تسالونيكي الثانية 2 - Hijazi New Arabic Version

إنسان العصيان

¹ بس بالنسبة لرجعة ربنا يسوع المسيح واجتماعنا اليه مع بعض، نبغى منكم ياخوان

² انو ما تتلخبط أفكاركم وتقلقو، لا من ايحاء ولا من خبر ولا من رسالة اتنسبت لينا بالزور، بينقال فيها انو يوم الرب فعلا جانا.

³ ما تخلو احد يخدعكم بأي طريقة! لانو اليوم دا ما راح يجي من قبل ما يسبقو خبر كثرة الناس اللي تكفر و ظهور انسان العصيان، ولد الهلاك،

⁴ اللي بيتحدى كل اللي بيتسمى بالاله أو معبود، وبيعاديه وهو مترفع عنه. وكمان ياخذ من هيكل الله مكان له، وبيحاول يثبت انو إله.

⁵ ما تتزكروا اني كتير قلتلكم الكلام دا لما كنت عندكم؟

⁶ وإنتو دحين بِتِعرِفو اللي محتجزه لأجل ما يبان إلاَّ في الوقت المناسب ليه.

⁷ فالعصيان دَحين بيكون شغال بالخِفْيه كأنو سِر. لكن بس الين يترَفَع منَ الوسط داك اللي بيِحبس المُتمرد۔

⁸ وقتَها بس راح يبان الانسان المُتَمَرِّد بوضوح كَبير فبيخلِّص عليه الرب يسوع بنفخة فمٌّو وبيغطي عليه بجمال ظهورو وَقت رجعَتو.

⁹ بس الحد اللي يوصلو المتمرد، راح يكون على قد قدرة الشيطان على المُعجِزات والعلامات والعجايب الوَهمية كُلها،

¹⁰ وعلى كل انواع نشر الأكاذيب اللي بياخد الضاَّلين للعصيان، لإنْهُم ما قِبلو محبة الحق لأجل يخلَصو.

¹¹ ولأجل دا السبب، الله رح يِرسِل لِيهُم قدرة الضلال لاجل يِصَدِّقو اللي هو دجل،

¹² راح يكون عقاب على كُل اللي ما آمنو بالحق بالعكس كانو مبسوطين بالإثم.

اثبتو

¹³ أما إحنا، من واجبنا إنو نِشكر الله دايماً لاجلكم، يا أخوان يا اللي الرب يحُبَّكُم، لإنو الله أختَارَكُم من البداية للخلاص، بِتَقديس الروح لِيكُم وإيمانَكُم بالحق.

¹⁴ ولأجل دا الشي دعاكم بِبشارَتنا ليكُم، لأجل نِحَصّل مجد ربنا يسوع المسيح.

¹⁵ أجل إثبتو، يا اخوان، وأتمَسَّكو بالتعاليم اللي حصَّلتوها وجات لكم مِننا، سواء اذا كان بالكلام او بِرِسالتنا.

¹⁶ وياريت ربنا يسوع المسيح نفسو، والله أبونا، اللي حبنا وأدانا بِنِعمِتو راحة أبديه ورجا صالح ،

¹⁷ يشجع قُلُوبَكُم ويثِّبِّتكُم في كل عمل صالح وكلام طيب!