيح؛

²⁰ زي اللي اتوقعو واتمناه: ما رح أتفشل بشيْ، لكن في كل جرأة وزي أي وقت وكمان كِذا دحين، تزيد عظمة المسيح في جسمي، اذا كان بالحياة او بالموت۔

²¹ لانو الحياة عندي هي المسيح، والموت مَكسَب ليا۔

²² بس، اذا كان ليا إنو أعيش في الجَسد، فحياتي بتجيب تمر. وما ادري ايش من الاثنين أختار!

²³ لأني عليا ضغط من اثنينهم: لإني أبغى اروح وأعيش مع المسيح، وذا احسن بكثير مره؛

²⁴ بس اني أفضَلْ بالجسد ضروري مره عشَانَكم۔

²⁵ وإنوأنا عندي ثِقة بذا الشي، ادري اني حفْضَل وأعيش معاكم كُلَّكم، علشان تتقدمو بالايمان وتفرحو فيه،

²⁶ عشان يزيد رفعة راسكم بسببي بالمسيح لما أجي عندكم ثاني.

عيشة تناسب بإنجيل المسيح

²⁷ لكن عيشو عيشة تِنَاسِب إنجيل المسيح، حتى لو جيت وشُفتَكُم او فِضِلت غايب عَنَّكُم، أسمَع أخبَارَكُم وأعرف انكم صامدين في روح وحده، وبنفس وحده تتعبو سوى علشان الايمان المعلن بالانجيل،

²⁸ لا تخافوا شي من اللي بيقاوموكم، لإنو مقاومتهم بتدِّل على نهايتهم همَّا وعلى خلاصكم انتو، وذا من عند الله۔

²⁹ لانو ادَّاكم هو َّ المسيح، موعشان تؤمنو فيه وبس، لكن علشان تتألموعشانو،

³⁰ تجاهدو الجهاد نفسو اللي شفتوه فيَّا واللي تِسمعو عنو دحين إنو فيَّا۔